Colonnas da fugitivs permanentamain grondas muntan ina sfida speziala per tut l'Europa. La serrada da l'uschenumnada "ruta dal Balcan" sur la Tirchia en direcziun da l'Europa dal nordvest chaschuna eventualmain in spustament dal moviment dals fugitivs vers la "ruta da la Mar mediterrana". Quai lascha spetgar che las dumondas d'asil en Svizra s'augmentian. Cun quai è colliada l'incumbensa er per il chantun Grischun da prender si e d'integrar in dumber pli grond da fugitivas e fugitivs. Ina integraziun cun success po vegnir realisada betg sco ultim er cun cumenzar in'activitad da gudogn e cun vegnir integrà persistentamain en il martgà da lavur.

Ultra da las premissas persunalas savens difficilas (sco p.ex. la sanadad, chargias supplementaras psicosocialas) e da las differenzas socioculturalas engrevgeschan persistentamain enconuschientschas linguisticas insuffizientas, ina scolaziun professiunala formala pitschna resp. nagina scolaziun professiunala formala, pauca experientscha professiunala e la mancanza d'ina rait sociala a fugitivas ed a fugitivs renconuschids sco er a persunas ch'èn admessas provisoricamain da cumenzar in'activitad da gudogn. Ultra da quai na dependa ina integraziun professiunala cun success betg mo da las caracteristicas da la persuna che tschertga ina plazza, mabain er da la capacitad e da la prontezza da recepziun sco er da las caracteristicas dal martgà da lavur. Quel è sa midà en Svizra ils ultims onns uschia che adina dapli activitads simplas e repetitivas svaneschan e che la part d'occupaziuns pretensiusas cun pretensiuns correspundentas envers la qualificaziun creschan ad in crescher.

En il program da la regenza 2017–2020 vegni tegni quint da la situaziun da migràziun actuala e la finamira strategica vegn formulada en il rom dal champ d'acziun 6: "... rinforzar e promover la pussaivladad d'integrar en il process da lavur persunas estras che tschertgan ina plazza e migrantas e migrants qualifitgads." "... Las migrantas ed ils migrants ston vegnir obligads da prestar ina cumprova activa e clera a favur da lur integraziun."

La procedura d'asil è reglada sin plaun federal, correspundentamain n'ha la regenza nagina influenza sin la dumonda, quant svelt che las decisiuns d'asil da la confederàziun èn avant maun. Las stentas integrativas che sa chattan en il sectur da cumpetenzas dal chantun resp. da las vischnancas vegnan realisadas tenor il concept per promover l'integraziun da fugitivas e fugitivs renconuschids sco er da persunas admessas provisoricamain ch'è vegnì deliberà da la regenza ils 19 da matg 2009.

Al post spezialisà per l'integraziun da l'uffizi da migraziun e da dretg civil è vegnida surdada la responsabladad tant da manar e da coordinar las purschidas d'integraziun sco er d'exequir la direcziun operativa da l'acquisiziun da la lingua fin a l'integraziun professiunala sco er da coordinar e da garantir la circulaziun da las infurmaziuns tranter ils posts participads. Il process d'integraziun da fugitivas e da fugitivs renconuschids ch'èn admess provisoricamain sco er da persunas ch'èn admessas provisoricamain vegn fatg tenor in process definì e sa basa sin plans da mesiras fixads individualmain che suondan il princip "promover e pretender". La finamira da la purschìda da curs da lingua che tegna quint da las differentas premissas da furmaziun è quella da meglierar las cumpetenzas linguisticas en vista ad ina promoziun d'ina integraziun professiunala svelta. Cun il sustegn da jobcoachs scolads vegnan persunas adattadas ed ablas da lavurar intermediadas activamain en praticums da 3 fin 6 mais en las branschas las pli differentas, nua ch'ellas pon s'acquistar experientschas professiunalas sin il martgà da lavur e nua ch'ellas pon prender ina decisiun davart ina carriera professiunala cun cumenzar ina tscherta activitad da gudogn. Ils puncts da contact tranter il post spezialisà per l'integraziun e l'intermediaziun da lavur èn vegnidas examinadas da nov l'avrigl 2016 per guardar sch'in potenzial d'optimaziun fiss avant maun. Uschenumnads emprendissadis preliminars duain vegnir purschids pli savens ed i vegnan elavurads standards correspundents per exempel concernent las premissas da vart da la persuna che duai vegnir intermediada, concernent las prestaziuns dal patrun, concernent l'accumpagnament necessari e concernent ils salaris minimals. Gist l'ultim è en general impurtant areguard eventuals engaschaments da lavur: la salarisaziun usitada al lieu sto vegnir garantida er en cas da questa gruppa da persunas.

Ultra da l'agir orientà a process e d'ina buna collavuraziun e d'in entretschament cun l'economia èn en spezial la politica dal martgà da lavur liberala en il chantun, ina procedura da permissiun efficazia sco er in'applicaziun generusa da praticums elements centrals per che questa gruppa da persunas possia vegnir integrada cun success en il martgà da lavur.

En il chantun sa chatta la quota d'activitad da gudogn da fugitivas e da fugitivs e da persunas admessas provisoricamain cleramain sur la media da la Svizra. La regenza declera quai er cun il proceder ch'è vegnì tschernì cun il concept d'integraziun. Ella vegn a mantegnair quel, examinar ulteriuras mesiras e simplificaziuns nua che quai è pussaivel e depositar ils giavischs er tar ils posts federals cumpetents, uschenavant ch'els na sa chattan betg en il champ d'influenza direct dal chantun (p.ex. areguard impediments administrativs existents, concernent la renconuschientscha da diploms esters e concernent la validaziun da prestaziuns da furmaziun e chaussas sumegliantas). Vitiers vegnan las mesiras skizzadas en il rom dals puncts centrals da svilup 11/23 e 12/24, uschenavant ch'ellas concernan fugitivas e fugitivs e persunas admessas provisoricamain. En quest rom general duain p.ex. vegnir examinadas er ulteriuras pussaivladads d'occupaziun u in access pli simpel a fufragnadis.

La regenza è pronta da cuntinuar cun las stentas vertentas e d'acceptar questa incumbensa da fracziun en quest senn.

4 da matg 2016