Navigation

Inhaltsbereich

Sessiun: 18.10.2017

Cun la communicaziun dals 28 da settember 2017 ha la regenza orientà ch'ella haja prendì enconuschientscha dal rapport tar il center da scola auta (CSA) per la Scola auta da tecnica ed economia (SATE) a Cuira che cuntegna in'analisa da potenzial dals lieus "Pulvermühle" e "Neumühle" a Cuira. Tenor il rapport ha la "strategia da dus lieus" cun il lieu principal "Neumühle" e cun il lieu supplementar "Pulvermühle" il potenzial il pli grond. La regenza empermetta ussa da sclerir la strategia d'in lieu cun il lieu "Kettweg" sco domicil. Uschia duain vegnir stgaffidas las basas per cumparegliar il potenzial dal lieu "Kettweg" cun ils auters dus lieus gia examinads.

En quest connex supplitgain nus la regenza da respunder las suandantas dumondas:

1. Co vesa ora il process d'evaluaziun dal domicil per il campus nov dal center da scola auta?

2. Tge criteris ha la regenza fixà per il giudicament strategic dal domicil per la scola auta?

3. Quant enavant èn finamiras sco bunas cundiziuns per ils utilisaders, bunas cundiziuns dal lieu ed ina buna rentabilitad vegnidas operaziunalisadas e quantifitgadas e resguardadas en l'evaluaziun?

4. Co èn ils singuls criteris vegnids valitads?

Cuira, ils 18 d'october 2017

Kuoni, Jeker, Zanetti, Albertin, Bleiker, Blumenthal, Brandenburger, Bucher-Brini, Caduff, Cahenzli-Philipp, Caluori, Casanova-Maron (Domat), Casutt-Derungs, Caviezel (Cuira), Darms-Landolt, Della Vedova, Dermont, Dosch, Engler, Epp, Felix (Scuol), Foffa, Geisseler, Grass, Hardegger, Holzinger-Loretz, Jenny, Koch (Tumein), Koch (Igis), Kunfermann, Kunz (Fläsch), Kunz (Cuira), Lamprecht, Märchy-Caduff, Michael (Castasegna), Niederer, Niggli-Mathis (Grüsch), Papa, Pedrini, Peyer, Pult, Steck-Rauch, Stiffler (Tavau Plaz), Stiffler (Cuira), Thomann-Frank, Thöny, Tomaschett (Breil), Tomaschett-Berther (Trun), Troncana-Sauer, Vetsch (Claustra Vitg), Widmer-Spreiter, Wieland, Bonderer, Candrian, Cantieni, Degiacomi, Föhn, Nicolay, Pfister, Ruckstuhl

Resposta da la regenza

La basa politica per priorisar l'evaluaziun dal lieu per in center da scola auta Cuira (CSA) da la scola auta da tecnica ed economia (SATE Cuira) vegn tranter auter furmada da l'incumbensa Kappeler ch'il cussegl grond ha approvà ils 18 da zercladur 2015 cun 105 cunter 0 vuschs ed 1 abstenziun (protocol dal cussegl grond da la sessiun da zercladur 2015, p. 846).

Tar la dumonda 1: Cun il conclus da la regenza dals 10 da schaner 2017, protocol nr. 3, ha la regenza – resguardond las investiziuns en l'infrastructura da scola auta ch'èn vegnidas fatgas fin ussa, ils giavischs da la scola auta sco er l'urgenza – decidì ch'in CSA futur stoppia vegnir realisà a Cuira. Ina gruppa da lavur, che consista da represchentants da l'uffizi chantunal da construcziun auta (direcziun dal project), da l'uffizi per la furmaziun media-superiura, da l'uffizi per economia e turissem sco er da la SATE Cuira, ha stuì examinar sinaquai, co ch'il basegn da surfatscha da la SATE Cuira cumprovà, ma er prognostitgà per il futur possia vegnir ademplì primarmain als lieus Pulvermühle e Neumühle e tge surfatschas da bains immobigliars che fissan necessarias per quai. En quest connex han las premissas actualas dal dretg da planisaziun stuì vegnir resguardadas. Ultra da quai ha stuì vegnir scleri sch'il basegn supplementar da surfatscha dal bain immobigliar stuess vegnir cuvrì cun adattar eventualmain la legislaziun da la citad da Cuira (dretg da construcziun e da planisaziun da la citad da Cuira). Plinavant ha la gruppa da lavur tractà dumondas da la finanziaziun e dal purtader dal project da construcziun integrond il departament da finanzas e vischnancas.

Sin basa dal facit da la gruppa da lavur, tenor il qual ni la parcella al lieu Pulvermühle ni la parcella al lieu Neumühle, tuttas duas en possess chantunal, n'hajan il potenzial per ina strategia d'in lieu sut las relaziuns actualas dal dretg da planisaziun, ha la regenza incumbensà la gruppa da lavur cun il conclus da la regenza dals 26 da settember 2017, protocol nr. 815, d'examinar in ulteriur lieu a Cuira e da far ulteriurs scleriments considerond ils custs che resultan en cas d'ina strategia d'in lieu u d'ina strategia da dus lieus. L'elavuraziun pli detagliada da las basas specificas per la scola e da las consequenzas da la digitalisaziun per la furmaziun tras la SATE Cuira tutga er tar ils pass d'elavuraziun dal project. Sche las cundiziuns generalas en vista a lieus alternativs sin il territori da la citad da Cuira avessan da sa midar, po la gruppa da lavur sviluppar basas supplementaras e far scleriments respectivs.

Suenter l'evaluaziun dal lieu vegn la regenza a rapportar al cussegl grond en furma d'ina missiva, per che quel possia prender posiziun tar puncts relevants e trair ina decisiun strategica da basa correspundenta.

Tar la dumonda 2: Sa basond sin las prescripziuns formuladas da la regenza ha la gruppa da lavur fixà ils suandants criteris en il rom da l'analisa dal potenzial: potenzial da surfatscha (differenzià tenor potenzial sin ils agens bains immobigliars e tenor potenzial resguardond ils bains immobigliars cunfinants u vischins), disponibladad da surfatschas cunfinantas u vischinas, cuntanschibladad ed avertura (vista dals students, dals visitaders, dals collavuraturs), cundiziuns generalas dal dretg da planisaziun (planisaziun d'utilisaziun, ristgas da procedura), factur da temp per la realisaziun, visibilitad/adressament da la SATE Cuira, potenzial per realisar il CSA ad in lieu singul (potenzial per la strategia d'in lieu incl. potenzial da svilup).

Tar la dumonda 3: Ils potenzials dals singuls lieus èn vegnids cumparegliads a maun dals criteris da giudicament enumerads sut la resposta a la dumonda 2 ed applitgond in sistem d'ampla simpel. La rentabilitad dals lieus cun lur variantas vegn examinada en il proxim pass da l'elavuraziun dal project sco criteri da decisiun supplementar.

Tar la dumonda 4: D'ina valitaziun procentuala dals singuls criteris da giudicament resp. d'ina furmla da calculaziun matematica han ins desistì sapientivamain pervia da la cumplexitad dal project. Cun agid dal sistem d'ampla ha la gruppa da lavur però pudì far in giudicament general da l'adattaziun da mintga lieu.

15 da december 2017