Navigation

Inhaltsbereich

Incumbensa Degiacomi concernent in dretg da precumpra da las vischnancas tar la vendita da bains immobigliars e d'edifizis dal chantun

Sessiun: 20.04.2016

Tenor il dretg vertent van bains immobigliars ed edifizis – ch'il chantun po vender senza sminuir l'adempliment d'ina incumbensa publica – a la facultad finanziala. Là vegnan els bilantschads per la valur da martgà. Almain mintga 10 onns vegnan els valitads per la valur dal di da la bilantschaziun.

 

Per vender tals bains immobigliars ed edifizis applitgescha il chantun per regla proceduras da concurrenza cun l'intent da generar uschè bleras entradas sco pussaivel. La renunzia a talas entradas è – tenor l'art. 47 da l'ordinaziun da finanzas dal chantun Grischun – il medem sco in'expensa. Per renunziar a las entradas en connex cun ina vendita da bains immobigliars e d'edifizis da la facultad finanziala manca al chantun ina basa giuridica. Quai restrenscha las pussaivladads d'agir dal chantun en il rom da la vendita ed è in dischavantatg per las vischnancas.

 

Per pudair far ina politica da terren autonoma ston las vischnancas da staziunament avair in pled relevant en chapitel areguard l'utilisaziun futura da bains immobigliars e d'edifizis chantunals che vegnan vendids. Proceduras da concurrenza che han mo la finamira da realisar per il chantun in retgav uschè grond sco pussaivel, pon star en cuntradicziun cun ils interess da la vischnanca e da la populaziun. Ellas cuntegnan il privel da stgaffir objects da speculaziun e surpassan las pussaivladads finanzialas dal maun public sin plaun communal.

 

Quai è ina situaziun nuncuntentaivla per las vischnancas. Las sutsegnadras ed ils sutsegnaders incumbenseschan perquai la regenza da stgaffir las basas giuridicas necessarias per conceder a las vischnancas da staziunament pertutgadas in dretg da precumpra tar la vendita da bains immobigliars e d'edifizis dal chantun. En quest connex duai il pretsch da vendita s'orientar a la valur da martgà bilantschada en la facultad finanziala. Per chattar ina soluziun che cuntenta tut las varts vegn la regenza incumbensada da preschentar differentas variantas d'in tal dretg da precumpra.

 

Cuira, ils 20 d'avrigl 2016

 

Degiacomi, Marti, Casanova (Glion), Albertin, Alig, Atanes, Baselgia-Brunner, Bucher-Brini, Burkhardt, Cahenzli-Philipp, Caluori, Casty, Casutt-Derungs, Caviezel (Cuira), Caviezel (Tavau Clavadel), Darms-Landolt, Della Vedova, Deplazes, Dosch, Epp, Felix (Scuol), Florin-Caluori, Gartmann-Albin, Holzinger-Loretz, Hug, Jaag, Jeker, Jenny, Kappeler, Kasper, Koch (Tumein), Kollegger, Mani-Heldstab, Märchy-Caduff, Michael (Castasegna), Müller, Nay, Niederer, Noi-Togni, Papa, Pedrini, Perl, Peyer, Pfenninger, Pult, Salis, Sax, Steiger, Thomann-Frank, Thöny, Troncana-Sauer, Vetsch (Claustra Vitg), von Ballmoos, Weber, Widmer-Spreiter, Cao, Pfister, Sigron, Tuor

Resposta da la regenza

Per sviluppar il territori en moda duraivla areguard l'utilisaziun, la concepziun e l'avertura dovri ina planisaziun prospectiva ed activa, e quai applitgond tut ils instruments da la planisaziun dal territori che stattan a disposiziun en il rom da la lescha chantunala davart la planisaziun dal territori. La cumpetenza respectiva han originarmain las vischnancas. Las vischnancas e las vischnancas burgaisas èn ultra da quai las pli grondas possessuras da terren en il chantun Grischun. Ellas èn las purtadras da la politica funsila e da la politica da terren da construcziun. Ina politica da terren activa stat pia mo en in connex marginal cun l'acquist da bains immobigliars tras las vischnancas. Medemamain na dependa la qualitad da surbajegiadas betg dals pretschs d'immobiglias, mabain da las prescripziuns ch'èn cuntegnidas en la planisaziun ed en lescha da construcziun da las vischnancas.

