L'impurtanza d'occurrenzas da sport per la valurisaziun turistica directa, per l'effect publicistic e per l'economia regiunala è incontestada. En il rom da la debatta dal rapport davart il svilup economic (missiva carnet nr. 8 / 2014–2015) ha il cussegl grond fixà sco direcziuns per promover occurrenzas: "Promoziun intenziunada pli ferma d'occurrenzas grondas da sport" sco er "Prender en mira la realisaziun d'occurrenzas correspundentas da disciplinas da sport da stad per augmentar la valurisaziun turistica". En il rom da la debatta davart la revisiun totala da la lescha per promover il svilup economic en il chantun Grischun (LSE) ha il cussegl grond francà pia er en la lescha la promoziun d'occurrenzas (art. 23 LSE). Tenor l'ordinaziun per il svilup economic (OSE) pon vegnir concedidas contribuziuns ad occurrenzas en il Grischun, sche quellas auzan la valurisaziun turistica, han ina impurtanza surregiunala, demussan potenzial da svilup, correspundan a la strategia da destinaziun, integreschan la marca «graubünden» en il concept da communicaziun da l'organisatur e sche las atgnas prestaziuns da l'organisatur e las contribuziuns da terzas persunas èn exauridas (art. 20 OSE). En cas d'occurrenzas che han lieu mintga onn duai la promoziun vegnir fatga en il senn d'ina finanziaziun da partenza. Las directivas parlamentaras concretiseschan la concessiun da contribuziuns ad occurrenzas da differentas categorias.

Las dumondas tschentadas respunda la regenza sco suonda:

1. Occurrenzas sco ch'ellas vegnan menziunadas en l'incumbensa sco exempels, èn da gronda impurtanza areguard la preschientscha da las medias, areguard l'effect publicistic sco er areguard ils effects da valurisaziun directs ed indirects e perquai elements centrals da bleras strategias da destinaziun. Ellas han ina influenza directa sin il svilup da l'economia da turissem.

2. Il chantun ha augmentà il volumen da contribuziuns ad occurrenzas tranter ils onns 2012 e 2015 da 0,355 milliuns francs/onn (2012) sin 0,5 milliuns francs/onn 2015 (senza las contribuziuns al campiunadi mundial da skis a San Murezzan 2017). Sin basa da las contribuziuns gia concedidas e planisadas ad occurrenzas vegni fatg quint cun pajaments da circa 0,6 milliuns francs per l'onn 2016. Quest augment è stà pussaivel mo grazia a respargns en auters secturs dal svilup economic. In ulteriur transferiment da meds finanzials n'è betg pussaivel, perquai ch'ils meds da las grondas posiziuns da contribuziun sco la nova politica regiunala da la confederaziun (NPR) u dals credits d'impegn che stattan a disposiziun na pon betg vegnir duvrads per cofinanziar occurrenzas. Tenor il plan da finanzas 2017-2020 n'è perquai er betg previs in augment substanzial.

3. I valan las premissas numnadas en las basas legalas. L'autezza maximala da la contribuziun per occurrenza è vegnida auzada per il 1. da schaner 2016 per differentas categorias d'occurrenzas. Prestaziuns da contribuziuns tenor la LSE pon vegnir colliadas cun la cundiziun da duvrar la marca regiunala «graubünden». Questa preschientscha da la marca pretendida eventualmain dal chantun na chaschuna però betg in conflict cun sponsurs externs.

4. Tar la promoziun d'occurrenzas tenor la LSE sa tracti d'ina finanziaziun restanta. Las atgnas prestaziuns da l'organisatur e las contribuziuns da terzas varts ston esser exauridas (art. 20 al. 1 lit. f OSE). La repartiziun en contribuziuns fixas ed en contribuziuns al deficit vegn fatga sin basa da las directivas vertentas ed en il cas singul da l'instanza chantunala ch'è cumpetenta tenor il dretg da finanzas. Ni la lescha da finanzas ni la legislaziun speziala na prevesan ina pussaivladad per il chantun da pajar contribuziuns per furmar reservas per occurrenzas futuras. Grazia a la garanzia da contribuziuns al deficit po la ristga da custs betg cuvrids che resultan d'expensas betg calculablas u da la mancanza da retgavs vegnir minimisada per ils organisaturs. Ils meds finanzials che stattan a disposiziun e ch'èn limitads ston vegnir duvrads en moda uschè effizienta sco pussaivel. Ina reducziun da las contribuziuns al deficit a favur da contribuziuns fixas pli autas n'è perquai betg raschunaivla or da l'optica da la regenza.

5. Tenor las basas da promoziun vertentas vala il suandant per metter a quint las atgnas prestaziuns nunfinanzialas (prestaziuns materialas): "Ils custs imputabels da l'occurrenza ston consister per almain 80 % da prestaziuns finanzialas, quai vul dir ch'i vegnan resguardadas maximalmain 20 % prestaziuns materialas sco custs imputabels." Ina participaziun finanziala da la vischnanca da staziunament e/u da la destinaziun turistica sco er contribuziuns da terzas varts vegnan spetgadas. D'ina vart èn ellas in indicatur per l'impurtanza da l'occurrenza e da l'autra vart resulta la valurisaziun directa per regla principalmain per il lieu u per la regiun. Metter generalmain a quint dal tuttafatg las atgnas prestaziuns na prevesa la regenza betg. L'imputaziun da las atgnas prestaziuns duai er en l'avegnir depender da la relaziun tranter las prestaziuns finanzialas e las prestaziuns materialas dals custs imputabels da l'occurrenza.

 27 d'avrigl 2016