La speculaziun cun materias primas agraras e cun victualias vala sco problematica. Ins po partir dal fatg ch'ella è almain cunresponsabla per ils augments dal pretsch che dattan en egl ils ultims onns. A questa conclusiun arrivan er studis da la banca mundiala davart la crisa da victualias da l'onn 2008.
Augments dal pretsch da victualias tutgan il pli fitg ils umans povers en ils pajais dal sid, perquai ch'els ston duvrar la part la pli gronda da lur entradas per victualias. Perquai èsi difficil da chapir ch'en ils pajais ritgs dal nord vegnan fatgas adina dapli investiziuns en bains agrars tras bancas, assicuranzas, fonds d'investiziun e cassas da pensiun. In scumond u almain ina restricziun da la speculaziun cun victualias fiss cunvegnent, sco ch'i pretenda l'iniziativa da GiuvnAs socialistAs (GS).
Igl è impurtant da far la differenza tranter speculaziun ed autras activitads finanzialas sco garanzia u investiziun. L'idea oriunda da las bursas da materias primas era quella da segirar ils pretschs dals acturs e da reducir las ristgas d'investiziuns. En ils Stadis unids ed en Europa vegn fatga questa differenza e quest agir è suttamess a reglas correspundentas. Er la concessiun da credits ad interpresas en il sectur da las materias primas agraras na vegn betg resguardada sco speculaziun. En quest reguard exista ina intschertezza en la debatta publica en Svizra.
En quest connex supplitgan las sutsegnadras ed ils sutsegnaders la regenza da respunder las suandantas dumondas:
1. Porscha la banca chantunala grischuna derivats agrars speculativs sco tals che sa refereschan a victualias u a materias primas agraras e che na servan ni a garantir in commerzi real ni a finanziar la producziun u il commerzi?
a) Sche gea: Quant gronda è la part dals derivats agrars vi da las investiziuns totalas da la facultad e tge materias primas agraras èn pertutgadas concretamain?
b) Sche na: Renunzia la banca chantunala sapientivamain a talas investiziuns?
2. Investescha la cassa da pensiun dal Grischun en derivats agrars en il rom da sias investiziuns da facultad?
a) Sche gea: Quant gronda è la part dals derivats agrars vi da las investiziuns totalas da la facultad e tge materias primas agraras èn pertutgadas concretamain?
b) Sche na: Renunzia la cassa da pensiun chantunala sapientivamain a talas investiziuns?
3. Tge posiziun ha la regenza envers la critica menziunada davart la speculaziun cun victualias sin l'entir mund e davart sias consequenzas?
4. È la regenza da l'opiniun che instituziuns da cassas da pensiun e bancas dal maun public stuessan renunziar ad investiziuns en derivats agrars pervia da questa critica? Sche na: Tge giustifitgescha talas investiziuns?
Cuira, ils 20 d'october 2015
Thöny, Cahenzli-Philipp (Vaz sut), Baselgia-Brunner, Bucher-Brini, Caviezel (Cuira), Deplazes, Gartmann-Albin, Hardegger, Jaag, Kunfermann, Locher Benguerel, Monigatti, Noi-Togni, Perl, Pfenninger, Pult, von Ballmoos, Antognini, Degiacomi, Tanner
Resposta da la regenza
Quest tema è l'object da l'iniziativa federala dal pievel pendenta «Nagina speculaziun cun nutriment!». Il cussegl federal ed il parlament recumondan al pievel da refusar l'iniziativa dal pievel senza cuntraproposta. Il pievel svizzer vegn a votar davart quest project ils 28 da favrer 2016.
Respostas a las dumondas:
1. Na, la banca chantunala grischuna (BCG) n'offrescha nagins derivats agrars. Resalvads èn giavischs spezials da clientas e clients. La BCG renunzia sapientivamain ad ina tala purschida, perquai che investiziuns en derivats agrars n'èn betg cumpatibels cun ils princips da diversificaziun da la BCG.
2. Na, la cassa da pensiun dal Grischun (CPGR) n'investescha betg directamain en materias primas. I n'è però betg d'excluder ch'i vegn investì sur investiziuns indirectas en aczias (sco fonds d'index favuraivels) en interpresas ch'èn da lur vart activas en il commerzi cun materias primas. Il resultat d'ina analisa da la CPGR è stà quel ch'i na po betg vegnir fatg quint a lunga vista cun ina rendita interessanta cun investir en materias primas sco p.ex. derivats agrars. Il medem mument giuditgescha ella la diversificaziun da talas investiziuns sco memia pitschna, per che tala possia tuttina giustifitgar ina investiziun. Perquai renunzia la CPGR sapientivamain ad investiziuns en materias primas.
3. La regenza sustegna il giavisch da meglierar il provediment da nutriment per la populaziun da pajais da svilup e da cumbatter cunter la povradad. Las iniziantas ed ils iniziants da l'iniziativa dal pievel «Nagina speculaziun cun nutriment!» supponan che las fluctuaziuns dals pretschs da bains agrars èn vegnids chaschunadas decisivamain d'affars speculativs sin ils martgads da rauba a termin. En sia refusa da l'iniziativa dal pievel è il cussegl federal percunter da l'avis che auters motivs èn responsabels per quai: Primo demussan las datas disponiblas ed ils studis avant maun che betg la speculaziun, mabain auters facturs (p.ex. effectivs dal deposit istoricamain bass, eveniments da l'aura disfavuraivels sco setgiras e scheliras sco er mesiras politicas da differents pajais d'export resp. d'import) èn stads responsabels per ils augments dals pretschs tar victualias ils ultims onns. In scumond da la speculaziun n'impediss pia betg pretschs auts da victualias. Secundo n'han mesiras che vegnan prendidas mo en Svizra u schizunt mo en il Grischun strusch ina influenza sin ils process sin ils martgads da rauba internaziunals a termin. Quels sa chattan per gronda part a l'exteriur. Terzio fiss l'acceptaziun da l'iniziativa colliada cun ina perdita da plazzas da lavur, da valurisaziun e d'entradas fiscalas en Svizra. Ella augmentass anc ina giada la malsegirezza pertutgant il svilup da las cundiziuns generalas economicas en Svizra ed avess in effect da signal negativ per l'entira Svizra sco lieu economic.
La regenza è da l'avis che l'argumentaziun dal cussegl federal saja correcta e chapaivla. Ulteriuras malsegirezzas ed in indebliment da la Svizra sco lieu economic n'èn betg en l'interess dal chantun. La regenza resguarda las activitads da la confederaziun en differentas organisaziuns internaziunalas (sco p.ex. l'Organisaziun mundiala da commerzi WTO u l'Organisaziun da las Naziuns Unidas per l'alimentaziun e l'agricultura FAO) ed en la cooperaziun svizra al svilup per pli cunvegnentas ch'in scumond da products finanzials.
4. La BCG e la CPGR na dovran sapientivamain nagins derivats agrars. La renunzia pretendida per quests instruments finanzials è pia obsoleta.
3 da december 2015