Cuntegn da la pagina

Dumonda Gunzinger concernent la nova finanziaziun dals ospitals

sessiun: 28.08.2015
Il 1. da schaner 2009 è entrada en vigur la revisiun parziala da la lescha federala davart l'assicuranza da malsauns (LAMal) concernent la midada da la finanziaziun dals ospitals. Il chantun Grischun ha realisà la nova finanziaziun dals ospitals per il 1. da schaner 2012 en concordanza cun las disposiziuns transitoricas tar la midada da la LAMal dals 21 da december 2007. Tenor la nova finanziaziun dals ospitals vegnan ils tractaments acutsomatics staziunars quintads giu sur l'uschenumnada rata da basa (SwissDRG), vul dir ina pauschala fixa per cas da tractament che sa drizza tenor la prestaziun. Las pauschalas cumpiglian er l'indemnisaziun dals custs d'investiziun. Sin fundament da la nova finanziaziun dals ospitals ston ils chantuns er gidar a pajar ils custs da tractaments staziunars d'abitantas ed abitants dal chantun en ospitals privats, sche quels figureschan sin ina glista d'ospitals. Las assicuranzas supplementaras ston mo pli surpigliar las prestaziuns supplementaras per pazientas e pazients assicurads en moda mez privata e privata che n'èn betg cuvridas tras l'assicuranza obligatorica da malsauns. La nova finanziaziun dals ospitals cumpiglia plinavant l'introducziun da la libra tscherna da l'ospital. Per il tractament staziunar po mintga persuna assicurada tscherner libramain tranter ils ospitals che figureschan sin la glista d'ospitals da ses chantun da domicil u sin la glista dal chantun da staziunament.

Las sutsegnadras ed ils sutsegnaders tschentan perquai las suandantas dumondas a la regenza:

1. Tge consequenzas ha la libra tscherna da l'ospital, ch'è vegnida introducida tras la nova finanziaziun dals ospitals, gì per las dimoras da pazientas e pazients dal Grischun en ospitals extrachantunals, e quai en la somatica acuta, en la psichiatria ed en la reabilitaziun?

2. È la circumstanza ch'il chantun sto gidar a pajar ils custs da tractaments staziunars en ospitals privats, sa manifestada tar las premias da l'assicuranza supplementara en il senn d'ina reducziun da las premias?

Cuira, ils 28 d'avust 2015

Gunzinger, Niggli-Mathis (Grüsch), Caduff, Alig, Berther, Blumenthal, Bondolfi, Brandenburger, Buchli-Mannhart, Burkhardt, Caluori, Casanova-Maron (Domat), Casutt-Derungs, Cavegn, Caviezel (Cuira), Clavadetscher, Danuser, Davaz, Deplazes, Felix (Scuol), Geisseler, Giacomelli, Grass, Hardegger, Hartmann, Hitz-Rusch, Holzinger-Loretz, Jeker, Jenny, Kappeler, Kasper, Koch (Tumein), Komminoth-Elmer, Kunz (Cuira), Kuoni, Lamprecht, Lorez-Meuli, Mani-Heldstab, Märchy-Caduff, Mathis, Michael (Castasegna), Müller, Nay, Noi-Togni, Papa, Paterlini, Pedrini, Peyer, Salis, Sax, Steck-Rauch, Steiger, Stiffler (Tavau Plaz), Stiffler (Cuira), Thomann-Frank, Thöny, Tomaschett-Berther (Trun), Troncana-Sauer, Vetsch (Pragg-Jenaz), von Ballmoos, Weber, Weidmann, Widmer-Spreiter, Wieland, Degiacomi, Engler (Surava), Föhn, Gugelmann, Nicolay, Rodigari, Zanetti (Puschlav)

Resposta da la regenza

La regenza respunda las dumondas sco suonda:

1. Tenor la statistica medicinala da l'uffizi federal da statistica (UST) hai dà il suandant svilup tar las ospitalisaziuns da pazientas e pazients cun domicil en il Grischun en manaschis extrachantunals:



Dapi l'entrada en vigur da la nova finanziaziun dals ospitals il 1. da schaner 2012 fin la fin da l'onn 2013 è il dumber da cas staziunars extrachantunals s'augmentà per 5%.

Perquai che las datas da l'onn 2014 vegnan publitgadas dal UST pir il cumenzament da l'onn 2016, finescha la retscha da datas gia l'onn 2013.

Areguard il dumber da cas staziunars extrachantunals, als quals il chantun ha stuì sa participar finanzialmain (tractaments en ospitals da la glista d'ospitals dal chantun Grischun u dal chantun da staziunament sco er tractaments per motivs medicinals en in ospital che na figurescha betg sin la glista d'ospitals dal chantun Grischun), sa preschenta in auter maletg (funtauna: glista interna da l'uffizi da sanadad):



Qua è il dumber da cas sa triplà dapi l'entrada en vigur da la nova finanziaziun dals ospitals.

2. Gea, ma cun grond retard. Il UST publitgescha mintgamai l'atun da l'onn da premias current l'index da las premias da las assicuranzas da malsauns (IPAM) che mussa il svilup da las premias en il sectur da las assicuranzas fundamentalas e supplementaras dapi l'onn 1999. Il IPAM da las assicuranzas supplementaras è creschì en il chantun Grischun l'onn 2012 per 1,0% cumpareglià cun l'onn precedent, l'onn 2013 per 1,6% cumpareglià cun l'onn precedent. L'onn 2014 è l'index sa reducì en il chantun Grischun per 11,9%.

En tut la Svizra èn las premias da las assicuranzas supplementaras da malsauns 2014, ch'èn vegnidas eruidas dal UST, sa reducidas per 10,4% cumpareglià cun l'onn precedent. En quest connex èn las premias da las assicuranzas supplementaras d'ospital sa reducidas per 26,9%, quellas da las assicuranzas mez privatas per 3,3% e quellas da las assicuranzas supplementaras privatas d'ospital per 2,7%.

22 d'october 2015