Cuntegn da la pagina

Incumbensa Perl concernent dapli segirezza ed ina tgira cun responsabladad en il center minimal chantunal per requirentas e requirents d'asil

sessiun: 28.08.2015
La strategia dal chantun Grischun en il sectur d'asil è quella d'ina collocaziun che dependa da la procedura. El maina sco alloschis collectivs in center per l'emprima registraziun, plirs centers da transit ed in center d'expulsiun. Per tut quests centers è garantida la tgira durant l'entira emna. Las collavuraturas ed ils collavuraturs dals alloschis collectivs procuran per in manaschi senza disturbis entaifer ils alloschis sco er envers la vischinanza.

Sper quai maina il chantun in center minimal, nua ch'el collochescha transitoricamain ed independentamain da la procedura umans ch'èn sa deportads en moda violenta u che n'han betg respectà las reglas en ils alloschis collectivs. En il center minimal è la tgira limitada ad ina dimensiun minimalissima. Tenor il concept da l'uffizi da migraziun e da dretg civil è quai ina controlla da preschientscha quotidiana, durant la quala vegn pajà ora il supplement da mangiar.

Sco center minimal vegn duvrà l'abitadi da containers da la Waldau sper Landquart. Sch'ils alloschis collectivs èn memia plains, dovra il UMDC l'abitadi da containers ultra da quai provisoricamain sco center d'expulsiun. Pervia da l'infrastructura fitg rudimentara è er en quest cas pussaivla mo ina tgira minimala. Dapi ch'il chantun maina il center minimal da la Waldau, datti adina puspè incidents: incendis, acts da violenza tranter ils abitants, cuntelladas. Il punct tragic il pli bass da questa seria d'incidents è il mazzament dal mars 2013.

Ch'il chantun desista d'ina tgira ed assistenza sco tala gist tar persunas u tar umans violents, che han mussà en ils centers in cumportament er en auters puncts pauc agreabel, è problematic or dal puntg da vista da l'etica da responsabladad, or da l'optica da la segirezza dals abitants sezs sco er da la vischinanza. Ina dumonda en scrit tar 14 auters chantuns ha mussà che quels renunzian – en cas da cas problematics – a structuras spezialas, mantegnan per gronda part l'intensitad da tgira e prefereschan autras mesiras per sancziunar ils agitaturs. La gronda part dals chantuns collochescha quels en in auter center tgirà, quai che neutralisescha savens ils conflicts tranter ils abitants.

En il sectur d'asil e d'execuziun ha il chantun Grischun pudì far regularmain grondas cunfinaziuns transitoricas (retenziuns) ils ultims onns, sto però duvrar quests daners en moda liada ad in intent specific en il sectur d'asil. La libertad finanziala per schliar il problem è pia avant maun. Las sutsegnadras ed ils sutsegnaders incumbenseschan perquai la regenza da midar il concept da collocaziun e da tgira en il sectur d'asil suandantamain en questa dumonda:

1. En il center minimal chantunal sto vegnir mantegnida ina tgira ed in'assistenza che minimescha il privel da cuntraversas violentas e che augmenta la segirezza da las abitantas e dals abitants sco er da la vischinanza.

2. Ils centers minimals chantunals porschan ina infrastructura che pussibilitescha ina tgira permanenta. Gist er per il cas d'ina midada d'utilisaziun provisorica.

3. Sche la realisaziun dals emprims dus puncts chaschuna custs memia gronds al chantun Grischun, renunzia el a structuras spezialas per persunas renitentas. En il tractament da requirentas e da requirents d'asil che sa deportan en moda renitenta s'orientescha el vi da la pratica d'auters chantuns che n'han naginas structuras spezialas.

Cuira, ils 28 d'avust 2015

Perl, Märchy-Caduff, Hardegger, Albertin, Atanes, Baselgia-Brunner, Bucher-Brini, Cahenzli-Philipp, Casanova (Glion), Caviezel (Cuira), Darms-Landolt, Deplazes, Gartmann-Albin, Geisseler, Holzinger-Loretz, Jaag, Kunfermann, Locher Benguerel, Monigatti, Niggli-Mathis (Grüsch), Noi-Togni, Peyer, Pult, Schneider, Thöny, Tomaschett-Berther (Trun), von Ballmoos, Zanetti (Landquart), Degiacomi, Engler (Surava), Föhn, Gugelmann, Tuor

Resposta da la regenza

En il Grischun vegnan fugitivas e fugitivs collocads collectivamain, fin ch'igl è vegnì decidì davart lur dretg da restar definitiv u mumentan e fin ch'ellas ed els pon procurar per sasezs e per lur confamigliars almain en il rom d'ina independenza finanziala parziala. Suenter l'attribuziun tras la confederaziun vegnan las persunas dals fatgs d'asil collocadas per in pèr mais en il center per l'emprima registraziun ed alura repartidas sin ils centers da transit. Requirentas e requirents d'asil refusads che dumondan agid d'urgenza e che n'adempleschan betg lur obligaziun da bandunar facultativamain la Svizra vegnan collocads en il center da partenza (CEP) Flüeli. Questas persunas ston bandunar la Svizra immediatamain e survegnan mo l'agid d'urgenza. Talas persunas che dattan ultra da quai en egl en moda spezialmain negativa e che han la tendenza d'esser violentas pon vegnir collocadas per in tschert temp en il center minimal Waldau (CEM) a Landquart. Pervia da las relaziuns da plazza mumentanas en ils centers da transit ha il CEM stuì vegnir manà ils ultims mais duas giadas a curta vista sco uschenumnada structura da timeout. Quai vul dir ch'er requirents d'asil renitents èn vegnids spustads nà là or dals centers da transit. I sto anc vegnir punctuà ch'i na vegnan attribuidas naginas dunnas al CEM.

