Navigaziun principala

Cuntegn da la pagina

Dumonda Michel (Cuira) concernent la promoziun d'utilisaziuns intermediaras en il chantun Grischun

Sessiun: 24.04.2014
In'utilisaziun intermediara vegn realisada durant il temp tranter l'utilisaziun, per la quala l'areal è vegnì concepì oriundamain (industria, militar, baselgia e.u.v.), e l'utilisaziun nova intendida che sto savens anc vegnir fixada. L'utilisaziun intermediara n'è pia definida en moda clera ni areguard il gener da l'activitad ni areguard il temp e savens er betg giuridicamain. Normalmain sa tracti en quest connex d'ina perioda da 2 fin 5 onns. I po er durar 10 onns, fin ch'in areal u in cumplex d'edifizis po vairamain vegnir renovà.

Motivs per utilisaziuns intermediaras:

1. Utilisaziuns intermediaras che vegnan realisadas cun success e che vegnan percepidas en la publicitad contribueschan ad ina reputaziun positiva, stgaffeschan spazis creativs ed augmentan la valur d'in areal u d'in quartier.

2. Utilisaziuns intermediaras rendan. Sch'ellas vegnan dirigidas en moda professiunala, na cuvran ellas betg mo ils custs da gestiun, mabain portan in retgav.

3. La dumonda per localitads favuraivlas è gronda, en spezial en l'economia creativa. Utilisaziuns intermediaras n'enconuschan nagin spazi vid.

4. Utilisaziuns intermediaras mussan potenzials ed opziuns, dals quals pon resultar concepts per ina midada d'utilisaziun e / u stabilisaziun.

5. Utilisaziuns intermediaras promovan innovaziuns. La part d'interpresas innovativas è extraordinariamain gronda en utilisaziuns intermediaras.

6. Activitads socioculturalas en utilisaziuns intermediaras dattan als areals ed als quartiers in caracter viv ed urban.

7. Per start-ups, per uniuns e per artistas ed artists èn ils tschains da locaziun, ch'èn savens favuraivels en utilisaziuns intermediaras, fitg impurtants.

Utilisaziuns intermediaras dovran in rom giuridic adattà. Quai cumpiglia u ina interpretaziun vasta e flexibla da l'urden da zonas valaivel u ina menziun concreta da l'utilisaziun intermediara en la lescha. Ils obstachels ils pli gronds per utilisaziuns intermediaras èn conflicts cun las differentas leschas. Quellas permettan mo curts termins legals. En tut ils auters cas vegni procedì en la pratica cun agid d'excepziuns. Instruments regulativs pussaivels per utilisaziuns intermediaras èn proceduras simplifitgadas per permissiuns, ina categoria da construcziun e d'utilisaziun per utilisaziuns transitoricas en la lescha da construcziun, ina permissiun generala per l'utilisaziun maximala, ina libertad da decider ch'è lianta per las autoritads, in bonus d'utilisaziun, in contract davart l'emprest per il diever u in contract davart l'utilisaziun intermediara.

Exempels: areal Torfeld sid, Aarau, areal Lagerplatz, Winterthur, areal Binz, Turitg, e la finala: la Photobastei a Turitg, nua ch'il museum d'art dal Grischun è actualmain giast. En il dialog Cuira vest è l'utilisaziun intermediara sa mussada sco basegn prioritar da la populaziun participanta.

1. Co giuditgescha la regenza il concept da las utilisaziuns intermediaras che vegn applitgà en auters chantuns?

2. È la regenza pronta da stgaffir la basa per sustegnair e per promover utilisaziuns intermediaras en il chantun Grischun?

Cuira, ils 24 d'avrigl 2014

Michel (Cuira), Locher Benguerel, Baselgia-Brunner, Bezzola (Samedan), Blumenthal, Bucher-Brini, Claus, Clavadetscher, Darms-Landolt, Fontana, Gartmann-Albin, Jaag, Joos, Kollegger (Malix), Marti, Müller (Tavau Plaz), Niederer, Peyer, Pfenninger, Pult, Trepp, Waidacher, Deplazes, Hensel, Spreiter

Resposta da la regenza

Pertutgads d'utilisaziuns intermediaras en il senn da questa dumonda èn areals u edifizis ch'èn vids resp. che na vegnan betg pli duvrads per in motiv u l'auter, che duain dentant puspè vegnir duvrads per in intent definitiv suenter in tschert temp transitoric. Sco exempels pon vegnir numnads l'areal da la resgia Mayr-Melnhof a Domat, casernas betg duvradas u auters edifizis bandunads. Tras utilisaziuns intermediaras duai vegnir superà il temp tranter l'intent oriund d'utilisaziun ed il nov intent d'utilisaziun.

