Navigaziun principala

Cuntegn da la pagina

Incumbensa Epp concernent l'examinaziun d'ina desinenza ".graubuenden" sco "top level domain" (TLD) per il chantun Grischun

sessiun: 02.09.2016

Ozendi datti uschenumnadas "top level domains", vul dir domenas d'emprim nivel, sco per exempel ".com", u ".net" u desinenzas per pajais sco per exempel ".ch" u ".de". Questas desinenzas standard n'èn però betg illimitadas. Insacura èn numnadamain occupadas tut las cumbinaziuns che pon vegnir tegnidas endament facilmain e possessurs futurs da paginas d'internet stuessan guntgir a variaziuns absurdas u schizunt surrealas. Quai n'è betg ina soluziun ideala, cunzunt betg per interpresas. Perquai ch'ina buna adressa d'internet po savens esser decisiva per il success economic.

 

L'organisaziun ICANN (internet corporation for assigned names and numbers) ch'è responsabla per il sistem d'adressas d'internet ha realisà quest problem ed ha augmentà la purschida l'onn 2012. Uschia pon ins dumandar ina nova desinenza tar il post d'emissiun internaziunal per adressas web ICANN. Quai ha tranter auter er fatg l'uffizi federal da communicaziun (UFCOM). Uschia è vegnida creada ed introducida l'onn 2015 la domena d'emprim nivel ".swiss". Emprimas experientschas mussan che la nova desinenza d'adressa ".swiss" correspunda ad in basegn. Var 30 000 dumondas èn gia vegnidas inoltradas dapi che questa domena d'emprim nivel è vegnida lantschada. Sco emprim chantun vegn ussa il chantun Turitg a lantschar la primavaira 2017 la desinenza da domena ".zuerich" (NZZ da la mesemna, 27-7-2016, p. 6).

 

In grond avantatg d'ina nova desinenza da domena d'emprim nivel è quel ch'in num d'ina domena ch'è gia occupà po puspè vegnir registrà. Ultra da quai s'avran per interpresas e per organisaziuns, sco per exempel per uniuns turisticas, novas pussaivladads en la creaziun da la marca.

 

Cun ina nova domena d'emprim nivel ".graubuenden" duai tranter auter vegnir rinforzà il grad d'enconuschientscha dal Grischun sco lieu economic. Ultra da quai datti firmas che vulan forsa represchentar pli gugent il chantun empè dal pajais. Las firmas e las uniuns che s'interessan per ina tala desinenza, stuessan avair lur domicil en il chantun Grischun. Uschia demonstreschan talas interpresas er lur proximitad cun la patria e lur attaschadadad cun noss chantun. Per la gestiun e per l'attribuziun da domenas tras il chantun Grischun dovri cun gronda probabilitad er ina basa legala che stuess alura anc vegnir elavurada.

 

Las sutsegnadras ed ils sutsegnaders incumbenseschan perquai la regenza:

 

1. d'examinar la creaziun d'ina atgna desinenza da domena d'emprim nivel ".graubuenden" per il chantun Grischun;

 

2. da mussar il niz concret per l'economia publica grischuna.

 

Cuira, ils 2 da settember 2016

 

Epp, Jeker, Engler, Albertin, Alig, Berther (Mustér), Blumenthal, Brandenburger, Buchli-Mannhart, Caduff, Caluori, Casanova (Glion), Casty, Casutt-Derungs, Cavegn, Caviezel (Cuira), Crameri, Darms-Landolt, Della Vedova, Dermont, Dosch, Florin-Caluori, Foffa, Geisseler, Grass, Koch (Tumein), Kollegger, Kunfermann, Lorez-Meuli, Märchy-Caduff, Mathis, Müller, Niederer, Paterlini, Sax, Schneider, Schutz, Thomann-Frank, Tomaschett (Breil), Tomaschett-Berther (Trun), Waidacher, Widmer-Spreiter, Zanetti, Berther (Segnas), Rodigari

