Navigation

Inhaltsbereich

Incumbensa Tenchio concernent l'introducziun d'ina assicuranza naziunala da donns da terratrembels

Sessiun: 16.04.2018

Ils 30 da zercladur 2017 ha la conferenza da las regenzas en fatgs da militar, da protecziun civila e da pumpiers (CR MCP) deliberà in document cun valurs directivas per stgaffir in concordat interchantunal per in'assicuranza obligatorica da donns da terratrembels (CIAT). Ella è stada da l'avis d'introducir in concordat, sch'il dumber da chantuns che sa participass cuvriss ensemen almain 85 % dals edifizis e da las valurs materialas da la Svizra che stuessan vegnir assicurads. Ils 26 da settember 2017 ha la conferenza da las regenzas chantunalas (CdC) realisà ina consultaziun tar las regenzas: Ils chantuns èn vegnids envidads da s'exprimer sin basa dal document menziunà liantamain davart l'idea da stgaffir in CIAT. 13 chantuns (BE, UR, OW, NW, GL, FR, SO, BS, BL, SH, SG, VS, JU) beneventan l'elavuraziun d'in concordat. 10 chantuns (ZH, LU, SZ, ZG, AR, AI, AG, TG, VD, NE) refusan in tal per differents motivs. Trais chantuns (GR, TI, GE) refusan bain da princip in concordat, fissan dentant eventualmain pronts da sa participar ad ina soluziun da concordat, sch'in tal vegniss elavurà. Perquai ch'il dumber necessari d'almain 85 % edifizis e valurs materialas assicuradas en Svizra n'è betg vegnì cuntanschì, desista ussa la CdC da dar a la CR MCP in mandat per elavurar in CIAT, uschia che la realisaziun d'in concordat interchantunal sin basa da la solidaritad ha fatg naufragi.

Ina gronda part dal territori dal chantun Grischun è exponì ad in privel da terratrembels mesaun, l'Engiadina ad in grond. Edifizis d'abitar e da fatschenta construids uschia ch'els pon resister a terratrembels vegnan concepids en Svizra per vibraziuns che pon vegnir spetgadas en quel lieu en media ina giada entaifer 500 onns. Il terratrembel il pli ferm ch'è enconuschent en il Grischun hai dà l'onn 1295 en la regiun da Churwalden (intensitad VIII). Sch'el avess da sa repeter, fissan da spetgar donns totals da var 12 milliardas francs entaifer il chantun. Quels vegnissan finanziads mo per ina pitschna part or dal pool svizzer per cuvrir donns da terratrembels existent. Cf. sin http://www.seismo.ethz.ch/de/knowledge/earthquake-country-switzerland/index.html la charta dals epicenters da tut ils terratrembels cun ina magnituda da 2 ch'èn vegnids registrads cun instruments da l'onn 1975 fin l'onn 2015.

Il terratrembel – uschia il CR MCP en ses document – è il privel da la natira cun il potenzial da donns il pli grond per la Svizra, è dentant suttamess mo ad in'assicuranza facultativa cun premias relativamain autas. Er sch'i dat relativamain darar terratrembels ferms en Svizra, èn quels ina gronda ristga per ils umans e per las valurs materialas e chaschunan donns enorms per l'economia publica (e quai per las abitantas ed ils abitants, per las proprietarias ed ils proprietaris d'in bain immobigliar sco er per las bancas che finanzieschan credits). Pervia dal fitg grond potenzial da donns da terratrembels en Svizra ed en il Grischun e perquai ch'i manca er vinavant ina garanzia tras l'assicuranza da donns da terratrembels, sto vegnir stgaffida – pervia dal naufragi da la soluziun da concordat – in'assicuranza naziunala da donns da terratrembels solidarica che vegn repartida sin plirs purtaders dals custs (las 19 assicuranzas chantunalas d'edifizis e las assicuranzas privatas dals chantuns GUSTAVO [GE, UR, SZ, TI, AI, VS und OW], la confederaziun sco er las proprietarias ed ils proprietaris).

Perquai che las stentas dals chantuns per far in concordat, che sa basa sin il princip da solidaritad, han fatg naufragi, vegn la regenza incumbensada – sin fundament da l'art. 160 Cst. e da l'art. 59 al. 1 da la constituziun dal chantun Grischun (CC; DG 110.100) – d'inoltrar a l'assamblea federala ina iniziativa dal chantun che pretenda d'introducir in'assicuranza naziunala da donns da terratrembels per edifizis e per lavurs da rumida cun ina participaziun da la confederaziun e da las assicuranzas sco er cun premias supportablas per las proprietarias ed ils proprietaris.

