Navigation

Inhaltsbereich

Sessiun: 19.10.2016

Sin mia dumonda concernent il connex tranter la restricziun dal dretg dals medis da consegnar sezs medicaments e la mancanza da medis da chasa en il chantun ha la regenza respundì il settember 2014 ch'ella resguardia las consequenzas da la restricziun dal dretg dals medis da consegnar sezs medicaments sin il dumber da medis da chasa en il chantun sco plitgunsch minimas. Praticas da medias e da medis da chasa che na chattian nagina successiun sajan per ordinari situadas en territoris, nua che l'autodispensaziun na saja betg restrenschida. Sin basa da l'evaluaziun dal resultat da la consultaziun da l'onn 2010 è la regenza partida dal fatg che l'aboliziun da la restricziun da l'autodispensaziun tras las medias ed ils medis, ch'è reglada en la lescha da sanadad, na chattia betg ina maioritad. Senza incarica dal cussegl grond n'ha la regenza perquai vesì nagins motivs d'al suttametter in sboz per abolir en la lescha da sanadad la restricziun dal dretg dals medis da consegnar sezs medicaments.

 

Questa analisa da la regenza po esser stada correcta l'onn 2014.

 

En il fratemp è la situaziun però daventada pli acuta. Schizunt a Cuira ed ad auters lieus attractivs senza dretg dals medis da consegnar sezs medicaments sa laschan chattar adina main savens regulaziuns per la successiun da medias e da medis che smettan cun lur activitad professiunala per motivs da vegliadetgna. Quai vala er per la tschertga da partenaris per la collavuraziun en praticas cuminaivlas modernas. Sco motiv per quai vegn numnà tranter auter il dretg dals medis da consegnar sezs medicaments (dretg d'autodispensaziun) ch'è restrenschì en il chantun. La pussaivladad da l'autodispensaziun che manca vala sco in dischavantatg da concurrenza considerabel per recrutar medis da chasa en noss chantun.

 

Las sutsegnadras ed ils sutsegnaders incumbenseschan la regenza da sclerir da nov la situaziun concernent l'aboliziun da la restricziun dal dretg dals medis da consegnar sezs medicaments.

 

Cuira, ils 19 d'october 2016

 

Holzinger-Loretz, Geisseler, Niggli-Mathis (Grüsch), Alig, Bleiker, Blumenthal, Buchli-Mannhart, Burkhardt, Caduff, Casty, Caviezel (Tavau Clavadel), Clalüna, Dermont, Dudli, Engler (Tavau Vitg), Fasani, Felix (Haldenstein), Felix (Scuol), Florin-Caluori, Giacomelli, Grass, Hartmann, Heiz, Hitz-Rusch, Jaag, Jenny, Kasper, Koch (Tumein), Kollegger, Kunz (Fläsch), Marti, Mathis, Michael (Donat), Nay, Niederer, Papa, Steck-Rauch, Stiffler (Tavau Plaz), Thomann-Frank, Troncana-Sauer, Valär, Vetsch (Pragg-Jenaz), von Ballmoos, Waidacher, Weber, Weidmann, Widmer-Spreiter, Wieland, Bonderer, Fausch, Furrer, Gugelmann, Loi, Nicolay, Pfister

Resposta da la regenza

Sa basond sin l'evaluaziun da la consultaziun fatga l'onn 2010 è la regenza vegnida a la conclusiun ch'ina aboliziun da la restricziun dal dretg dals medis da consegnar sezs medicaments (autodispensaziun) reglada en la lescha da sanadad n'avess chattà da quella giada nagina maioritad. Perquai ha ella decidì cun il conclus dals 12 d'october 2010 (prot. nr. 888) da renunziar per entant d'elavurar in project da revisiun correspundent per mauns dal cussegl grond. Er en il rom da la missiva tar la revisiun totala da la lescha da sanadad dals 17 da matg 2016 (carnet nr. 4 / 2016 – 2017) ha la regenza desistì da dumandar ina midada da las basas giuridicas correspundentas.

Cun la revisiun da la lescha federala davart ils medicaments ed ils products medicinals (lescha davart ils products terapeutics, LPTer; CS 812.21) acceptada en la sessiun da primavaira 2016 èn las chombras federalas s'exprimidas cunter l'aboliziun da l'art. 24 al. 1 lit. b LPTer previsa en il project dal cussegl federal e cunter il scumond respectiv dal dretg d'autodispensaziun dals medis sin plaun federal. La cumpetenza da reglar l'autodispensaziun resta uschia chaussa dals chantuns.

Actualmain è l'autodispensaziun illimitada admessa en 15 chantuns da la Svizra tudestga. Admessa per part è l'autodispensaziun – ultra dal chantun Grischun – en il chantun Berna. En ils chantuns da la Svizra franzosa sco er en ils chantuns Tessin, Basilea-Citad ed Argovia è l'autodispensaziun percunter admessa mo en cas excepziunals.

Sco che la regenza ha explitgà ils 25 da schaner 2011 (prot. nr 83) en sia resposta a la dumonda da fracziun da la PBD datti plirs motivs per il fatg che adina main medias e medis lavuran sco provediders da basa: Uschia sto vegnir registrà en tut la Svizra in regress da diploms en medischina dapi ch'il numerus clausus è vegnì introducì. Ultra da quai restan medias e medis adina pli savens activs en ils ospitals suror il temp da perfecziunament prescrit. Plinavant vegnan acquistads pli savens titels da medi spezialist empè dal titel sco medi da la medischina generala. E la finala po vegnir constatada ina tendenza creschenta en direcziun d'ina activitad da gudogn a temp parzial – en spezial tar medias.

En sia resposta a la dumonda Holzinger-Loretz concernent il connex tranter la restricziun dal dretg dals medis da consegnar sezs medicaments e la mancanza da medis da chasa en il chantun il settember 2014 ha la regenza respundì tranter auter ch'ella resguardia las consequenzas da la restricziun dal dretg dals medis da consegnar sezs medicaments sin il dumber da medis da chasa en il chantun sco plitgunsch minimas. Praticas da medias e da medis da chasa che na chattan nagina successiun sajan per ordinari situadas en territoris, nua che l'autodispensaziun na saja betg restrenschida.

En l'incumbensa qua avant maun vegni fatg valair da las sutsegnadras e dals sutsegnaders che la mancanza da medis da chasa existia en il fratemp er en lieus, nua ch'il dretg dals medis da consegnar sezs medicaments saja restrenschì. Correspundentamain pretendan ellas ed els da sclerir da nov la situaziun concernent l'aboliziun da la restricziun dal dretg dals medis da consegnar sezs medicaments.

Perquai ch'igl è passà in tschert temp dapi la consultaziun ch'è vegnida fatga l'onn 2010 e perquai che la mancanza da medis è creschida, almain en il sectur dals medis da chasa, resguarda la regenza l'incumbensa che vegn dumandada cun l'inoltraziun qua avant maun da giuditgar da nov la restricziun dal dretg dals medis da consegnar sezs medicaments en il chantun sco giustifitgada. Quai en spezial er perquai ch'il departament da giustia, segirezza e sanadad ha independentamain da quai l'intenziun da mussar en in rapport co ch'il provediment medicinal da basa da la populàziun dal chantun e da ses giasts duai vegnir garantì en il futur.

Correspundentamain propona la regenza al cussegl grond d'acceptar l'incumbensa. Il nov giudicament sto er resguardar las conclusiuns e las recumandaziuns d'agir ch'il rapport dal cussegl federal "Posiziunament da las apotecas en il provediment da basa" dals 12 d'october 2016 cuntegna.

12 da schaner 2017