Navigation

Inhaltsbereich

Sessiun: 07.12.2016

Suenter ch'il temp d'emprova da 3 onns è passà e suenter che manischunzas novas e manischunzs novs han absolvì ils curs da perfecziunament pon ellas ed els dumandar in permiss da manischar a durada illimitada. La dumonda respectiva po vegnir inoltrada a l'uffizi per il traffic sin via il pli baud 1 mais avant la scadenza dal termin. Questa procedura è cumplitgada, nunnecessaria e nunfavuraivla per la clientella.

L'uffizi per il traffic sin via po verifitgar a maun dal numer dal permiss da manischar, sch'ils curs da perfecziunament obligatorics per manischunzas novas e manischunzs novs èn vegnids absolvids. Per il 1. da schaner 2014 ha il cussegl federal stgaffì la basa legala per quai. Quella pussibilitescha als uffizis per il traffic sin via d'emetter automaticamain il permiss da manischar a durada illimitada, senza che las titularas ed ils titulars dal permiss da manischar a prova stoppian inoltrar ordavant ina dumonda munida cun la cumprova d'avair absolvì ils 2 dis da perfecziunament (art. 24 al. 1 da l'ordinaziun davart l'admissiun al traffic). Ina midada automatica dal permiss da manischar a prova augmenta l'effizienza e spargna custs. Uschia applitgeschan ils chantuns Berna, Argovia, Neuchâtel e Turitg gia quest model da soluziun ed èn fitg cuntents d'avair midà a tal.

Las sutsegnadras ed ils sutsegnaders incumbenseschan la regenza da stgaffir la basa legala, per ch'ils permiss da manischar a prova vegnian midads automaticamain en permiss da manischar a durada illimitada, sch'ils 3 onns d'emprova èn passads e sche las manischunzas novas ed ils manischunzs novs han absolvì a temp ils curs da perfecziunament obligatorics.

Cuira, ils 7 da december 2016

Schneider, Crameri, Albertin, Atanes, Berther (Mustér), Bondolfi, Bucher-Brini, Buchli-Mannhart, Burkhardt, Caduff, Cahenzli-Philipp, Caluori, Casanova (Glion), Cavegn, Caviezel (Cuira), Claus, Clavadetscher, Danuser, Darms-Landolt, Della Vedova, Deplazes, Dermont, Dosch, Engler, Epp, Felix (Haldenstein), Felix (Scuol), Florin-Caluori, Foffa, Geisseler, Giacomelli, Gunzinger, Heiz, Hitz-Rusch, Holzinger-Loretz, Jenny, Joos, Kasper, Koch (Tumein), Koch (Igis), Kollegger, Komminoth-Elmer, Kunfermann, Kunz (Fläsch), Kunz (Cuira), Lorez-Meuli, Mani-Heldstab, Märchy-Caduff, Mathis, Michael (Donat), Monigatti, Nay, Niederer, Niggli-Mathis (Grüsch), Noi-Togni, Papa, Paterlini, Perl, Pfenninger, Salis, Sax, Schutz, Steck-Rauch, Stiffler (Cuira), Tenchio, Thomann-Frank, Tomaschett (Breil), Tomaschett-Berther (Trun), Toutsch, Troncana-Sauer, Valär, von Ballmoos, Waidacher, Weber, Wieland, Zanetti, Antognini, Berther (Segnas), Cantieni, Derungs, Erhard, Pfister, Wellig

Resposta da la regenza

Tgi che ha in permiss da manischar a prova, sto far entaifer 3 onns ina furmaziun supplementara da 16 uras, repartidas sin 2 dis da curs (art. 15a al. 1 da la lescha davart il traffic sin via en cumbinaziun cun l'art. 27a al. 1 da l'ordinaziun davart l'admissiun al traffic) per survegnir il permiss da manischar a durada illimitada. La frequentaziun dal curs vegn inscritta dals organisaturs privats dal curs en in register central (SARI) ch'è independent dals sistems chantunals d'informatica. L'access succeda sur internet. Per optimar ils custs fa l'uffizi per il traffic sin via dal Grischun cun las autoritads d'admissiun da 15 ulteriurs chantuns (AI, AR, BL, FR, GE, GL, NW, OW, SG, SO, SZ, TG, TI, UR, VS) e cun il principadi da Liechtenstein part da la cuminanza d'informatica da l'uniun per coordinar las incumbensas d'informatica dals uffizis per il traffic sin via (KISTRA). Tut ils commembers han perquai la medema applicaziun speziala (cari) per liquidar lur incumbensas.

Sin dumonda dals chantuns KISTRA ha il furnitur dal program da computer gia offrì l'onn 2016 in'extensiun da l'interfatscha tranter "cari" e "SARI" che generescha automaticamain la communicaziun a l'uffizi per il traffic sin via davart la furmaziun supplementara absolvida e che prepara il medem mument il permiss da manischar a durada illimitada per la stampa. Nus faschain quint che questa soluziun efficazia e nunbirocratica vegnia realisada en il decurs da l'onn 2017. Ina basa legala (supplementara) perquai na fa betg da basegn.

Per quests motivs propona la regenza da refusar l'incumbensa qua avant maun.

2 da mars 2017