La regenza è conscienta dal fatg ch'ina buna avertura da la regiun gronda da Cuira cun il traffic public è impurtanta. La qualitad da la cuntanschibladad cun il traffic public è en general in dals facturs essenzials per il svilup social ed economic da questa regiun.

Tar la dumonda 1: Il december 2013 ha pudì vegnir realisà, en connex cun l'introducziun da la viafier S Son Gagl sin il traject Sargans – Cuira, in tact da mes'ura attractiv cun trens moderns climatisads cun rampa sbassada da la Thurbo SA. Questa purschida vegn appreziada da las passagieras e dals passagiers. Pervia da quai èsi raschunaivel d'examinar quest model er per las ulteriuras lingias da viafier e da bus en la regiun gronda da Cuira. Perquai ch'i dependa, sch'ils trens a gronda distanza da las VFF ferman a Bogn Ragaz ed a Maiavilla, po quest model però vegnir realisà mo pass per pass dal december 2018 fin al december 2025, premess ch'ils meds finanzials correspundents stettian a disposiziun. In pass essenzial per la purschida è planisà per il december 2021, cura ch'il material rullant pli attractiv da la Viafier retica (trens ad autotracziun RTZ) stat a disposiziun.

Actualmain circuleschan las lingias da viafier S1 (Schiers – Razén) ed S2 (Cuira – Tusaun) sco er il RegioExpress Mustér – Scuol da la Viafier retica en in tact d'ina ura, uschia ch'i dat gia oz duas colliaziuns da la Viafier retica per direcziun ed ura tranter Schiers e Razén. Per motivs d'infrastructura ha la colliaziun Cuira – Razén dentant in tact da 20'/40'. Ensemen cun la lingia 1 dal bus da la citad da Cuira (Cuira – Razén) vegn la purschida però extendida quasi ad in tact da 20 minutas. La damaun e la saira durant il traffic pendular vegn ultra da quai la purschida sin il traject Cuira – Glion cumplettada cun trens supplementars.

En il rom dal concept da purschida Retica 30 duai la purschida da viafier S da la Viafier retica en la regiun gronda da Cuira vegnir sistematisada ed extendida ad in cler tact da mes'ura tranter Schiers e Razén. Per il traject Cuira – Glion vegni examinà d'extender la purschida fin l'onn 2023 ad in tact da mes'ura durant l'entir di. Per las colliaziuns directas da las VFF a Cuira ed a Landquart stoi vegnir resguardà che las colliaziuns cun ils trens IC per Sargans e per Turitg ston vegnir priorisadas, quai pervia da la gronda dumonda. La premissa per extender la purschida resta il svilup positiv en connex cun la dumonda da las purschidas correspundentas.

Tar la dumonda 2: L'extensiun ad in tact da 20 minutas u ad in tact d'in quart d'ura fiss mo pussaivel, sche l'infrastructura da la Viafier retica, che consista per gronda part da trajects d'in binari, vegniss amplifitgada. En il Program da svilup strategic da l'infrastructura da viafier (PROSSIV 2030) n'èn dentant previsas naginas talas amplificaziuns en la Val dal Rain grischuna. Ina tala extensiun n'è perquai actualmain betg realistica. Ord vista da la regenza èsi impurtant che la purschida da la viafier S vegn cumplettada en moda raschunaivla cun ina purschida da bus ch'è coordinada cun quella. Pir da la cumbinaziun da la viafier cun il bus resulta ina vaira plivalur per las passagieras ed ils passagiers.

Tar la dumonda 3: Cun l'introducziun curunada da success da la S12 (Sargans – Cuira) è la purschida dal traffic public en la Val dal Rain grischuna vegnida meglierada marcantamain. En la planisaziun correspunda la S12 a la segunda etappa da la viafier S FLACH (Liechtenstein – Vorarlberg – Svizra). Grazia a l'engaschament da la confederaziun e dals chantuns Son Gagl e Grischun ha ella pudì vegnir realisada anticipadamain ed avant l'emprima etappa (Sargans – Buchs – Feldkirch). La regenza sustegna il chantun Son Gagl en sias stentas da realisar l'emprima etappa da la viafier S FLACH. Igl è vegnì fixà cun la confederaziun e cun las VFF da metter en funcziun il traject Sargans – Buchs il pli tard il december 2025. Ils discurs davart questa tematica sin plaun guvernamental cun il pajais dal Vorarlberg han er gia gì lieu.

22 da zercladur 2017