Navigaziun principala

Cuntegn da la pagina

Incumbensa Pfenninger concernent l'adattaziun da la finanziaziun da la spitex

sessiun: 17.02.2016

"Ambulant avant staziunar" è in princip che vegn bler cità en la tgira da persunas malsaunas e da vegliadetgna. En il model directiv actual pertutgant la vegliadetgna empermetta la regenza da realisar consequentamain il princip da la politica da sanadad "ambulant avant staziunar", cun crear las cundiziuns generalas necessarias per quai. Deplorablamain sa mussi adina pli fitg che las cundiziuns generalas actualas pertutgant la gestiun e la finanziaziun da la spitex cuntrafan a questa bella intenziun. Las resalvas en connex cun l'introducziun da la finanziaziun da la spitex ch'è oz valaivla (lescha per promover la tgira da persunas malsaunas) sa conferman deplorablamain. Pli e pli sa sviluppa ina spirala negativa che chaschuna che – tenor ils preventivs da l'onn 2016 – vegnan probablmain mo pli 7 da 19 organisaziuns da la spitex ad avair suffizientamain meds finanzials grazia a las contribuziuns legalas tenor la LAMal sco er grazia a las contribuziuns dal chantun e da las vischnancas. Las 12 organisaziuns restantas èn dependentas da contribuziuns supplementaras da las vischnancas, per pudair cuvrir lur deficits restants. La finanziaziun che vegn schliada actualmain cun ina calculaziun da las contribuziuns che sa basa sin ina valur media dals manaschis uscheditgs economics na po betg satisfar a lunga vista a las grondas differenzas ed a las particularitads da las differentas zonas da provediment. D'agiuntar èsi che per calcular questa valur media na vegnan betg resguardads ils manaschis ils pli chars, percunter ils pli favuraivels, che profitan eventualmain da cundiziuns generalas tut spezialas (topografia, extensiun, vischinanza dal cunfin).

 

Las organisaziuns da la spitex constateschan ultra da quai ch'i daventa pli e pli difficil da chattar persunal qualifitgà. Quai ha bleras raschuns. Ina part essenziala da questas raschuns è che per tschertgar persunal stat la spitex en ina concurrenza directa cun auters purschiders dals fatgs da sanadad e che pervia dal sistem da finanziaziun actual è ella mo pli limitadamain abla da concurrer sin il champ da las cundiziuns d'engaschament. La finanziaziun da la spitex stat plinavant en in stretg connex cun dumondas fundamentalas da la finanziaziun da la tgira e cun il basegn da scleriment correspundent tenor l'incumbensa Della Vedova (finanziaziun da las chasas da dimora).

 

Per segirar a lunga vista la finanziaziun da las prestaziuns da la spitex supplitgain nus la regenza da reveder la lescha chantunala per promover la tgira da persunas malsaunas e l'ordinaziun appartegnenta. En quest connex pon ins s'imaginar tant in'adattaziun da la basa da calculaziun actuala sco er ina calculaziun cumplettamain nova p.ex. per abitant e per zona da provediment.

 

Finamira: Garantir las cundiziuns generalas che permettan a las organisaziuns da la spitex da correspunder a las differentas aspectativas da la populaziun, da la politica e d'autras instituziuns dals fatgs da sanadad.

 

Senza adattar la finanziaziun na vegni en il futur betg ad esser pussaivel d'ademplir il princip "ambulant avant staziunar", da cuvrir la dimensiun creschenta da las prestaziuns e da satisfar a la cumplexitad pli e pli gronda dals cas.

 

Cuira, ils 17 da favrer 2016

 

Pfenninger, Della Vedova, Niggli-Mathis (Grüsch), Aebli, Albertin, Atanes, Baselgia-Brunner, Bleiker, Bondolfi, Bucher-Brini, Burkhardt, Cahenzli-Philipp (Vaz sut), Casanova (Glion), Casty, Caviezel (Cuira), Clalüna, Clavadetscher, Danuser, Darms-Landolt, Deplazes, Dosch, Florin-Caluori, Gartmann-Albin, Jaag, Jeker, Joos, Kollegger, Komminoth-Elmer, Kunfermann, Lamprecht, Locher Benguerel, Lorez-Meuli, Märchy-Caduff, Marti, Michael (Donat), Monigatti, Nay, Niederer, Niggli (Samedan), Noi-Togni, Papa, Pedrini, Perl, Peyer, Pult, Salis, Sax, Stiffler (Tavau Plaz), Tenchio, Thomann-Frank, Thöny, Tomaschett-Berther (Trun), Widmer-Spreiter, Wieland, Buchli, Cahenzli (Trin Mulin), Stäbler, Tuor

Resposta da la regenza

Ils 13 da zercladur 2007 ha il cussegl grond approvà ina revisiun parziala da la lescha per promover la tgira da persunas malsaunas e pia decidì d'extender la nova orientaziun strategica sin ils servetschs da la spitex e sin las chasas da tgira. Questa nova orientaziun strategica ha previs da pajar las contribuziuns en il sectur da la sanadad dal Grischun tenor las prestaziuns. La contribuziun dal chantun als servetschs subvenziunabels da la tgira ed assistenza a chasa è vegnida fixada a 55 % dals custs betg cuvrids per categoria da prestaziun, premess ch'ils servetschs vegnian furnids en moda economica.

Cuntrari a las explicaziuns en l'incumbensa n'ha questa nova regulaziun da finanziaziun betg chaschunà ina spirala negativa ed è da princip sa cumprovada ord vista da la regenza. Ils custs renconuschids dals servetschs cun ina incarica da prestaziun communala èn s'augmentads en cas da prestaziuns da tgira da 77.50 francs per ura l'onn 2008 a 96.40 francs l'onn 2016, en cas da prestaziuns da tegnairchasa da 65.20 francs a 74.80 francs per ura ed en cas dal servetsch da pasts da 18.30 francs a 21.90 francs per past. Correspundentamain è sa meglierà il grad mesaun da la cuvrida dals custs da las organisaziuns da la spitex tenor la finanziaziun ordinaria da 93,9 % l'onn 2008 a 100,7 % l'onn 2014.

En il rapport davart la finanziaziun dals ospitals e da la tgira en il chantun Grischun dal 1. da mars 2016 ha la regenza explitgà tge mancanzas ch'existan – ord ses puntg da vista – en il sectur da la finanziaziun da la tgira e tge mesiras ch'ella ha prendì en mira per eliminar questas mancanzas en cas ch'il cussegl grond vul cuntinuar cun la regulaziun vertenta da la finanziaziun dals ospitals e da la tgira. Las mancanzas e las mesiras sa refereschan bain al sectur da la tgira, ellas valan dentant, sch'ellas vegnan adattadas, er per il sectur da la spitex. Cun concepir las mesiras vegn ins ultra da quai a stuair examinar, sche e per quant ch'ils criteris menziunads (topografia, extensiun e vischinanza dal cunfin) ston vegnir integrads en l'adattaziun da la regulaziun da finanziaziun.

La regenza è pronta d'acceptar l'incumbensa en il senn da las explicaziuns menziunadas qua survart.

20 d’avrigl 2016