L'incumbensa da la fracziun parta dal fatg che la taxaziun da prestaziuns da chapital da la prevenziun è memia pauc attractiva en il chantun Grischun e ch'i vegniss cuntanschì in augment marcant da l'attractivitad cun ina plazza a la testa en la cumparegliaziun interchantunala. Las novas domiciliaziuns motivadas da quai augmentassan duraivlamain il substrat fiscal en il chantun. Pervia da quai stoppia vegnir reducida la chargia.

Per fixar l'autezza da la taxaziun da cumpensaziuns en chapital da la prevenziun ston vegnir resguardads differents aspects. La cumpetitivitad interchantunala è segiramain in punct essenzial. I ston però er vegnir resguardads ils princips constituziunals da l'egualitad giuridica e da la taxaziun tenor la capacitad economica. Ultra da quai stoi vegnir examinà, sche er ponderaziuns da la politica sociala ston vegnir resguardadas ultra dals aspects fiscals, sch'ils impuls fiscals per tscherner la cumpensaziun en chapital duain vegnir rendids pli attractivs. E la finala stoi vegnir examinà, quant enavant ch'ina tariffa da taglia pli bassa per cumpensaziuns en chapital vegn effectivamain a chaschunar ina domiciliaziun da pajataglias cun prestaziuns da prevenziun fitg grondas.

Questas differentas dumondas na pon betg vegnir respundidas en il rom da la resposta a questa intervenziun. Quai èn puncts che vegnan a stuair vegnir evaluads e discutads en la procedura da legislaziun da pli tard. L'incumbensa anticipescha il resultat da questa preschentaziun generala e definescha ina plazza a la testa en la relaziun interchantunala sco clera finamira che stuess vegnir cuntanschida per tut ils stgalims da progressiun, q.v.d. er en cas da pitschnas cumpensaziuns en chapital. Tras quai vegn il legislatur restrenschì fermamain en ina fasa tempriva dal process legislativ, senza ch'ils scleriments necessaris fissan vegnids fatgs. La regenza è da l'opiniun che quest proceder na saja betg cunvegnent. Pervia da quai propona ella da surdar l'incumbensa en ina varianta pli miaivla.

Sa basond sin questas consideraziuns propona la regenza al cussegl grond da midar questa incumbensa sco suonda: La regenza vegn incumbensada d'examinar l'autezza da la taxaziun da cumpensaziuns en chapital che provegnan da la prevenziun, da giuditgar tala sut l'aspect da la cumpetitivitad interchantunala e da preschentar ina proposta legislativa correspundenta.

21 da zercladur 2018