Cuntegn da la pagina

Dumonda Cavegn concernent il program turistic dal Grischun 2014 – 2021

sessiun: 14.02.2018

L'onn 2013 ha la regenza dal chantun Grischun lantschà il program da cooperaziun en il turissem grischun 2014 – 2021 per pudair far frunt cun success a las sfidas en il turissem grischun. En la sessiun da december 2013 ha il cussegl grond deliberà per quai il credit d'impegn, dal qual il chantun e la confederaziun surpiglian mintgamai 10,5 milliuns francs.

Silsuenter èn vegnids fixads en ina directiva da promoziun ils criteris per conceder contribuziuns da promoziun. Sco criteris da basa servan tranter auter criteris sco il cuntanscher la finamira dal program turistic, ina plivalur evidenta, la prontezza da cooperar cun auters acturs u la relevanza dal spazi. Plinavant è vegnidas tschertgadas sistematicamain novas ideas ed innovaziuns, capacitads finanzialas e persunalas. Per mesirar l'effect ston vegnir inditgadas la valurisaziun, las pernottaziuns, la posiziun sin il martgà e la direcziun dals temas. In project stuess sa basar sin in grad d'innovaziun uschè grond sco pussaivel concernent il product, il process, la strategia da vendita u la prestaziun da servetschs. Il marketing na duai – sco ch'i vegn pretendì – betg esser degn da vegnir promovì.

Sin la pagina d'internet www.innovationgr.ch poi vegnir legì ch'i èn vegnidas concedidas fin ussa contribuziuns per 19 projects. I dat en egl che mo projects gronds èn vegnids promovids e ch'ils projects regiunals sa restrenschan als puncts centrals Engiadina, Tavau e Planeiras. En autras regiuns (Val dal Rain da Cuira, Surselva, Viamala e.u.v.) mancan els cumplettamain.

Las sutsegnadras ed ils sutsegnaders tschentan en quest connex las suandantas dumondas a la regenza:

1. Quants meds finanzials dals 21 milliuns francs deliberads èn gia vegnids concedids?

2. Quants projects èn vegnids refusads?

3. N'èn projects innovativs pli pitschens ed orientads a la valurisaziun betg degns da vegnir sustegnids?

4. Èn tut las dumondas da las regiuns Val dal Rain da Cuira, Surselva e Viamala vegnids refusads u n'èn vegnidas inoltradas insumma naginas dumondas da questas regiuns?

5. Mancan a las organisaziuns turisticas pli pitschnas las resursas persunalas e/u finanzialas necessarias per in project degn da vegnir sustegnì?

6. Vegni controllà tar ils projects sustegnids, sche quels vegnan insumma realisads e sch'els cuntanschan ils effects duraivels prendids en mira per la valurisaziun, per la posiziun sin il martgà e per la direcziun dals temas (controlla dal success e/u reporting)?

7. Quant auta è l'indemnisaziun annuala dal cussegl turistic dal Grischun (onurari e spesas)?

Cuira, ils 14 da favrer 2018

Cavegn, Stiffler (Cuira), Davaz, Albertin, Alig, Baselgia-Brunner, Berther (Mustér), Blumenthal, Bondolfi, Brandenburger, Bucher-Brini, Buchli-Mannhart, Burkhardt, Caduff, Caluori, Casanova (Glion), Casanova-Maron (Domat), Casutt-Derungs, Crameri, Danuser, Darms-Landolt, Della Vedova, Deplazes, Dermont, Dosch, Engler, Epp, Fasani, Florin-Caluori, Foffa, Geisseler, Heiz, Jaag, Jeker, Jenny, Joos, Kollegger, Komminoth-Elmer, Kunfermann, Kunz (Fläsch), Kunz (Cuira), Kuoni, Märchy-Caduff, Marti, Niederer, Papa, Paterlini, Perl, Peyer, Pult, Salis, Sax, Schneider, Schutz, Tenchio, Thomann-Frank, Thöny, Tomaschett (Breil), Tomaschett-Berther (Trun), Vetsch (Pragg-Jenaz), von Ballmoos, Wieland, Zanetti, Berther (Segnas), Lombardi, Stäbler

Resposta da la regenza

Il program turistic dal Grischun 2014 – 2021 da plirs onns ch'è concepì sco program da cooperaziun e d'innovaziun per il turissem grischun, persequitescha la finamira surordinada da rinforzar la cumpetitivitad internaziunala dal turissem grischun. En il center stattan l'innovaziun ed iniziativas tenor princips d'interpresa.

