Navigaziun principala

Cuntegn da la pagina

Dumonda Caduff concernent la realisaziun da la lescha davart la planisaziun dal territori en il chantun Grischun

Sessiun: 09.12.2015

Il mars 2013 è la revisiun parziala da la lescha davart la planisaziun dal territori vegnida acceptada dal pievel. Tenor ina communicaziun da l'uffizi federal da planisaziun da l'onn 2013 vegnan persequitadas las suandantas finamiras cun la revisiun:

 

«Cun realisar la revisiun da la LPT duai principalmain il svilup da l'abitadi vegnir manà vers l'intern: abitadis duain vegnir realisads en il futur pli savens che fin ussa en territoris surbajegiads e bain accessibels. Ultra da quai ston potenzials dal svilup a l'intern vegnir mobilisads pli fitg, per exempel cun ina concentraziun u cun ina revitalisaziun da territoris industrials nunutilisads. Zonas da construcziun surdimensiunadas ston vegnir reducidas e zonas da construcziun ston vegnir spustadas en lieus, nua ch'ellas vegnan duvradas.


En il futur na duai la grondezza da las zonas da construcziun da princip betg pli vegnir mesirada per vischnanca, mabain per chantun tenor las prescripziuns dal dretg federal. Per zonas d'abitar, zonas maschadadas e zonas dal center, ch'èn circa 70 pertschient da tut las zonas da construcziun, vegn perquai definida ina mesira («utilisaziun chantunala») che fixescha, cura ch'il total da questas zonas en il chantun è memia grond. Entaifer il nov rom èn ils chantuns libers da far prescripziuns a las vischnancas ed a las regiuns.


Las zonas da construcziun en il chantun n'èn alura betg surdimensiunadas, sch'ellas vegnan duvradas per las abitantas ed ils abitants e per las persunas occupadas, cun las qualas i sto vegnir fatg quint en 15 onns (utilisaziun da 100 pertschient). Sche l'occupaziun vegn sutpassada minimalmain, duain enzonaziuns restar pussaivlas, sch'ina surfatscha da la medema grondezza vegn dezonada u sche quai è garantì en in'autra moda tras il dretg da planisaziun. En cas d'ina utilisaziun da main che 95 pertschient sto il total da las zonas da construcziun vegnir reducì. Sche las zonas da construcziun èn utilisadas per dapli che 100 pertschient, inditgescha quai in potenzial d'enzonaziun per il chantun.»

 

Sa referind a questas explicaziuns supplitgeschan las sutsegnadras ed ils sutsegnaders la regenza da respunder las suandantas dumondas:

 

1. Tge utilisaziun totala han las zonas da construcziun dal chantun Grischun?

 

2. Tenor il dretg federal ston zonas da construcziun surdimensiunadas vegnir reducidas e spustadas en lieus, nua ch'ellas vegnan duvradas. Dispona il chantun Grischun d'ina survista che inditgescha nua ch'i dat zonas da construcziun surdimensiunadas e nua che enzonaziuns ston vegnir fatgas?

 

3. Co fa la regenza quint da reglar il spustament da zonas da construcziun tranter las vischnancas e co duai vegnir fatga la cumpensaziun (definiziun da «reglas da gieu» per dezonaziuns e per midadas da zona sco er per gulivar la plivalur)?
Èsi previs da spustar resp. da gulivar zonas da construcziun entaifer l'entir chantun u po la regenza s'imaginar da restrenscher il spustament entaifer las regiuns?

 

4. La LPT revedida fixescha ch'il total da las zonas da construcziun na dastga betg vegnir engrondì fin ch'ils plans directivs chantunals, che ston vegnir adattads, èn approvads. La revisiun da l'ordinaziun davart la planisaziun dal territori prevesa per questa perioda da princip ina cumpensaziun en la medema grondezza per tut las zonas da construcziun.
a) Per cura fa la regenza quint ch'il plan directiv chantunal vegnia approvà dal cussegl federal?
b) Tge mesiras planisescha la regenza per pussibilitar in svilup economic en quellas vischnancas che han memia pauc terren da mastergn e/u d'industria fin ch'il nov plan directiv entra en vigur?

 

Cuira, ils 9 da december 2015

 

Caduff, Michael (Donat), Kunz (Cuira), Aebli, Albertin, Alig, Berther (Mustér), Blumenthal, Brandenburger, Buchli-Mannhart, Caluori, Casanova (Glion), Casty, Casutt-Derungs, Cavegn, Crameri, Danuser, Darms-Landolt, Davaz, Della Vedova, Deplazes, Dosch, Engler, Fasani, Felix (Haldenstein), Florin-Caluori, Foffa, Geisseler, Giacomelli, Grass, Hardegger, Hartmann, Holzinger-Loretz, Joos, Koch (Tumein), Komminoth-Elmer, Kunfermann, Lorez-Meuli, Märchy-Caduff, Mathis, Nay, Niederer, Niggli-Mathis (Grüsch), Papa, Pedrini, Salis, Sax, Schutz, Stiffler (Tavau Plaz), Tenchio, Thomann-Frank, Tomaschett (Breil), Troncana-Sauer, Vetsch (Claustra Vitg), von Ballmoos, Waidacher, Weber, Wieland, Zanetti, Andri, Berther (Segnas), Föhn, Natter, Spreiter, Tuor