Tar il punct 1
Il CEM a Landquart stat en ina tscherta distanza tar ils vischins ed uschenavant che quai è enconuschent n'è la segirezza da las abitantas e dals abitants dals bains immobigliars vischins mai vegnida tangada fin ussa da ses manaschi. Ultra da quai vegnan tuttas attribuziuns annunziadas immediatamain al post da polizia da Landquart che garantescha ina pli gronda preschientscha da la polizia al lieu. La tgira en il CEM vegn fatga da las collavuraturas e dals collavuraturs dal CEP Flüeli. Durant la midada d'utilisaziun temporara han las collavuraturas ed ils collavuraturs d'assistenza dal CEP lavurà pli savens a Landquart. La cussegliaziun per il return stat adina a disposiziun a questas persunas cun cussegls e cun sustegn. La cuntanschibladad da las collavuraturas e dals collavuraturs d'assistenza è garantida durant 24 uras grazia ad in servetsch da pichet. Ils abitants dal CEM vegnan mintgamai infurmads ch'els possian sa drizzar en cas da dumondas e da problems persunals e/u da la sanadad a las collavuraturas ed als collavuraturs d'assistenza ch'èn preschents durant ils lavurdis u a las referendarias e referendaris da l'uffizi da migraziun e da dretg civil (UMDC). Praticamain mintgina da questas persunas posseda almain in telefonin e po perquai s'annunziar independentamain tar la polizia u telefonar als auters numers d'urgenza. Tuttina vegn anc installà supplementarmain in attatg da telefon fix. Tenor l'experientscha passentan las persunas assegnadas il di (e savens er la notg) ordaifer las structuras ed èn da rar d'inscuntrar là – cun excepziun dal pajament dals daners da sustegn. I n'è betg da supponer che la preschientscha permanenta da persunal d'assistenza midass insatge vi da quest fatg. D'occupar raschunaivlamain questas persunas n'è betg realistic e – tut tenor il stadi da la procedura – er exclus per motivs giuridics. In'eventuala concepziun da programs dal di en furma d'occupaziun/da divertiment n'è ni en il senn dal segiurn illegal ni da l'intent prendì en mira cun la furma da collocaziun ordinada (timeout). Per quests motivs na reduciss ina preschientscha permanenta da persunas d'assistenza strusch il privel da confruntaziuns e na fiss er betg proporziunala.

Tar il punct 2
L'utilisaziun è vegnida midada provisoricamain l'onn 2014 pervia d'in augment andetg da las dumondas d'asil sco mesira d'urgenza e sco consequenza da las bleras persunas ch'èn vegnidas assegnadas da nov al chantun Grischun. Il UMDC ha duvrà in tschert temp per metter ad ir novas structuras per collocar requirentas e requirents d'asil. Dapi che las persunas che ston bandunar la Svizra han puspè pudì vegnir transferidas a Valzeina en il CEP il matg 2015, è il CEM stà occupà mo per stgars quatter dis. En il fratemp han las novas assegnaziuns constantamain autas pudì vegnir dumagnadas mo cun prender en locaziun alloschis provisorics. Ina nova midada d'utilisaziun dal CEP n'è actualmain betg previsa ed er betg necessaria, sto dentant restar resalvada sco mesira d'urgenza absoluta. La concepziun da las localitads, tant en il CEP sco er en il CEM, ha per regla ina impurtanza subordinada per las abitantas ed ils abitants, e mintgatant vegnan ils indrizs donnegiads aposta.

Tar il punct 3
Il fatg è ch'in tschert dumber da las persunas che vegnan assistidas na respecta betg las reglas prescrittas. Perquai exista in basegn d'in sistem da sancziunament adequat. La pretensiun da desister da la structura speziala per renitents na sa drizzass betg sco ultim cunter la gronda maioritad da requirentas e da requirents d'asil en ils centers che sa cumporta bain e che respecta las reglas. Persunas renitentas smanàtschan e/u èn impertinentas e/u violentas ed èn savens surproporziunalmain agressivas e dispostas a la violenza. Ellas chaschunan savens tema ed anguscha, ma betg en ina dimensiun che pudess vegnir sancziunada da la giustia. Tuttina disturban ellas massivamain in manaschi ordinari en il center d'asil. Sche tut las mesiras main severas sco discurs, admoniziuns, sancziuns en furma d'ina reducziun da las prestaziuns da sustegn u la translocaziun en auters centers èn exauridas e na mussan nagin effect, sto ina distgargia temporara dals ulteriurs requirents d'asil e da las persunas d'assistenza pudair vegnir garantida. Cun in segiurn da durada limitada en il CEM, cun ina limitaziun da l'attenziun tras l'assistenza, po savens vegnir cuntanschì che la persuna pertutgada mida ses cumportament u reflectescha la situaziun persunala.

Per ils motivs menziunads refusa la regenza l'incumbensa.

28 d'october 2015