Sut la noziun «eHealth» vegnan subsummads tut ils servetschs da sanadad electronics. Grazia a meds auxiliars electronics vegnan qua tras meglierads ils process ed oravant tut colliadas meglier ina cun l'autra tut las parts participadas.
Er en ils fatgs da sanadad daventa l'era digitala adina pli impurtanta. Bleras datas sa chattan oz anc sin palpiri, ina part exista gia en furma electronica, ma n'è anc betg standardisada suffizientamain. Ed er quests sistems n'èn strusch colliads in cun l'auter. Process sustegnids da la TI gidan tut las parts participadas ad ademplir lur incumbensas. La finamira suprema è quella d'augmentar permanentamain la qualitad e la segirezza en ils fatgs da sanadad e da stabilisar ils custs.
Malgrà premissas tecnicas ed organisatoricas fitg bunas ha la Svizra – en la cumparegliaziun internaziunala – in retard tar ils fatgs da sanadad electronics («eHealth»). Il cussegl naziunal (189:5) ed il cussegl dals chantuns (45:0) han deliberà ils 19 da zercladur 2015 en la votaziun finala la lescha federala davart il dossier electronic dal pazient (LDElP). En quest connex è vegnida fixada ina finanziaziun da partenza en l'autezza da 30 milliuns francs. Quai però mo, sche terzas persunas u/e il chantun sa participeschan a la finanziaziun.
Per profitar da la finanziaziun da partenza e per pudair lantschar in project «eHealth» exista en singuls chantuns il basegn d'adattar il dretg vertent. Uschia per exempel en la lescha da sanadad, ma er en eventualas leschas davart la protecziun da datas. Adattaziuns en la lescha da sanadad pon per exempel daventar necessarias, sch'il chantun sa decida da surpigliar ina rolla activa tar la promoziun dal provediment da la sanadad da sia populaziun, che sa basa sin eHealth, e sch'i ston vegnir mess a disposiziun meds finanzials per quai. Las leschas chantunalas davart la protecziun da datas ston vegnir examinadas pertutgant la dumonda, sch'ellas permettan il barat electronic da datas entaifer il chantun, ma er tranter las regiuns da provediment.
Fin ussa n'èn vegnidas fatgas naginas stentas en questa direcziun en il chantun Grischun. Il svilup dals process electronics na sa lascha betg franar. Singulas parts participadas vi dals fatgs da sanadad vegnan adina ad introducir applicaziuns novas. Igl è chaussa da la societad e da la politica da definir ad ura la dimensiun da la strategia dad «eHealth». Las applicaziuns duain sa drizzar tenor ils giavischs da las parts participadas. Perquai che la finanziaziun da partenza è limitada, sa tschentan actualmain las suandantas dumondas:
1. È er la regenza da l'opiniun ch'i sa tracta en connex cun «eHealth» d'in project che na po betg vegnir franà e ch'è da gronda impurtanza er per il chantun Grischun?
2. Vesa la regenza in basegn d'agir tar las leschas numnadas? Sche gea, è la regenza pronta da far las adattaziuns necessarias e da preschentar las leschas al cussegl grond?
3. A tge conclusiuns arriva l'analisa generala da la regenza?
Cuira, ils 21 d'october 2015
Koch (Igis), Gunzinger, Hardegger, Bleiker, Blumenthal, Brandenburger, Bucher-Brini, Buchli-Mannhart, Caduff, Cahenzli-Philipp (Vaz sut), Caviezel (Tavau Clavadel), Clavadetscher, Danuser, Darms-Landolt, Deplazes, Engler, Gartmann-Albin, Giacomelli, Heiz, Hitz-Rusch, Holzinger-Loretz, Hug, Kasper, Kunz (Cuira), Lamprecht, Lorez-Meuli, Mathis, Nay, Niggli-Mathis (Grüsch), Papa, Pedrini, Salis, Steck-Rauch, Thomann-Frank, Toutsch, Troncana-Sauer, Valär, Widmer-Spreiter, Wieland, Antognini, Sgier
Resposta da la regenza
La lescha federala davart il dossier electronic dal pazient (LDElP), deliberada ils 19 da zercladur 2015 da l'assamblea federala, fixescha las premissas giuridicas, tenor las qualas las datas medicinalas ch'èn cuntegnidas en il dossier electronic dal pazient dastgan vegnir elavuradas. En il dossier electronic dal pazient vegnan las datas ed ils documents ch'èn relevants per l'ulteriur tractament e per il tractament posteriur, rendids accessibels ad autras persunas spezialisadas dal sectur da sanadad.
