En la sessiun da december 2014 han differentas deputadas e differents deputads da praticamain tut las partidas punctuà la gronda impurtanza da la SATE Cuira e rendì attent il medem mument al basegn urgent d'agir. Dapi onns vegnan fatgs studis e scleriments, ma in project concret per ina scola auta attractiva e fitg potenta n'è anc betg avant maun en furma d'in project madir per la votaziun.
Cun abolir la colliaziun dal franc vi da l'euro èn las perspectivas economicas sa pegiuradas marcantamain per il Grischun. Vitiers vegn che l'individualissem da la SATE Cuira ordaifer la Scola auta spezialisada da la Svizra orientala vegn tematisà cun l'accreditaziun instituziunala. Ina scola auta spezialisada cumpetitiva sco avantatg dal lieu per l'economia e per la societad en la regiun dal Grischun sto perquai vegnir messa en il focus da la politica grischuna. Las sutsegnadras ed ils sutsegnaders incumbenseschan perquai la regenza d'accelerar ils differents scleriments e las diversas lavurs e da dumandar anc en la legislatura currenta l'approvaziun per in project progressiv cun in credit per construir in center da scola auta resp. da laschar tractar questa fatschenta al cussegl grond almain en la perioda da legislatura currenta. Quai premetta che tut ils concepts necessaris, tut ils scleriments dal lieu, tut ils scleriments cun la confederaziun (vul dir cun il secretariat da stadi per furmaziun, retschertga ed innovaziun), la finanziaziun e.u.v. stoppian esser avant maun a temp e ch'il project vegnia priorisà correspundentamain.
Cuira, ils 10 da favrer 2015
Kappeler, Dudli, Marti, Albertin, Brandenburger, Bucher-Brini, Caduff, Caluori, Casanova (Glion), Casty, Casutt-Derungs, Caviezel (Cuira), Davaz, Dosch, Engler, Foffa, Gartmann-Albin, Heiz, Hitz-Rusch, Holzinger-Loretz, Hug, Jeker, Kasper, Kollegger, Kunfermann, Kunz (Cuira), Kuoni, Mani-Heldstab, Nay, Niederer, Salis, Sax, Schneider, Stiffler (Cuira), Thomann-Frank, von Ballmoos, Waidacher, Widmer-Spreiter, Calonder, Föhn, Tuor
Resposta da la regenza
Per rinforzar l'attractivitad dal Grischun sco lieu da furmaziun e da perscrutaziun respectivamain per sustegnair las interpresas dal Grischun a recrutar persunal spezialisà e per promover il transfer da savida e da tecnologia èsi necessari che la scola auta da tecnica ed economia SATE porschia ina scolaziun ch'è accordada cun ils basegns da l'economia grischuna e che cuntegna en spezial er studis tecnologics. Perquai che passa 70 pertschient da las studentas e dals students da la SATE derivan oz d'ordaifer il Grischun, ha ina buna cuntanschibladad dal center da scola auta cun ils meds da transport publics ina gronda impurtanza. La SATE stat er en quest connex en ina concurrenza interchantunala per studentas e students d'auters chantuns. Uschia han per exempel la scola auta spezialisada da Son Gagl tar la staziun da Son Gagl, la scola auta da pedagogia da Turitg tar la staziun principala u la scola auta spezialisada da la Svizra dal nordvest en spezial als lieus Brugg-Windisch u Olten edifizis da scola ch'èn cuntanschibels excellentamain cun il traffic public.
In'activitad da scolaziun e da perscrutaziun ch'è accordada cun las interpresas localas e per part orientadas fermamain a l'export, presta ina contribuziun impurtanta a l'ulteriur svilup dal Grischun sco lieu economic. Studis d'auta qualitad che resguardan ils basegns da l'economia pon gidar a reducir la mancanza da persunas spezialisadas ed a motivar interpresas existentas u novas da far investiziuns en il chantun.
In center da scola auta ch'è renconuschì sur ils cunfins dal chantun ora sustegna l'entretschament da l'instrucziun, da la perscrutaziun e da l'economia. Uschia po in center da scola auta er prestar quella contribuziun impurtanta ch'è necessaria per il Grischun sco lieu da rait per ademplir las pretensiuns dal concept "Parc d'innovaziun Svizra".
Gia cun tractar il rapport davart il svilup economic en il chantun Grischun (missiva da la regenza al cussegl grond, carnet nr.5/2014-2015, p. 305) è il cussegl grond s'exprimì en quella direcziun ch'i saja necessari d'elavurar pli svelt la dumonda dal lieu per la SATE (protocol da decisiuns dal cussegl grond 2014/2015, p. 283).
Las lavurs per realisar ina infrastructura renovada per la SATE progredeschan. Actualmain sclerescha la SATE cun la confederaziun, quant auta che la contribuziun federala per in center da scola auta vegn ad esser.
En l'incumbensa qua avant maun vegni spetgà ch'il cussegl grond possia tractar en la legislatura currenta almain la missiva tar la construcziun d'in center da scola auta. Sche quai vegn ad esser pussaivel dependa da la dumonda, quant svelt che differentas dumondas ch'èn anc adina avertas (cuntegns futurs e direcziuns futuras dals studis, lieu, finanziaziun, ulteriura utilisaziun eventuala da l'infrastructura actuala e.u.v.) pon vegnir scleridas.
La regenza è conscienta da l'urgenza da prender ina decisiun concernent la direcziun ed il lieu d'in center da scola auta da la SATE Cuira. Ella è pronta da priorisar il project dal center da scola auta en il senn da la direcziun fixada dal cussegl grond (chapitel VII.6.2. missiva da la regenza al cussegl grond, carnet nr. 5/2014-2015, p. 305), renviescha però al fatg ch'ins stoppia far quint cun intschertezzas las pli differentas tar projects da construcziun. La regenza è pronta d'acceptar questa incumbensa.
1. da matg 2015