Navigation

Inhaltsbereich

Sessiun: 04.12.2017

La digitalisaziun marscha plainamain. Ils 21 da november 2017 è vegnì realisà l'emprim Di digital, al qual er il chantun Grischun ha giugà ina rolla. Ins po esser da differenta opiniun areguard il Di digital. Igl è dentant in fatg che la digitalisaziun na sa lascha betg franar e ch'il chantun Grischun sto urgentamain prender suenter bler en quest sectur.

Ina buna emprima proposta en quest reguard è vegnida fatga dal cusseglier dals chantuns Martin Schmid en ina moziun da la fin da matg 2017. En quella vegn il cussegl federal incumbensà da midar las leschas correspundentas uschia, che la decleraziun da taglia resp. la dumonda da restituziun da la taglia anticipada na sto betg pli vegnir suttascritta. En sia motivaziun renda il cusseglier dals chantuns Schmid attent che singuls chantuns hajan gia realisà quai. Problems n'èn enconuschents nagins fin ussa.

In scleriment pli exact mussa che p.ex. il chantun Friburg desista dapi l'onn 2014 da la suttascripziun e che gia passa 80 000 decleraziuns da taglia vegnan actualmain transmessas senza suttascripziun, quai ch'è dapli che 50 % da tut las decleraziuns da taglia. Ils respargns importan en quest connex para almain 5 fin 10 francs per decleraziun da taglia electronica. Er il chantun Lucerna ha actualmain gist surpiglià questa procedura.

Pervia da quest svelt svilup vegn la regenza incumbensada da prender er en il chantun Grischun las mesiras necessarias per digitalisar cumplainamain la decleraziun da taglia e per desister da la suttascripziun sin la decleraziun da taglia digitala.

Cuira, ils 4 da december 2017

Koch (Igis), Brandenburger, Hug, Mathis, Nay, Salis, Toutsch, Weber

Resposta da la regenza

Il dretg federal vertent (art. 124 al. 2 da la lescha federala davart la taglia federala directa [LTFD]) ed il dretg chantunal (art. 127 al. 2 da la lescha da taglia per il chantun Grischun [LT]) prescrivan expressivamain che la decleraziun da taglia stoppia vegnir suttascritta. Per la taglia federala directa e per las taglias chantunalas e communalas sin las entradas e sin la facultad vegn inoltrada mo ina decleraziun da taglia, quai che premetta regulaziuns legalas armonisadas. Quai vul dir che las leschas da taglia da la Confederaziun e dal chantun ston vegnir adattadas en in emprim pass, per lura pussibilitar l'inoltraziun electronica da la decleraziun da taglia senza stuair agiuntar il fegl da quittanza ch'è actualmain anc necessari e ch'è da suttascriver a maun.

Sin plaun federal è vegnì fatg cun la moziun Schmid in emprim pass en questa direcziun. La regenza planisescha ina midada correspundenta da la lescha chantunala da taglia en il rom d'ina revisiun parziala l'onn proxim. La realisaziun fiss lura pussaivla gia per l'onn da taxaziun u per l'onn fiscal 2020. Sin basa da questas explicaziuns propona la regenza al cussegl grond d'acceptar questa incumbensa.

7 da favrer 2018