Cuntegn da la pagina

Incumbensa Casanova (Glion) concernent il svilup tar las taxaziuns da taglia

sessiun: 09.12.2014
Il svilup tecnologic na sa ferma er betg davant las taxaziuns da taglia. Uschia vegnan preparads per ils proxims onns il "scanning" e la "archivaziun electronica" sco er la "automatisaziun dals cas".

L'automatisaziun dals cas è in svilup logic en il rom da l'elavuraziun electronica da datas. L'introducziun da la taxaziun automatica vegn ad avair consequenzas per la collavuraziun da las vischnancas. Uschia vegn d'ina vart a sa reducir il dumber dals cas ch'èn da taxar, quai che vegn ad avair consequenzas per il volumen da lavur ed uschia per ils pertschients da plazzas. Da l'autra vart vegn er l'indemnisaziun a las vischnancas a vegnir reglada da nov, quai che vegn previsiblamain a chaschunar perditas massivas per las vischnancas.

Auter è quai tar il scanning e tar l'archivaziun electronica. Qua sa tracti da la controlla d'entrada e dal scanning da tut ils documents d'ina decleraziun da taglia ch'èn sin palpiri. Il concept per l'introducziun a partir da l'onn 2016 è en preparaziun e prevesa che gist quest scanning duai vegnir fatg en moda centrala a Cuira. En quest connex duain er las controllas d'entrada vegnir fatgas en l'avegnir en moda centrala a Cuira, uschia che las vischnancas perdan er en quest sectur volumen da lavur ed indemnisaziuns.

Quest concept na correspunda insumma betg a la strategia da la confederaziun e dal chantun da rinforzar ils centers regiunals (concept dal territori GR). Igl è absolutamain necessari da mantegnair plazzas da lavur en las regiuns. Las prestaziuns actualas da las vischnancas en il rom da la taxaziun da taglia èn sa cumprovadas ed i n'existan absolutamain nagins motivs da centralisar questas incumbensas. Cun las pussaivladads tecnicas d'ozendi na dependi betg, nua che las controllas d'entrada ed il scanning vegnan fatgs, ed ina soluziun decentrala na chaschuna er nagins custs supplementars.

Las sutsegnadras ed ils sutsegnaders incumbenseschan perquai la regenza d'instradar las suandantas mesiras:

- Il concept per il scanning e per l'archivaziun electronica sto vegnir midà en quel senn che questas lavurs na vegnan betg fatgas en moda centrala a Cuira, mabain en moda decentrala en ils centers regiunals.

- Las controllas d'entrada da las decleraziuns da taglia duain vegnir fatgas er en l'avegnir en las vischnancas e betg en moda centrala a Cuira.

Cuira, ils 9 da december 2014

Casanova (Glion)  Jaag, Müller, Albertin, Alig, Atanes, Baselgia-Brunner, Bleiker, Blumenthal, Bondolfi, Bucher-Brini, Caduff, Cahenzli-Philipp (Vaz sut), Caluori, Casanova-Maron (Domat), Casutt-Derungs, Cavegn, Crameri, Danuser, Darms-Landolt, Della Vedova, Deplazes, Dosch, Fasani, Felix (Scuol), Foffa, Gartmann-Albin, Heinz, Joos, Kunfermann, Lamprecht, Locher Benguerel, Lorez-Meuli, Michael (Castasegna), Monigatti, Niederer, Niggli-Mathis (Grüsch), Noi-Togni, Paterlini, Peyer, Pfenninger, Pult, Sax, Tenchio, Thomann-Frank, Thöny, Tomaschett (Breil), Tomaschett-Berther (Trun), Toutsch, Weber, Cahenzli (Trin Mulin), Tuor

Resposta da la regenza

L'onn fiscal 2001, cur ch'igl è vegnì midà a la valitaziun postnumerando, èn er vegnidas reorganisadas la collavuraziun tar l'imposiziun e l'indemnisaziun da las vischnancas. L'indemnisaziun totala è creschida da 6,1 milliuns francs l'onn 2002 ad 8 milliuns francs l'onn 2014, e per l'onn 2015 è ella budgetada cun 8,3 milliuns francs. Quest augment dals custs da passa 35 pertschient sto vegnir mess en dumonda. La correctura na duai betg vegnir fatga cun reducir l'indemnisaziun per l'imposiziun da persunas obligadas illimitadamain da pajar taglia ed er betg cun tschentar quint a las vischnancas per las activitads e per ils custs (d'informatica) da l'administraziun chantunala da taglia. Ils custs duain vegnir reducids cun agid da process automatisads e tras quai ch'expensas da persunal crodan davent. Tras il scanning e tras l'archivaziun electronica, che vegnan tematisads qua, crodan davent differentas incumbensas tar las controllas d'entrada sco er l'archivaziun da las actas fiscalas tras las vischnancas.

Oz vegnan circa 75 pertschient da las decleraziuns da taglia per las taglias sin las entradas e sin la facultad inoltradas en furma electronica u registradas cun agid dal barcode 2D. Questas decleraziuns da taglia pon vegnir chargiadas en l'applicaziun da taxaziun ed elavuradas vinavant là sin via electronica. Suenter la colliaziun cun l'archiv electronic da l'uffizi d'informatica l'atun 2014 è quest process vegnì sviluppà vinavant. En in proxim pass duain er las decleraziuns da taglia inoltradas sin palpiri sco er tut las agiuntas vegnir registradas electronicamain, q.v.d. vegnir scannadas, e l'archivaziun actuala sin palpiri duai vegnir remplazzada pass per pass tras l'archivaziun electronica. Il scanning duai vegnir introducì l'onn 2016, perquai che la soluziun da taxaziun vegn remplazzada per la perioda fiscala 2018 e perquai che l'investiziun è mo giustifitgada, sche l'applicaziun po vegnir nizzegiada anc durant plirs onns.

