Navigation

Inhaltsbereich

Sessiun: 19.10.2016

Innovaziun è ina da las premissas las pli impurtantas, sche betg la premissa la pli impurtanta per interpresas che han success. Quai vala spezialmain per il turissem grischun che dependa fermamain d'innovaziuns, perquai ch'el sa chatta en conturns cumpetitivs ed è suttamess a las cundiziuns generalas svizras. Innovaziun tar interpresas dovra tranter auter l'existenza d'indrizs scientifics productivs e d'ina infrastructura respectiva. La vischinanza da la scienza e da l'economia è il facturclav per accelerar l'innovaziun.

 

L'innovaziun en l'entir sistem dal turissem ston ils furniturs da prestaziuns turisticas realisar en las destinaziuns ed en singuls lieus, e quai cun sustegn da las instituziuns publicas (uffizis, scolas autas).

 

Concepts ed ideas per innovaziuns turisticas èn bain avant maun. Tge che manca però è la vischinanza sco er in barat simpel dals acturs privats cun la scienza. Actualmain manca in center da cumpetenza per il turissem en il chantun sin nivel d'ina scola auta sco partenari da "sparring" dals acturs turistics per sviluppar ideas ensemen cun umans da differents secturs e per verifitgar novs concepts.

 

En il rapport tar la strategia da scola auta e da perscrutaziun definescha la regenza quels temas scientifics, a la promoziun dals quals la regenza vul sa concentrar e per ils quals ella vul impunder ses meds finanzials da promoziun (ils uschenumnads champs da profil). In tema central da la strategia da scola auta e da perscrutaziun da la regenza – ed uschia in dals sis champs da profil – è il turissem. L'impurtanza dal turissem per l'economia publica en il chantun Grischun giustifitgescha senz'auter quest focus.

 

Pervia da las cumpetenzas e pervia dal know-how ch'èn avant maun sa recumonda la Scola auta da tecnica ed economia (SATE) da Cuira sco center da cumpetenza per il tema central "turissem". La SATE po sa posiziunar en quest sectur sco center da cumpetenza naziunal cun il focus sin il turissem alpin.

 

La strategia da scola auta e da perscrutaziun elavurada da la regenza vegn realisada da las scolas autas e dals instituts da perscrutaziun sur las incaricas da prestaziun. En connex cun la realisaziun pratica stoi tenor la strategia da scola auta e da perscrutaziun vegnir resguardà spezialmain ch'il stadi ageschia directamain sco purtader e sco donatur da contribuziuns en la politica da las scolas autas e dals instituts da perscrutaziun, entant che la creaziun da cundiziuns generalas favuraivlas duai purtar en la politica economica il success sin il martgà; la politica d'innovaziun profitescha però, directamain ed indirectamain, d'ina instrucziun e perscrutaziun prosperaivla, sch'il barat tranter las interpresas e las instituziuns scientificas funcziunescha.

 

Per che quest barat possia avair lieu tranter l'economia privata e la perscrutaziun, duain tut ils acturs turistics dal turissem grischun che vulessan lavurar cun la scienza vi da soluziuns per l'avegnir survegnir in access pli facil a quest center da cumpetenza per il turissem.

 

Perquai incumbenseschan las sutsegnadras ed ils sutsegnaders la regenza d'etablir a la SATE Cuira cun agid d'ina incarica da prestaziun in center da cumpetenza "innovaziun en il turissem". Il center da cumpetenza duai tractar dumondas actualas dal turissem, per exempel concepts innovativs per l'explotaziun da las abitaziuns secundaras, e mussar uschia concepts en collavuraziun cun l'economia privata, sche e co che novs manaschis d'alloschament structurads pon vegnir realisads e co ch'ina valurisaziun po vegnir cuntanschida uschia en noss chantun. La finamira sto esser quella da concentrar e da rinforzar en il chantun l'applicaziun da la perscrutaziun turistica. In tal center da cumpetenza pudess alura er surpigliar incumbensas per expertisas che vegnan ozendi surdadas a biros da cussegliaziun extrachantunals.

