Tar la dumonda 1: Las infrastructuras relevantas per il sistem vegnan promovidas sa basond sin l'artitgel 18 da la lescha per promover il svilup economic en il chantun Grischun (LSE; DG 932.100) sco er sin l'artitgel 15 da l'ordinaziun executiva tar la lescha per promover il svilup economic en il chantun Grischun (OSE; DG 932.160). Ultra da quai vala la directiva dal departament d'economia publica e fatgs socials (DES) concernent la concessiun da contribuziuns ad infrastructuras relevantas per il sistem (part 2.2, premissas specificas per interpresas d'alloschament).

Tar la dumonda 2: La contribuziun d'investiziun unica dal chantun a favur da la construcziun da l'hotel Flaz a Puntraschigna importa 1,0 milliun francs. En connex cun la construcziun dal nov hotel investescha la vischnanca da Puntraschigna tut en tut 3,5 milliuns francs en infrastructuras da sport publicas, ch'èn affiliadas directamain a l'hotel. Als custs da la construcziun dal nov hotel na paja la vischnanca naginas contribuziuns. La concessiun d'ina contribuziun chantunala premetta dentant che la vischnanca da Puntraschigna investeschia en questa infrastructura da sport parallelamain a la construcziun da l'hotel. Il conclus da la regenza per promover la Hotel Flaz SA prevesa che 50 % da la contribuziun stoppia vegnir restituida, sche l'andament da las fatschentas è positiv.

Tar la dumonda 3: La directiva dal DES concernent contribuziuns ad infrastructuras relevantas per il sistem prevesa criteris supplementars en il sectur d'alloschament, che ston vegnir ademplids per ch'in project possia vegnir caracterisà sco degn da promoziun:
‒ il project chaschuna directamain ulteriuras investiziuns primarmain turisticas ubain sia realisaziun dependa da talas;
‒ il project metta a disposiziun almain 100 letgs supplementars explotads;
‒ il project appellescha ad in nov segment da clientella;
‒ la vischnanca da staziunament sa participescha tenor sias pussaivladads al project u ad ulteriuras investiziuns ch'han in connex cun il project e/u ulteriurs furniturs da prestaziuns turisticas prendan part al project per rinforzar la chadaina da creaziun da valur existenta u nova;
‒ il project vegn cofinanzià en moda decisiva d'instituts bancars e da la Societad svizra da credit d'hotel SCH;
‒ la petenta u il petent sa declera pronta u pront – en cas d'in andament da las fatschentas positiv e resguardond las obligaziuns – da restituir ina part da la contribuziun al chantun.

Il project da construcziun d'in nov hotel da la Hotel Flaz SA ademplescha quests criteris.

En sia strategia per sviluppar l'economia locala ha la regiun Malögia menziunà sco mesira il "rinforzament da l'alloschament – prioritad 1" e preschentà latiers consideraziuns strategicas cumplessivas. Cun reunir il nov hotel e l'infrastructura da sport directamain affiliada resulta in center che n'exista anc betg fin oz cun in effect empermettent per la vischnanca da Puntraschigna e per l'entira Engiadin'ota.

Tar la dumonda 4: En il rom da sia debatta pertutgant la revisiun parziala da la LSE ha il cussegl grond discutà detagliadamain davart la promoziun da manaschis singuls. En la discussiun èn stads centrals cunzunt ils manaschis pitschens e mesauns (IPM) en il sectur da l'industria, dal mastergn e dal commerzi. La promoziun generala da manaschis singuls en il senn da l'installaziun e da l'extensiun dad IPM è vegnida refusada. Questa promoziun duai avair lieu mo pli tar projects innovativs (art. 12 LSE). La promoziun da manaschis singuls en il sectur dal turissem (art. 20 fin 26 LSE) n'è percunter betg vegnida excludida. En la missiva tar la revisiun totala da la LSE (carnet nr. 2 / 2015 – 2016) statti pliras giadas ch'i vegnia renunzià en il futur a la promoziun da manaschis singuls en il sectur industrial ed artisanal. La promoziun d'interpresas d'alloschament, da telefericas, d'autras infrastructuras turisticas sco er d'infrastructuras relevantas per il sistem è vegnida approvada dal cussegl grond, bain savend ch'i sa tracta qua er da manaschis singuls da l'economia turistica. Incontestà èsi ch'i na pon vegnir finanziadas naginas mesiras per mantegnair las structuras, nagins meds finanzials da manaschi periodics ed er naginas mesiras da sanaziun.

En connex cun la promoziun da la Hotel Flaz SA sa tracti d'in emprim cas da promoziun da quest gener. Sco preschentà qua survart èn las pretensiuns grondas per conceder ina contribuziun chantunala a favur da la construcziun d'interpresas d'alloschament sut il titel da las infrastructuras relevantas per il sistem. Uschia vegn il dumber da cas da promoziun en il sectur da las interpresas d'alloschament a restar survesaivel.

20 d’october 2017