Per il scanning e per l'archivaziun da quantitads da datas uschè grondas dovri infrastructuras charas che ston avair ina gronda capacitad. Quellas ston vegnir tratgas a niz optimalmain e ston vegnir applitgadas da persunas versadas. Tras quai che l'entira lavur da taxaziun dependa fermamain da la disponibladad da quests sistems, èn avant maun fitg grondas pretensiuns envers la garanzia ch'i na dettia naginas interrupziuns ed envers l'organisaziun dal support. Ultra da quai na concernan il scanning e l'archivaziun betg mo las taglias sin las entradas e sin la facultad, mabain er ils auters geners da taglia, sco las taglias sin il gudogn e sin il chapital da las persunas giuridicas, la taglia sin il gudogn tras la vendita da bains immobigliars, la taglia sin l'ierta, la taglia a la funtauna e.u.v., nua che las vischnancas n'han naginas funcziuns d'incassament. La finala stoi vegnir resguardà ch'il volumen dal scanning vegn a sa reducir svelt ils proxims onns, perquai che dapli decleraziuns da taglia ed er agiuntas (extracts dals contos, attests da salari e.u.v.) vegnan inoltrads en furma electronica.

L'archivaziun electronica decentrala, che vegn pretendida en l'incumbensa, po vegnir chapida mo uschia, che las endataziuns da l'archiv central duain vegnir fatgas en moda decentrala. Ina gestiun decentrala da las datas na po vegnir giuditgada sut nagins aspects sco raschunaivla, pratitgabla u finanziabla. Uschia sa reducescha l'incumbensa sin las dumondas dal scanning e da las controllas d'entrada.

Ils scanning è vegnì analisà detagliadamain tras l'administraziun da taglia e discutà cun il departament da finanzas e vischnancas. Er soluziuns decentralas èn vegnidas examinadas, ma refusadas per ils suandants motivs:
- l'infrastructura da scanning na vegn betg mo duvrada per las taglias sin las entradas e sin la facultad, mabain er per auters geners da taglia, nua che las vischnancas n'han naginas funcziuns operativas, uschia che questa infrastructura vegn utilisada en emprima lingia tar l'administraziun chantunala da taglia a Cuira;
- ils custs totals per acquistar l'infrastructura da scanning s'augmentan cun mintga lieu da manaschi supplementar, perquai che scanners cun in pau damain capacitad na custan betg bler pli pauc;
- ina reducziun probabla dal volumen da scanning po vegnir resguardada – areguard ils custs – bler meglier tras mesiras persunalas ed organisatoricas en cas d'in manaschi central en in unic lieu che en cas d'ina organisaziun decentrala; quai cunzunt, sche l'infrastructura da scanning stuess vegnir installada en fin diesch centers regiunals (tenor il concept dal territori GR èn quai nov centers plus probablamain Tavau);
- en cas da plirs lieus da manaschi sto vegnir installà e mantegnì in dumber correspundent d'organisaziuns da manaschi, e las colliaziuns da tut ils lieus cun la rait sto star a disposiziun cun il volumen da datas transferibel minimal, quai che augmenta ils custs periodics;
- andaments da lavur effizients èn pussaivels mo en cas d'ina elavuraziun centrala; l'inoltraziun da las decleraziuns da taglia a la vischnanca e lura il transport da talas en centers regiunals pretendessan soluziuns ecologicamain dispitaivlas sco er logisticamain, organisatoricamain e tecnicamain cumplitgadas; il mantegniment da plazzas da lavur en las regiuns na po dentant betg vegnir cumprà sin donn e cust d'ina administraziun ineffizienta e chara;
- tras las actas fiscalas electronicas crodan davent differentas incumbensas en il sectur da las controllas d'entrada; autras lavurs vegnan liquidadas en il rom dal scanning u pli tard ensemen cun las acziuns da taxaziun; ina controlla d'entrada separada n'è perquai betg pli necessaria, ma qua tras croda davent en fitg bleras vischnancas mo in volumen da lavur fitg pitschen;
- il volumen dals documents ch'èn d'elavurar en il rom dal scanning è suttamess a grondas fluctuaziuns periodicas che pon vegnir cumpensadas bler meglier tras ina soluziun centrala cun plirs geners da taglia;
- las vischnancas stuessan acquistar e finanziar las infrastructuras da scanning per ils centers regiunals, installar las organisaziuns da manaschi e purtar la ristga, sch'il volumen da lavur sa reduciss fermamain e sche lur custs na pudessan betg pli vegnir cuvrids tras l'indemnisaziun ch'il chantun paja per ils custs pro cas;
- infrastructuras da scanning decentralas en fin diesch centers regiunals na pudessan – per motivs da realisaziun e da preventiv – betg vegnir messas en funcziun per il cumenzament da l'onn 2016, uschia che las extensiuns correspundentas da la funcziunalitad na pudessan strusch pli vegnir realisadas en il rom da la soluziun da taxaziun existenta e stessan a disposiziun pir suenter l'onn 2018.

Sin basa da questas ponderaziuns refusa la regenza l'incumbensa Casanova. Ina soluziun decentrala è chara, cleramain main effizienta, main ecologica ed – en vista als svilups futurs – main flexibla. Plinavant na stess ella betg a disposiziun ad ura, ed ella impediss da sviluppar vinavant ils process en l'administraziun da taglia.

20 da schaner 2015