Cuntegn da la pagina

Dumonda da la fracziun da la PS concernent ils instruments per optimar taglias e lur consequenzas sin las finanzas dal Grischun

sessiun: 21.10.2014
Differentas medias han rapportà durant las ultimas emnas che interpresas emprovan d'optimar lur taglias cun differents instruments. Tranter auter èsi vegnì rapportà er davart la gruppa da l'Ems-Chemie che cuntanscha respargns fiscals cun ceder pretensiuns avertas e futuras ad ina filiala al Luxemburg (uschenumnà factoring).

Las sutsegnadras ed ils sutsegnaders dumondan perquai la regenza:

1. Tge instruments per spargnar taglias (optimar taglias) che vegnan applitgads er d'interpresas grischunas èn enconuschents a la regenza respectivamain a l'administraziun da taglia?

2. Co giuditgescha la regenza las praticas per optimar taglias en vista a l'economia publica dal Grischun, dentant er en vista a la morala fiscala da las interpresas pitschnas e mesaunas (IPM) e da las persunas natiralas?

3. Tge consequenzas finanzialas han las optimaziuns da taglias d'interpresas ch'èn domiciliadas en il Grischun sin las entradas fiscalas dal chantun e da las vischnancas respectivas?

4. Datti indizis che interpresas obligadas da pajar taglias en il Grischun che optimeschan lur taglias profitan a medem temp – sut il titel da la "promoziun da l'economia" – da facilitaziuns fiscalas tras il chantun?

5. Sut l'aspect da l'opportunitad morala po la pratica d'optimar taglias vegnir giuditgada differentamain. Percunter è ella admissibla dal puntg da vista giuridic. Quai ha il legislatur accentuà en il passà cun concepir la legislaziun fiscala sin plaun naziunal e chantunal. A la regenza vegni pia dumandà, sch'ella è pronta da preschentar en in rapport tut las praticas legalas per optimar taglias e lur consequenzas sin las finanzas dal chantun. In tal rapport stgaffescha per l'ina transparenza e permetta ina debatta objectiva. Per l'autra mussa el ils spazis d'agir per ils temps futurs che vegnan eventualmain ad esser pli difficils pertutgant las finanzas.

Cuira, ils 21 d'october 2014

Peyer, Atanes, Baselgia-Brunner, Bucher-Brini, Cahenzli-Philipp, Caviezel (Cuira), Deplazes, Gartmann-Albin, Jaag, Locher Benguerel, Monigatti, Noi-Togni, Perl, Pfenninger, Pult, Thöny

Resposta da la regenza

En la resposta a la dumonda Trepp concernent las consequenzas da la revisiun da la lescha da taglia da l'avust 2009 ha la regenza explitgà, tge che po esser l'object d'ina dumonda e tge che sto vegnir suttamess en furma d'ina incumbensa. A questas explicaziuns en il CR nr. 1200/2013 poi vegnir renvià.

La dumonda da fracziun concernent ils instruments per optimar taglias surpassa cleramain il rom d'ina dumonda. I na fiss betg pussaivel da respunder la dumonda senza consultar ils dossiers da taglia da las persunas giuridicas e da las persunas cun activitad da gudogn independenta e chaschunass enorm blera lavur. La regenza desista perquai da respunder materialmain las dumondas concretas.

Ma la regenza s'exprima er per motivs objectivs cunter ina resposta da las dumondas: En la refurma da l'imposiziun armonisada da taglia sin interpresas ha il legislatur chantunal mo ina libertad concepziunala minimala. Ina tala exista per exempel en il sectur da las amortisaziuns immediatas u da las facilitaziuns fiscalas. La dumonda da las amortisaziuns immediatas è vegnida tematisada en l'incumbensa da la fracziun da la PLD concernent il rinforz dal Grischun sco lieu d'interpresas e la regenza è sa declerada pronta d'examinar quest punct (PCG 2013-2014, p. 1030). La dumonda da las facilitaziuns fiscalas è vegnida tractada en il rom dal rapport davart l'economia e na sto betg vegnir discutada supplementarmain da la regenza.

Optimaziuns da taglia èn mesiras legalas per reducir ils custs sin il champ da las taglias ed igl è l'incumbensa da l'administraziun da taglia d'examinar – a chaschun da la procedura da taxaziun –, sche las reglas legalas vegnan observadas. Optimar ils custs è ina incumbensa centrala per mintga interprendider, per pudair rinforzar la cumpetitivitad da sia interpresa e per pudair mantegnair a lunga vista las plazzas da lavur. Optimaziuns da taglia na pon pia betg vegnir designadas da princip sco condemnablas, sco immoralas u schizunt sco illegalas.

Cunter transferiments dal gudogn inadmissibels ed economicamain betg motivads sin il parchet internaziunal ha la OECD prendì per mauns il project "Base Erosion and Profit Shifting" (reducziun e transferiment dal gudogn). Ils gudogns duain vegnir suttamess a la taglia là, nua che la creaziun da valur ha lieu. Questas stentas vegnan sustegnidas da la regenza, schebain che las interpresas grischunas dastgassan esser pertutgadas da quai mo a l'ur.

18 da december 2014