 

Cuira, ils 19 d'october 2016

 

Caduff, Engler (Tavau Vitg), Michael (Donat), Albertin, Alig, Atanes, Berther (Mustér), Bleiker, Blumenthal, Bucher-Brini, Caluori, Casty, Casutt-Derungs, Cavegn, Caviezel (Cuira), Darms-Landolt, Deplazes, Dermont, Dosch, Epp, Fasani, Felix (Scuol), Florin-Caluori, Gartmann-Albin, Geisseler, Giacomelli, Grass, Jeker, Kunfermann, Märchy-Caduff, Monigatti, Niederer, Niggli (Samedan), Paterlini, Pult, Sax, Schneider, Stiffler (Tavau Plaz), Thomann-Frank, Tomaschett (Breil), Tomaschett-Berther (Trun), von Ballmoos, Zanetti, Berther (Segnas), Degiacomi, Engler (Surava), Furrer, Gugelmann, Horrer, Nicolay, Pfister, Ruckstuhl, Vassella

Resposta da la regenza

Incontestada è l'impurtanza dal turissem per l'economia publica dal chantun Grischun. Perquai èn sa sviluppadas qua er instituziuns da scolaziun e da perscrutaziun dal turissem renconuschidas sco la scola spezialisada superiura per turissem da l'academia Engiadina, la "Swiss School of Tourism and Hospitality" e la scola auta da tecnica ed economia (SATE Cuira). Questas instituziuns da scolaziun èn s'unidas al Campus turissem Grischun per cooperar sin plaun intrachantunal e per far cuminaivlamain reclama sin plaun naziunal per las scolaziuns per part differentas en ils secturs dal turissem e da la hotellaria.

Cun l'institut per turissem e temp liber (ITT) ha la SATE Cuira ina instituziun da perscrutaziun che correspunda a las pretensiuns envers la perscrutaziun applitgada en il sectur dal turissem sin plaun d'ina scola auta e che porscha er servetschs. Il ITT sa posiziunescha sco center da furmaziun e da cumpetenza innovativ ed interprendider da l'economia da turissem e da temp liber en il territori alpin. Actualmain sa chatta il focus dal ITT sin ils champs tematics «svilup e manaschament d'infrastructuras turisticas», «innovaziun e svilup da products», «transfurmaziun digitala e novs martgads» sco er «svilup da las destinaziuns». Il ITT a la SATE Cuira vesa il svilup turistic sco incumbensa integrala en il context da la cuntrada e dal spazi economic alpin.

– Il champ tematic «svilup e manaschament d'infrastructuras turisticas» cumpiglia concepts d'alloschament per il turissem resguardond las pretensiuns da la situàziun alpina e stagiunala, la planisaziun da l'infrastructura, il svilup da strategias, la finanziaziun e l'investiziun en infrastructuras turisticas, l'economia ed il manaschament d'immobiglias.

– Il sectur «innovaziun e svilup da products» elavura il transfer e l'adattaziun da metodas dal manaschament d'innovaziun per la branscha turistica.

– Cun il champ tematic «transfurmaziun digitala e novs martgads» vegnan perscrutads ils basegns dals giasts e lur cumportament en in conturn digitalisà e formuladas sin basa da quai recumandaziuns d'agir per sviluppar products da singuls furniturs da prestaziuns ed en la rait (per exempel destinaziun). Novs martgads principals internaziunals vegnan analisads e recumandaziuns sco er mesiras per cuntanscher novas gruppas da clients vegnan proponidas.

– Il «svilup da las destinaziuns» è influenzà fermamain dals champs tematics menziunads ordavant e sto ademplir ina funcziun da parantesa. Destinaziuns duain vegnir analisadas e sviluppadas or da questa optica. Vitiers vegnan las dumondas surordinadas da l'urden politic sco la finanziaziun, la direcziun e la governance en destinaziuns.

La finamira generala dal ITT è quella da transferir las enconuschientschas da la perscrutaziun applitgada en projects da servetsch e da cussegliaziun ch'èn pratitgabels e che tegnan quint dals basegns. En quest connex ston vegnir resguardads ils basegns da la branscha e da lur acturs grischuns per ch'il transfer da savida da la scola auta spezialisada a l'economia possia vegnir cuntanschì e per ch'i resultia tut en tut in niz. Er ina profilaziun naziunala sco center da cumpetenza en il sectur dal turissem è vinavant in'opziun.

Cun il ITT ha la SATE Cuira in institut che ha ina direcziun che cuvra gia elements essenzials da l'incumbensa.

La regenza è pronta d'acceptar questa incumbensa. Ella ha l'intent da precisar en quest connex l'incarica da prestaziun 2017–2020 per la SATE Cuira uschia ch'il ITT examinescha pli detagliadamain er la tematica da las abitaziuns secundaras. Qua existan però gia oz cumpetenzas ed i èn gia vegnidas fatgas lavurs da perscrutaziun en chaussa.

21 da december 2016