Zum Seiteninhalt

Incumbensa Pfenninger concernent l'adattaziun da l'artitgel 20 da la lescha da finanzas (cumpensaziun d'expensas en cas da credits posteriurs)

sessiun: 13.02.2018

Da princip èsi da beneventar che credits posteriurs duain – tenor l'artitgel 11 da l'ordinaziun da finanzas – sche pussaivel vegnir cumpensads tras expensas pli pitschnas en in auter sectur. Ils ultims onns è dentant sa sviluppada la pratica da permetter er cumpensaziuns dal sectur d'investiziun e viceversa.

L'artitgel 20 da la lescha da finanzas na cuntegna naginas infurmaziuns davart la cumpensaziun. Plinavant vegn duvrada en l'artitgel 11 da l'ordinaziun da finanzas mo la noziun «expensas pli pitschnas»; quai senza ulteriuras precisaziuns.

En general èsi da menziunar ch'ina cumpensaziun dal sectur d'investiziun en il quint economic u viceversa sto vegnir designada sco problematica resp. sco betg confurma al sistem, cun ils preventivs globals e cun ils instruments da planisaziun dal cussegl grond. Quai engrevgescha la legibladad e restrenscha la transparenza tar la controlla. Plinavant n'èn las cumpensaziuns dal sectur d'investiziun savens betg vairas expensas pli pitschnas, cunquai che questas investiziuns resultan tuttina l'onn suandant.

Las sutsegnadras ed ils sutsegnaders incumbenseschan la regenza da suttametter al cussegl grond in'adattaziun da l'artitgel 20 da la lescha da finanzas, che regla cleramain la cumpensaziun d'expensas en cas da credits posteriurs, senza cumpigliar il sectur d'investiziun.

Cuira, ils 13 da favrer 2018

Pfenninger, Marti, Atanes, Baselgia-Brunner, Bucher-Brini, Cahenzli-Philipp, Casanova-Maron (Domat), Cavegn, Caviezel (Cuira), Clavadetscher, Della Vedova, Deplazes, Dermont, Felix (Scuol), Gunzinger, Heiz, Hitz-Rusch, Holzinger-Loretz, Jaag, Jenny, Joos, Kuoni, Locher Benguerel, Monigatti, Nay, Niederer, Paterlini, Perl, Peyer, Pfäffli, Pult, Stiffler (Cuira), Tenchio, Thomann-Frank, Thöny, Troncana-Sauer, Vetsch (Pragg-Jenaz), Wieland

Resposta da la regenza

Ils ultims 10 onns ha la cumissiun da gestiun dal cussegl grond (CdG) approvà en media 16 credits posteriurs d'in volumen mesaun da 22,5 milliuns francs (senza ils dus credits posteriurs da l'onn 2011 per constituir reservas per la refurma da la gulivaziun da finanzas e dal territori sco er per il tunnel da l'Alvra da la Viafier retica). Da quels èn vegnids cumpensads en media mintga onn 7,5 credits posteriurs d'in volumen da totalmain 5,8 milliuns francs tras expensas pli pitschnas. Tar stgars la mesadad dals credits posteriurs reussescha apparentamain ina cumpensaziun, areguard ils volumens vegn dentant cumpensà mo bundant in quart dals credits posteriurs en il cas singul.

Effectivamain ha la CdG – sin proposta da la regenza – approvà en singuls cas er credits posteriurs en il quint economic (QE), ils quals èn vegnids cumpensads tras expensas pli pitschnas en il quint d'investiziun (QI). Mintgatant hai er dà il cas cuntrari cun in credit posteriur en il QI ed ina cumpensaziun en il QE. En la media dals ultims 10 onns hai dà 1,1 resp. 1,3 tals cas. Il dumber il pli grond da tals cas cun ina cumpensaziun traversala han ins registrà ils onns 2014 e 2015 cun tut en tut mintgamai quatter cas. Il volumen da credits posteriurs cumpensads en tala moda importa en media mo 1,6 milliuns francs dapi l'onn 2008. Cumpareglià p.ex. cun il volumen dals credits betg duvrads d'ina media annuala da bundant 88 milliuns francs en ils preventivs approvads dal cussegl grond dapi l'onn 2008 (senza credits posteriurs), han ils credits posteriurs cun cumpensaziuns traversalas ina impurtanza marginala.

Credits posteriurs cun cumpensaziuns traversalas engrevgeschan dentant per regla la chapaivladad en vista a las consequenzas per il QE e per il QI respectivamain en vista a l'observaziun da las valurs directivas da la politica da finanzas nr. 1 concernent il surpli d'expensas budgetà dal QE e nr. 2 concernent las investiziuns nettas budgetadas. I constat er che cumpensaziuns dal sectur d'investiziun na portan savens nagins vairs respargns a lunga vista. La regenza renconuscha in basegn d'agir ed è pronta da desister en l'avegnir da cumpensaziuns traversalas en cas da dumondas per credits posteriurs. Uschenavant sco pussaivel e necessari duain cumpensaziuns vegnir fatgas en il medem sectur dal quint sco ils credits posteriurs respectivs. A chaschun da la proxima revisiun da l'ordinaziun da finanzas dal chantun Grischun (OFC; DG 710.110) duai l'art. 11 al. 2 vegnir cumplettà correspundentamain.

Per la regenza èsi plinavant fitg impurtant da dumandar credits posteriurs en il senn da l'art. 11 al. 1 OFC mo, sch'ina necessitad ed urgenza particulara è cumprovada. Il dumber da credits posteriurs è perquai fitg limità. Malgrà credits posteriurs han ils quints annuals adina in meglier resultat ch'ils preventivs.

I duai dentant vegnir desistì d'ina revisiun da la lescha da finanzas. Quella pertutgass numnadamain er las vischnancas. La regulaziun vertenta s'orientescha tenor il model d'ina lescha da finanzas dal MAC2. Ina dumonda da cumpensaziun sto pudair vegnir giuditgada en il cas singul. Betg en mintga cas singul n'è ina cumpensaziun pussaivla e tuttina necessaria. I sto er vegnir evità da reglar en la lescha detagls da l'execuziun. Ina regulaziun da cumpensaziuns cun in'exclusiun explicita da cumpensaziuns traversalas fiss in element ester en la lescha da finanzas. La regenza ha perquai l'intenziun d'adattar l'ordinaziun chantunala da finanzas empè da la lescha da finanzas.

Sin basa da questas explicaziuns propona la regenza da refusar questa incumbensa.

13 d'avrigl 2018