Cuira, ils 16 d'avrigl 2018

Tenchio, Niggli (Samedan), Albertin, Atanes, Blumenthal, Bondolfi, Caduff, Caluori, Casanova (Glion), Casutt-Derungs, Cavegn, Caviezel (Cuira), Crameri, Darms-Landolt, Della Vedova, Dermont, Dosch, Epp, Fasani, Florin-Caluori, Foffa, Joos, Locher Benguerel, Märchy-Caduff, Michael (Castasegna), Monigatti, Niederer, Noi-Togni, Perl, Pult, Sax, Tomaschett (Breil), Tomaschett-Berther (Trun), von Ballmoos, Zanetti, Berther (Segnas), Buchli (Tenna), Degiacomi, Lombardi

Resposta da la regenza

La ristga da terratrembels è la ristga da donns elementars la pli gronda en Svizra. La ristga è da chapir sco probabilitad ch'in eveniment capita multiplitgada cun la dimensiun dal donn. La probabilitad ch'i capita in terratrembel da l'intensitad VII e pli gronda è fitg pitschna (ina giada mintga 500 onns en Svizra). Perquai che l'eveniment capita fitg darar, èsi anc pli difficil d'assicurar quel. In'assicuranza naziunala liass bler chapital da l'economia publica (tranter 10 e 30 milliardas francs). Per segirar in eveniment fitg rar stuessan vegnir fatgas retenziuns da fitg lunga durada u stuessan vegnir pajadas premias da reassicuranza. En quest lieu stoi vegnir rendì attent che differents assicuraders privats porschan a las proprietarias ed als proprietaris d'edifizis interessads in'assicuranza da donns da terratrembels.

In'enquista represchentativa da l'assicuranza d'edifizis dal Grischun realisada l'onn 2012 ha mussà che mo circa in quart da las proprietarias e dals proprietaris d'edifizis avessan interess vi d'ina assicuranza obligatorica da donns da terratrembels. En il rom d'ina enquista che l'assicuranza d'edifizis dal Grischun ha fatg l'onn passà ha la mesadad da las proprietarias e dals proprietaris d'edifizis beneventà in'assicuranza da donns da terratrembels, però cun l'idea da premias fitg bassas.

Dapi l'onn 2000 èn vegnidas inoltradas differentas intervenziuns sin plaun parlamentar. Cun excepziun da la moziun dal cusseglier naziunal Fournier da l'onn 2012 èn tuttas vegnidas stritgadas. Er a l'iniziativa dal chantun che Basilea-Citad ha inoltrà ils 10 da zercladur 2015, n'è betg vegnì dà suatientscha cun il conclus dal cussegl naziunal dals 20 da settember 2016 e dal cussegl dals chantuns dals 15 da december 2016. Dals scleriments che la conferenza da las regenzas chantunalas ha laschà far ils chantuns areguard la realisaziun d'in concordat è resultà ch'il dumber da chantuns ch'è necessari per cuvrir almain 85 pertschient dals edifizis assicurads e da las valurs materialas assicuradas da la Svizra ch'i dovra per realisar il concordat, na po betg vegnir cuntanschì. Correspundentamain ha la conferenza da las regenzas chantunalas desistì da laschar elavurar in sboz da concordat correspundent.

En vista als fatgs ch'ina part dals chantuns refusa in'assicuranza obligatorica naziunala da donns da terratrembels ed en spezial ch'i n'è betg vegnì dà suatientscha a l'iniziativa dal chantun Basilea-Citad d'avant bundant in onn, na vegn l'inoltraziun d'ina iniziativa analoga dal chantun Grischun strusch ad avair dapli success.

Dal votum dal cusseglier dals chantuns Stefan Engler dals 12 da zercladur 2018 (nr. 14.054) en la sessiun da zercladur 2018 dal cussegl dals chantuns resulta, ch'igl è vegnida fatga ina nova proposta ch'eliminass ils dischavantatgs da la "assicuranza obligatorica" (premias charas per las proprietarias ed ils proprietaris e bler chapital lià sin reserva). Quai è ina furma da responsabladad solidarica che obligass las proprietarias ed ils proprietaris d'edifizis da pajar ina procentuala maximala da las valurs d'assicuranza en ina tala obligaziun finanziala pir en cas d'in terratrembel. Cun per exempel 0,7 pertschient da tut la summa d'assicuranza da la valur da nov d'in edifizi en Svizra pudessan vegnir garantidas prestaziuns da circa 20 milliardas francs. Sin basa puramain matematica stuess la proprietaria u il proprietari d'in edifizi cun ina summa d'assicuranza d'in mez milliun francs pajar mintga 500 onns 3500 francs per cuntanscher ina garanzia da 20 milliardas francs en tut la Svizra. Quest pajament stuess dentant vegnir fatg mo, sch'in eveniment capitass effectivamain. Talas propostas ston vegnir examinadas pli detagliadamain. La regenza vegn a persequitar vinavant la discussiun davart talas propostas ed ad examinar detagliadamain quellas, cur ch'i èn avant maun resultats concrets. Cur ch'igl è uschè lunsch, vegn il schef dal departament da giustia, segirezza e sanadad er a preschentar la tematica da nov a la conferenza da las regenzas en fatgs da militar, da protecziun civila e da pumpiers (CR MCP).

Sa basond sin questas consideraziuns propona la regenza al cussegl grond da refusar questa incumbensa.

27 da zercladur 2018