Tras la midada da l'art. 39 LAMal ch'è vegnida fatga pervia da l'art 25 LDElP èn ospitals e chasas da tgira admess da nov ad activitads sin donn e cust da l'assicuranza obligàtorica per la tgira da persunas malsaunas mo, sch'els fan part d'ina communitad certifitgada u d'ina communitad da tschep che metta a disposiziun la basa structurala ed organisatorica per il barat da datas (administraziun dals dretgs d'access, da l'identificaziun d'access e.u.v.). Per persunas spezialisadas dal sectur da sanadad che lavuran en il sectur ambulant èsi facultativ da sa participar al dossier electronic dal pazient. Tenor la disposiziun transitorica tar la midada da la LAMal ston ils ospitals far part d'ina communitad certifitgada u d'ina communitad da tschep entaifer 3 onns suenter l'entrada en vigur da la midada, chasas da tgira entaifer 5 onns suenter l'entrada en vigur da la midada.
Las pazientas ed ils pazients decidan, sch'els vulan in dossier electronic dal pazient u betg. Invista da las datas han mo quellas persunas spezialisadas dal sectur da sanadad che han survegnì ils dretgs d'access correspundents da lur pazientas e pazients.
Perquai che la participaziun al dossier electronic dal pazient è facultativa per persunas che lavuran en il sectur ambulant, è il niz dal dossier electronic dal pazient restrenschì.
Concernent la realisaziun da la LDElP en il chantun Grischun sa preschenta la situaziun sco suonda:
Per mesemna, ils 27 da schaner 2016, è planisada la radunanza constitutiva da l'uniun purtadra "eHealth sidost". Da questa uniun duain pudair far part tut ils furniturs da prestaziuns staziunaras ed ambulantas en ils chantuns Grischun e Glaruna sco er en il principadi da Liechtenstein. En l'emprim quartal da l'onn 2016 duain vegnir fatgas sur l'uniun purtadra in'evaluaziun ed ina submissiun per ina soluziun da provider respectivamain per ina plattafurma dad eHealth. Previs èsi che l'uniun purtadra è mo l'incumbensadra per l'installaziun e per la gestiun d'ina plattafurma dad eHealth e na maina betg sezza tala. Il departament da giustia, segirezza e sanadad prevesa da far part da l'uniun sco commember passiv.
La regenza respunda las dumondas sco suonda:
1. Gea, grazia al levgiament da la collavuraziun tranter ils furniturs da prestaziuns ambulantas ed ils furniturs da prestaziuns staziunaras regiunalas e centralas gida eHealth a meglierar la qualitad e la segirezza sco er l'effizienza da tractaments medicinals. Pervia d'ina collavuraziun pli facila tranter l'ospital dal center ed ils ospitals regiunals gida eHealth er a mantegnair il provediment da la sanadad decentral. La premissa è ch'in grond dumber da la populaziun grischuna sa decidia per in dossier electronic dal pazient.
2. En il Grischun na datti nagin basegn d'agir per adattar la legislaziun, perquai che eHealth po vegnir realisà er senza in'adattaziun.
3. L'introducziun a temp util dal dossier electronic dal pazient en il Grischun è sin buna via.
28 da december 2015