Tar la dumonda 1: Per la fin da l'onn 2017 èn vegnids garantids tut en tut 6,9 milliuns francs per projects (contribuziuns) e per incumbensas en il rom dal program turistic. Suenter la mesadad dal temp dal program èn uschia vegnids impundids circa in terz dals meds finanzials disponibels.

Tar la dumonda 2: A l'uffizi per economia e turissem èn vegnidas inoltradas ils ultims 4 onns lunsch sur 100 dumondas. Tar circa in terz da las dumondas èn vegnids fatgs scleriments pli detagliads. Singulas ideas da project èn vegnidas suspendidas, perquai che criteris centrals per ina promoziun n'eran bet ademplids. Tar la pli gronda part da tut las dumondas sa tracti da dumondas da finanziaziun da manaschis singuls, da dumondas da sponsuradi u d'ideas senza caracter da project.

Tar la dumonda 3: La directiva da promoziun dal departament d'economia publica e fatgs socials (DES) concernent la realisaziun dal program turistic na prevesa nagina grondezza minimala per giuditgar il merit da promoziun, pia n'èsi betg vair che projects pitschens èn exclus d'ina promoziun.

Tar la dumonda 4: Er da las regiuns Val dal Rain da Cuira, Surselva e Viamala èn vegnidas inoltradas singulas dumondas da promoziun. Fin ussa n'èn anc vegnidas garantidas naginas contribuziuns en il rom dal program turistic. I vegn rendì attent che differents projects turistics da svilup da questas regiuns èn però vegnids sustegnids dapi l'onn 2014 cun contribuziuns da promoziun en il rom dal program da realisaziun da la nova politica regiunala NPR.

Tar la dumonda 5: Dumondas en il rom dal program turistic na pon betg mo vegnir inoltradas d'organisaziuns turisticas, mabain er d'interpresas, da persunas singulas, da vischnancas, da federaziuns e d'organisaziuns. Però èn singulas organisaziuns turisticas pitschnas absorbadas fermamain cun lur fatschentas quotidianas e n'han strusch resursas libras per la lavur da project. Per ils differents acturs turistics vesa la regenza pervia da quai vinavant schanzas en il sectur da las cooperaziuns e da la collavuraziun che s'orientescha a projects.

Tar la dumonda 6: Mintga concessiun da contribuziuns è colliada cun cundiziuns da promoziun u cun cunvegnas da contribuziun. Tut ils projects vegnan accumpagnads ed i vegn controllà, sche las finamiras avisadas vegnan ademplidas. En il rom d'ina rapportaziun annuala a la confederaziun vegni ultra da quai fatg in rendaquint davart l'impundaziun dals meds finanzials. Er al cussegl turistic vegni rapportà periodicamain davart il stadi da realisaziun dals projects promovids.

Tar la dumonda 7: Il cussegl turistic dal Grischun sa cumpona d'in president e da nov commembras e commembers che vegnan elegids da la regenza. Il president da Grischun vacanzas ed il schef dal DES appartegnan d'uffizi a questas nov commembras e commembers. Las commembras ed ils commembers dal cussegl turistic vegnan indemnisads cun 4000 francs per onn. Vitiers vegnan anc las spesas da viadi. Las commembras ed ils commembers dal cussegl turistic stattan a disposiziun a fin ad 8 dis e sustegnan cun lur enconuschientschas spezialas la discussiun turistica. Il president dal cussegl turistic vegn indemnisà cun 10 000 francs per onn. Vitiers vegnan anc las spesas da viadi. En questa funcziun prepara el las sesidas e las maina, sa participescha tenor basegn ad occurrenzas impurtantas da la branscha e stat a disposiziun a collavuraturas e collavuraturs da las medias per dar infurmaziuns davart las activitads dal cussegl turistic. Sin basa d'in mandat liquidescha il president dal cussegl turistic ulteriuras incumbensas davart projects specifics per il chantun.

26 d'avrigl 2018