Tar la dumonda 1: La regenza è conscienta da l'impurtanza che spazi d'abitar pajabel resp. favuraivel ha per l'attractivitad dal chantun. Il problem exista principalmain en ils territoris urbans ed en ils centers turistics principals numnads en la dumonda parlamentara qua avant maun. Sin plaun chantunal na datti naginas statisticas davart la tematica da l'abitar pajabel. Enconuschent è mo ch'igl ha 1398 abitaziuns da la construcziun d'abitaziuns d'utilitad publica en il Grischun. Enconuschent è plinavant er il dumber d'abitaziuns vidas per vischnanca; da quel na sa laschan dentant trair naginas conclusiuns areguard la tematica dal spazi d'abitar pajabel, perquai che las abitaziuns vidas èn registradas independentamain dals pretschs.

Tar la dumonda 2: Sco ch'i vegn explitgà correctamain en la dumonda parlamentara, pon tranter auter mesiras da la planisaziun dal territori promover ch'i vegnia mess a disposiziun spazi d'abitar favuraivel. Perquai che la situaziun sin il martgà d'abitaziuns divergescha da vischnanca a vischnanca, èn dumandadas en emprima lingia las vischnancas d'examinar mesiras correspundentas en cas da basegn e da realisar quellas en il rom da la planisaziun locala, p.ex. cun determinar zonas d'abitar spezialas cun quotas minimalas d'abitaziuns favuraivlas. Las vischnancas enconuschan las relaziuns localas ed ils basegns da la populaziun ed èn perquai quellas che pon – en cas da basegn – relaschar il meglier regulaziuns sin mesira cunter svilups nungiavischads en quest sectur. En il rom da l'accumpagnament ordinari da las planisaziuns localas è l'uffizi per il svilup dal territori gugent pront da cussegliar las vischnancas er en questa tematica.

Da menziunar resta ch'il chantun sustegna er directamain la construcziun d'abitaziuns, numnadamain sin basa da la lescha chantunala davart la construcziun d'abitaziuns socialas e la meglieraziun da las relaziuns d'abitar en il territori da muntogna. En quest connex sa restrenscha il sustegn sin la meglieraziun da las relaziuns d'abitar en il territori da muntogna, suenter ch'il chantun è sa retratg l'onn 2006 dal sustegn da la construcziun d'abitaziuns socialas en il rom da l'examinaziun da las structuras e da las prestaziuns per sanar las finanzas dal chantun. Cun ils meds finanzials disponibels po il chantun sustegnair oz tranter 20 e 25 projects per onn. Ina contribuziun chantunala importa en media circa 45 000 francs. Sustegnida vegn la populaziun purila e betg purila en relaziuns finanzialas modestas da tut las valladas grischunas che tutgan tar il territori da muntogna.

Ultra dal chantun s'engascha dal rest er la confederaziun en il sectur da la promoziun da spazi d'abitar per chasadas cun entradas bassas sco er en il sectur da l'access a proprietad d'abitar. Quai sin basa da la lescha federala davart la promoziun d'abitaziuns a tschains u a pretschs moderads. Qua vegnan resguardads cunzunt ils interess da famiglias, da persunas ch'educheschan sulettas, d'umans cun impediments, da persunas attempadas basegnusas sco er da persunas en scolaziun.

Tar la dumonda 3: Sco explitgà qua survart èn las vischnancas il dretg plaun statal per relaschar – en cas da basegn – regulaziuns en il dretg da la planisaziun dal territori per garantir spazi d'abitar favuraivel. En il rom da la proxima revisiun parziala da la lescha davart la planisaziun dal territori per il chantun Grischun (LPTGR) duai vegnir examinà, sche las vischnancas èn autorisadas da far quai gia sin basa da lur cumpetenzas regulativas generalas en la planisaziun locala u sch'i dovra ina norma da cumpetenza expressiva en la LPTGR, analogamain a quella da l'art. 27 al. 4 LPTGR, nua che las vischnancas vegnan autorisadas expressivamain da relaschar regulaziuns cunter svilups nungiavischads sin il martgà d'abitaziuns en consequenza da la construcziun d'abitaziuns secundaras.

 21 da december 2016