Il chantun posseda la gronda part da sias immobiglias en la facultad administrativa. Sch'ina valur da facultad na vegn permanentamain betg pli duvrada per ademplir ina incumbensa publica, la transferescha la regenza – en cumpetenza definitiva – en la facultad finanziala (art. 2 al. 3 da la lescha da finanzas dal chantun Grischun [LFC; DG 710.100]). La decisiun d'alienar la facultad finanziala tutga medemamain tar la cumpetenza definitiva da la regenza (art. 34 al. 1 LFC).

Las immobiglias da la facultad finanziala dal chantun ch'èn vegnidas alienadas ils ultims 10 onns mussan ch'i sa tractava en quest connex principalmain d'edifizis e da stabiliments ordaifer la zona da construcziun. Immobiglias d'in grond interess chantunal na vegnan da princip betg vendidas, mabain messas a disposiziun en il dretg da construcziun. La valur da martgà bilantschada inditgescha en quest connex ina situaziun mumentana dal passà che sa basa sin supposiziuns calculatoricas. La "vaira" valur dal martgà po vegnir eruida pir sin basa d'offertas concretas. Quella po lura esser pli auta, ma er pli bassa che la valur da facultad bilantschada. Sche las vischnancas suttamettan in'offerta da cumpra, survegnan ellas gia oz la pussaivladad d'acquistar l'immobiglia per il pretsch da la terza persuna, pia per la valur da martgà effectiva. Mo "vairas" valurs da martgà procuran per la transparenza necessaria.

En connex cun la realisaziun dal center administrativ "sinergia" e dal nov stabiliment giudizial Realta vegnan singulas immobiglias a vegnir alienadas (vendita u dretg da construcziun). Ellas èn tuttas situadas sin il territori communal da la citad da Cuira e sa chattan en zonas da construcziun. Sche las immobiglias vegnissan engrevgiadas cun in dretg da precumpra communal per la valur da bilantscha dal di da la bilantschaziun ("valur da martgà" tenor la bilantscha), signifitgass quai in spustament da la facultad finanziala chantunala en direcziun da las vischnancas e favurisass oravant tut la citad da Cuira. In dretg da precumpra violass uschia facticamain er il princip dal tractament egual, perquai che mo ina fitg pitschna part da las vischnancas pudess profitar d'in tal. La concessiun d'in dretg da precumpra per immobiglias da la facultad finanziala dal chantun premettess ultra da quai in dretg reciproc, pia in dretg da precumpra per il chantun sut las medemas cundiziuns. Cas cuntrari vegniss dischavantagià il chantun e vegnissan favurisadas las vischnancas, uschia ch'i vegnissan spustads avantatgs finanzials en direcziun da las vischnancas. Sche las immobiglias dal chantun vegnissan engrevgiadas cun dretgs da precumpra da las vischnancas, e sch'ils pretschs na correspundessan betg a la valur da martgà, vegniss restrenschida nunnecessariamain la libertad d'agir dal chantun e da las vischnancas.

Betg pertutgads da l'incumbensa n'èn ils bains immobigliars acquistads sin basa da la nova lescha per promover il svilup economic en il chantun Grischun (lescha davart il svilup economic, LSE; DG 932.100). Quels restan en la facultad administrativa fin a la vendita. Da dar er a quests bains immobigliars in dretg da precumpra communal cuntrafaschess a la finamira da la promoziun da l'economia. Ils bains immobigliars destinads a la promoziun dal svilup economic èn savens en possess da las vischnancas e da las vischnancas burgaisas, ch'èn medemamain suttamessas a la LFC (art. 1 al. 3 ed al. 4).

La regenza na vesa nagin basegn d'agir per elavurar supplementarmain adattaziuns da leschas en il senn da l'incumbensa. La pratica vertenta è sa cumprovada. L'incumbensa na fiss er betg in instrument adattà per evitar eventuals objects da speculaziun. A las vischnancas vegn facticamain concedì gia oz in dretg da precumpra tar la vendita da bains immobigliars e d'edifizis per valurs da martgà. En quest senn propona la regenza da refusar l'intervenziun.

22 da zercladur 2016