Resposta da la regenza

Per matg 2016 devi – tenor differentas funtaunas en l'internet – gia passa 300 milliuns adressas d'internet (domains) registradas sin tut il mund. Il pli savens vegn duvrada en quest connex la "top level domain" (TLD, part d'ina adressa d'internet a dretga dal punct) .com (quasi la mesadad), alura suondan .tk (ca. 26 miu. domains), .cn (ca. 20 miu.), .de (ca. 16 miu.), .net (ca. 15 miu.) sco er .org ed .uk (mintgamai passa 10 miu.). La desinenza .ch vegn duvrada da ca. 2 milliuns adressas d'internet. Actualmain datti ca. 1527 TLD, da quellas ca. 311 TLD specificas per in pajais sco .ch u .de (ccTLD), ca. 30 TLD spezialas sco er ussa ca. 1186 TLD genericas (gTLD). L'emprima gTLD è vegnida concedida da la ICANN ils 23 d'october 2013. Per settember 2016 è la gTLD che vegn duvrada il pli savens .xyz (passa 6 miu. domains), suandada da .top (3,6 miu.) e da .wang e .win (mintgamai ca. 1 miu.).
La creaziun da novs nums generics da paginas d'internet da l'emprim nivel (gTLD) è chaussa da la ICANN. Annunzias ston vegnir inoltradas tar questa societad californica durant las periodas fixadas. L'emprima perioda d'annunzia è stada dal schaner al matg 2012. Passa 1900 annunzias èn entradas. L'annunziader sto cumprovar a la ICANN ch'el haja las capacitads tecnicas, organisatoricas e finanzialas per realisar e per manar ils servetschs da register. Cura che la ICANN avra la proxima fanestra d'annunzia n'è anc betg decidì. Quai pudess bain il pli baud esser il cas l'onn 2020 ed eventualmain mo per marcas.

L'uffizi federal da communicaziun (UFCOM) è sa segirà la gTLD .swiss. Uschia vul la confederaziun defender ils interess da la Svizra ed impedir che terzas persunas maldovran u monopoliseschan la designaziun geografica "Svizra". Il basegn da proteger .swiss saja grond, perquai che la vesaivladad, la valur e la reputaziun da la Svizra e da sias instituziuns èn colliadas cun quai en reguard economic, cultural e geografic. Ina registraziun d'ina pagina d'internet cun la desinenza .swiss po vegnir dumandada tar la confederaziun dapi l'atun 2015. Fin il settember 2016 èn vegnidas registradas passa 15 000 paginas d'internet.
Tenor l'UFCOM è in'annunzia tar la ICANN colliada cun gronds custs. La taxa d'annunzia e la redacziun dal dossier che cumpiglia tschients da paginas custan plirs tschientmillis francs. Vitiers vegnan ils custs da persunal en la dimensiun da circa 200 pertschient da plazzas. Per la gestiun da la domain sto vegnir fatg quint cun custs periodics annuals d'in pèr tschientmillis francs. Il chantun Turitg che ha cumprà la gTLD .zuerich ha budgetà l'onn 2012 per l'annunzia 314 000 francs e per la gestiun annuala 130 000 francs, e però senza resguardar ils custs da persunal interns.

La plivalur d'ina gTLD .graubuenden è dispitaivla. La desinenza è bler memia lunga ed ha ultra da quai anc in diftong. En vista a la plurilinguitad n'è ella betg adattada, uschia ch'igl existiss ina relaziun pli stretga plitgunsch cun la marca "graubünden". Las persunas responsablas da la marca "graubünden" han gia examinà questa dumonda. Els na vesan nagin effect, mabain gronds custs. Tar la gTLD .swiss saja quai auter – là possia vegnir communitgada la "swissness". Però na sa preschentan actualmain strusch interpresas cun la gTLD .swiss. Las adressas .swiss na vegnan savens betg duvradas en moda activa e mainan en il vid u a las paginas d'internet cun la desinenza da fin ussa .ch.
Las novas gTLD porschan ultra da quai alternativas gia ussa applitgablas per .graubuenden, sco per exempel .swiss, .travel, .reisen, .bike, .restaurant e bleras autras. Tar la circumstanza che questas paginas d'internet porschan bain in meglier effect vegn anc vitiers la circumstanza temporara ch'ina gTLD .graubuenden pudess vegnir introducida – sche insumma – il pli baud en 5 fin 7 onns.
La domain graubuenden.swiss è vegnida registrada da las persunas responsablas per la marca, ma ella na vegn betg duvrada en la communicaziun. I vegn svià a graubuenden.ch. Il chantun è dal rest londervi a sa segirar er la domain gr.swiss – quai n'è actualmain anc betg pussaivel.

En las maschinas da retschertga na vegnan las gTLD betg tractadas autramain che autras TLD. Pia na datti ni avantatgs ni dischavantatgs tar il plazzament en ils resultats d'ina tschertga. Ils dus avantatgs ils pli gronds da las novas desinenzas da paginas d'internet èn quels che blers nums da paginas d'internet gia occupads pon puspè vegnir registrads e ch'i s'avran per bleras interpresas novas pussaivladads per etablir la marca. Uschia pon novas domains vegnir duvradas per intents da marketing che svieschan alura, sch'ellas vegnan tschertgadas, a la domain veglia.

Per quests motivs na para l'examinaziun d'acquistar la gTLD .graubuenden betg raschunaivla, perquai ch'il resultat da l'examinaziun è gia enconuschent per ils puncts caracteristics principals. En vista a l'effect restrenschì n'èsi per la regenza betg giustifitgà d'impunder uschè blera lavur en chaussa.

La regenza propona perquai da refusar l'incumbensa.

21 d'october 2016