Resposta da la regenza

Tar la dumonda 1:
Per il 1. da matg 2014 (data da l'entrada en vigur da la revisiun da la lescha federala davart la planisaziun dal territori, LPT) eran las zonas da construcziun en il Grischun exauridas a 96,3 %. Quai sin basa dal scenari demografic maximalmain admissibel. Questa valur, che la confederaziun ha designà dacurt sco plausibla, vul enconuschentamain dir ch'enzonaziuns da zonas d'abitar, da zonas maschadadas e da zonas dal center (ZAMC) na ston betg mo vegnir cumpensadas ussa durant la fasa transitorica fin a l'approvaziun dal plan directiv chantunal (PDChant) "Abitadi", mabain er suenter sia approvaziun.

Tar la dumonda 2:
Ils suandants documents èn vegnids elavurads per l'entir chantun:

1. In fegl da datas ch'infurmescha, tge vischnancas che han presumtivamain memia paucas ZAMC, ZAMC che han gist las dretgas dimensiuns u ZAMC memia grondas. Questas supposiziuns sa basan sin las capacitads en las zonas da construcziun sin fundament da las planisaziuns localas valaivlas (surfatschas betg surbajegiadas u cleramain sututilisadas) sco er sin fundament dal svilup demografic, cun il qual ins sto quintar tenor il scenari demografic maximalmain admissibel. Las supposiziuns ston vegnir verifitgadas tras las vischnancas, e lura suonda in'attribuziun definitiva.

2. Ina retschertga da surfatschas ZAMC >1 hectara ch'èn giuridicamain bain zonas da construcziun, ma che n'èn betg surbajegiablas (p.ex. surfatschas betg surbajegiablas pervia d'utilisaziuns gia transferidas). Questas surfatschas "engrevgeschan" nunnecessariamain l'exauriziun en l'entir chantun, e quai en ina dimensiun da ca. 30 hectaras.

3. Ina retschertga dals potenzials da dezonaziun areguard surfatschas ZAMC coerentas >0,3 hectaras che sa chattan principalmain a l'ur dals abitadis, che n'èn betg surbajegiadas e che pertutgan vischnancas cun ZAMC ch'èn presumtivamain memia grondas tenor il fegl da datas (cifra 1). En quest reguard è vegnì eruì in potenzial da circa 83 hectaras.

4. Ina retschertga da las surfatschas da zonas da construcziun che han reservas da surfatschas d'auzada, che sa chattan en lieus bain accessibels e ch'èn adattadas per augments dal grad d'utilisaziun resp. per densificaziuns posteriuras.

Tar la dumonda 3:
Ils documents elavurads mussan ch'il Grischun ha ZAMC memia grondas guardà sur l'entir chantun e che las reservas existentas n'èn betg situadas là, nua ch'ellas fissan giavischadas sin fundament da las prognosas demograficas, numnadamain en ils spazis da svilup dinamics, nua ch'i vegn spetgà in grond augment d'abitantas ed abitants e da plazzas da lavur. La situaziun da partenza pretenda che las reservas existentas da zonas da construcziun vegnian per part transferidas davent dals territoris cun in svilup demografic negativ en territoris ed en lieus pli dinamics.

La concepziun d'in mecanissem da transferiment e da cumpensaziun correspundent è ina gronda nova sfida per tut las parts participadas ed è l'object dal PDChant "Abitadi" ch'è actualmain en elavuraziun. Las soluziuns e las mesiras planisadas vegnan preschentadas e rendidas accessiblas a la discussiun publica en il rom da l'exposiziun da cooperaziun ch'è previsa la stad u l'atun 2016.

Tar la dumonda 4:
La regenza spera ch'il PDChant "Abitadi" saja approvà la fin da l'onn 2017 u il cumenzament da l'onn 2018. Per la stad u per l'atun 2016 è – sco menziunà – planisada l'exposiziun publica da cooperaziun.

Gia la stad 2013 èn las vischnancas vegnidas orientadas davart l'obligaziun da cumpensaziun per enzonaziuns durant la fasa transitorica fin a l'approvaziun dal PDChant. Tras quai che questa infurmaziun ha gì lieu gia baud, han diversas regiuns pudì stgaffir zonas da mastergn supplementaras anc avant il 1. da matg 2014. Ultra da quai han gia pudì vegnir dezonadas dapi il 1. da matg 2014 en l'entir chantun intginas zonas da construcziun, independentamain da cumpensaziuns. Uschia è sa furmada ina reserva chantunala da cumpensaziun che stat a disposiziun per cumpensar – tenor tscherts criteris – enzonaziuns raschunaivlas en las regiuns, per exempel per projects che genereschan plazzas da lavur.

4 da mars 2016