Talas utilisaziuns intermediaras pon tuttavia esser raschunaivlas. Il terren stgars na resta betg nunutilisà, ed i pon resultar soluziuns intermediaras creativas che stattan en l'interess public. Quellas pon dentant er esser problematicas, numnadamain sch'ellas cuntrafan al dretg da construcziun, da planisaziun e da l'ambient vertent. Ultra da quai exista il privel – sco tar tut ils provisoris – ch'ina utilisaziun intermediara s'etablescha uschia, ch'ella impedescha in'utilisaziun anc pli raschunaivla e cunzunt definitiva confurm a la planisaziun d'utilisaziun. En la pratica po quai savens vegnir constatà sin areals industrials nunutilisads, uschia ch'i van a perder potenzials da svilup prezius per l'economia publica. Utilisaziuns intermediaras n'èn pia betg generalmain degnas da vegnir promovidas, mabain ston vegnir giuditgadas en moda differenziada en il cas singul concret. 

Tar las dumondas:

1. En ses urden communal da construcziun e d'utilisaziun ha la citad dad Aarau autorisà il cussegl da la citad da permetter utilisaziuns intermediaras per l'areal Torfeld Süd.

La citad da Turitg è – tut tenor exempel – participada sco proprietaria da bains immobigliars (Kronenwiese), sco administratura d'immobiglias (stadion Hardturm nunutilisà) u sco locataria globala (Werkerei Schwamendingen). La Photobastei a Turitg vegn duvrada sur in investider privat e l'areal Binz è vegnì occupà illegalmain. L'areal Lagerplatz a Winterthur vegn sviluppà a maun d'in contract da dretg public. Tut ils exempels menziunads èn vegnids pussibilitads senza disposiziuns chantunalas u senza mesiras da promoziun chantunalas.

2. Sco menziunà ston utilisaziuns intermediaras vegnir examinadas resguardond las relaziuns localas. Perquai èsi raschunaivel che las regulaziuns correspundentas vegnian relaschadas sin plaun communal. La lescha vertenta davart la planisaziun dal territori per il chantun Grischun (LPTGR) dat gia oz la libertad d'agir necessaria. Ella permetta a las vischnancas da relaschar sin mesira disposiziuns da zona (art. 26 ss. LPTGR) e metta a disposiziun instruments da planisaziun, cun ils quals ellas pon reagir sin basegns specifics en moda flexibla ed orientadas a projects (plan d'areal, plan da quartier, planisaziun cooperativa). Regulaziuns sin plaun chantunal fissan memia pauc differenziadas e na procurassan per nagina plivalur en cumparegliaziun cun las pussaivladads gia existentas.

Ultra da quai ston ins resguardar che d'utilisaziuns intermediaras resultan savens dumondas da construcziun u dumondas da la polizia da fieu. L'examinaziun da quellas fa part dal champ d'incumbensas tradiziunal da las autoritads localas da construcziun. La disposiziun excepziunala en l'art. 82 LPTGR furma ina basa per gidar a realisar soluziuns raschunaivlas resguardond ils interess dals vischins. Savens cuntrafan utilisaziuns intermediaras al dretg federal da l'ambient (canera, aria e.u.v.) che sto en mintga cas vegnir respectà dals chantuns.

Sin fundament da questas ponderaziuns è la regenza da l'avis ch'i na saja betg necessari da stgaffir ina basa legala pli vasta per promover utilisaziuns intermediaras. Er ils exempels extrachantunals tematisads en questa dumonda ed analisads qua survart èn vegnids pussibilitads caracteristicamain senza disposiziuns chantunalas specificas, mo sin basa da prescripziuns, d'instruments e da libertads d'agir communalas gia existentas.

25 da zercladur 2014