historic RhB è vegnì fundà l'onn 2003 sco federaziun da tetg per coordinar e per represchentar ils giavischs ed ils interess da sis uniuns che han ina colliaziun tematica cun la Viafier retica. En historic RhB èn unids circa 1000 commembras e commembers da tut il mund. Sin basa voluntara ha la federaziun rimnà gia circa 4 milliuns francs svizzers e restaurà numerus vaguns istorics e diversas locomotivas istoricas ch'èn per gronda part puspè vegnids regalads a la Viafier retica.
render attent a ses giavischs ed a sias finamiras ha la federaziun publitgà durant ils ultims onns 13 ediziuns da la revista "Die Bündner Kulturbahn" ch'èn vegnidas elavuradas sin basa d'uffizi d'onur. Questas revistas èn vegnidas tramessas en tut il mund en in dumber da var in mez milliun exemplars. Uschia ha historic RhB resp. las uniuns che fan part da tal prestà ina lavur turistica ordvart preziusa. Tuttina n'ha la politica grischuna fin ussa prendì nagina notizia da las activitads da la federaziun.
En quest connex sa tschentan las suandantas dumondas:
1. Ha la regenza grischuna enconuschientscha da historic RhB e da sias activitads?
2. Tge pussaivladads vesa la regenza per che historic RhB possia preschentar sias visiuns turisticas?
Cuira, ils 28 d'avust 2015
Stiffler (Tavau Plaz), Holzinger-Loretz, Bondolfi, Aebli, Atanes, Baselgia-Brunner, Bleiker, Brandenburger, Bucher-Brini, Buchli-Mannhart, Campell, Caviezel (Cuira), Clalüna, Danuser, Della Vedova, Engler (Tavau Vitg), Fasani, Felix (Haldenstein), Felix (Scuol), Florin-Caluori, Giacomelli, Grass, Gunzinger, Hug, Jeker, Jenny, Koch (Tumein), Kollegger, Komminoth-Elmer, Lamprecht, Lorez-Meuli, Mani-Heldstab, Märchy-Caduff, Mathis, Michael (Donat), Monigatti, Müller, Nay, Niggli-Mathis (Grüsch), Noi-Togni, Papa, Paterlini, Pedrini, Peyer, Pult, Steiger, Stiffler (Cuira), Tenchio, Thomann-Frank, Tomaschett-Berther (Trun), Toutsch, Waidacher, Weber, Widmer-Spreiter, Wieland, Degiacomi, Engler (Surava), Gugelmann, Nicolay
Resposta da la regenza
1. La regenza enconuscha l'uniun da tetg "historic RhB" cun sias instituziuns e resguarda sias activitads sco fitg preziusas. L'uniun consista da las suandantas instituziuns: uniun "Club 1889", uniun "Amis da locomotivas a vapur VR", uniun "Pro chars-salun VR", uniun "Amis da las viafiers a binari stretg", uniun "Club da la viafier da l'Alvra", cuminanza d'interess Zügen/Landwasser e fundaziun "Museum da viafier Alvra". Ses intent è quel da mantegnair, da restaurar e da metter ad ir sco er da preschentar e da tegnair en funcziun vehichels istorics da la Viafier retica (VR). La collecziun da vehichels istorics da la VR ha ina gronda represchentativitad en quai che concerna las funcziuns, ma er areguard l'istorgia sociala ed economica da la viafier e cumpiglia locomotivas fitg impurtantas da vapur e d'electricitad, chars a motor, chars da persunas e vaguns da martganzia. Ils ultims onns ha "historic RhB" fatg la revisiun da numerus vehichels e mantegnì uschia parts d'in bain cultural impurtant dal chantun Grischun.
Cun il magasin "Die Bündner Kulturbahn" che vegn edì mintga onn e che vegn distribuì en trens istorics, en trens rapids da la VR ed a las staziuns da la VR cuntanscha "historic RhB" ultra da quai in public internaziunal.
Dapi l'onn 1997 ha il chantun deliberà repetidamain contribuziuns considerablas a favur da las lavurs da reparatura e da restauraziun da locomotivas e da vaguns istorics da la VR. Ils ultims onns èn er vegnidas pajadas contribuziuns a favur da projects da l'elavuraziun e da l'intermediaziun dals bains culturals mobils, uschia er a favur da la construcziun d'ina halla a Samedan per vehichels istorics da la VR.
2. Las visiuns turisticas da "historic RhB" duain vegnir preschentadas d'avantatg sur la VR ch'è ina ferma marca turistica en il chantun Grischun. L'uniun da tetg "historic RhB" cumplettescha optimalmain questa marca e procura cun sias purschidas per ina valurisaziun supplementara. Cun ina stretga collavuraziun pon la VR e "historic RhB" profitar da las raits vicendaivlas.
La VR sustegna gia oz "historic RhB" tar la distribuziun dal magasin "Die Bündner Kulturbahn" sur ils agens lieus da vendita, cun exponer quel en ils trens, en collavuraziun cun partenaris da distribuziun naziunals ed internaziunals sco er a differentas fieras. Ella paja er ina contribuziun als custs da producziun. Ultra da quai vegnan impundids meds finanzials considerabels per commerzialisar ils trens spezials da la VR.
La regenza beneventa questa stretga collavuraziun tranter la VR e "historic RhB" ed exprima sia speranza che "historic RhB" possia preschentar vinavant pli fitg sias visiuns turisticas.
14 d'october 2015