Navigation

Inhaltsbereich

Dumonda Tenchio concernent il remplazzament dals redacturs / correspundents da la RSI a Cuira ch'èn vegnids tramess en auters posts da correspundenza u che stattan curt avant la pensiun

Sessiun: 17.04.2018

Las contribuziuns da radio e televisiun dal Grischun e da la Svizra orientala èn – ultra dals dus formats da radio en lingua taliana producids a Cuira «Grigioni sera» e «Voci del Grigioni italiano» – elements fundamentals d'ina purschida da programs autenticamain svizzers talians da vart da Radiotelevisione svizzera RSI (SSR). La regenza dal chantun Grischun ha adina mussà interess per ils programs numnads qua survart ed è adina s'engaschada per che actualitads politicas, culturalas ed economicas dal Grischun vegnian tractadas adequatamain en ils programs dad RSI.

Dapi il cumenzament da mars è Nicola Zala (televisiun) attribuì al post da correspundenza dad RSI en la Chasa federala a Berna, senza esser vegnì remplazzà. Da l'autra vart vegn Marco Petrelli (radio) a returnar la fin da l'onn, suenter la scadenza da ses segund mandat, a Comano. Sch'ins agiunta ussa anc il fatg che Gianluca Olgiati è vegnì transferì dacurt al post da correspundenza a Turitg (ed è vegnì remplazzà d'in collega che lavura a temp parzial), è la minima chaussa ch'ins po dir quella che la redacziun externa da RSI a Cuira (televisiun e radio) stat davant temps difficils.

En la dumonda d'approvaziun per in'emissiun da novitads da radio en lingua taliana tenor l'art. 26 al. 2 LRTV (brev al DATEC dals 5 d'october 2010) è Radiotelevisione della Svizzera italiana s'obligada da metter a disposiziun a la redacziun externa a Cuira 2,5 equivalents a temp cumplain (FTE) ultra dals 4 FTE ch'existivan là gia avant l'introducziun da «Grigioni sera» (totalmain 6,5 FTE). Actualmain e facticamain èn quests 6,5 FTE reducids a 4,9 FTE, ma la lavur per ils rapports dal Grischun e da la Svizra orientala per il «Quotidiano», per il «Telegiornale», per las novitads da radio, per "Grigioni sera", per las "Cronache della Svizzera italiana" e dapi intgin temp er per las "Voci del Grigioni italiano" è restada la medema.

Dumondas:

1. È la regenza da l'avis che las forzas da lavur che stattan actualmain a disposiziun a la redacziun externa a Cuira bastian per rapportar en il senn d'in service public davart eveniments actuals, resguardond ch'il dumber d'occurrenzas, davart las qualas i sto vegnir rapportà stringentamain, vegn a s'augmentar en connex cun las proximas elecziuns chantunalas dals 10 da zercladur?

2. Cura duain vegnir remplazzads ils redacturs / correspundents ch'èn gia vegnids dischlocads u che stattan curt avant in return a Comano? Cura vegn ins ad avair in redacziun che respecta numericamain las empermischuns che RSI ha fatg al DATEC?

3. Na tema la regenza betg ch'ina diminuziun cuntinuanta da persunal en la redacziun externa a Cuira indebleschia a lunga vista la preschientscha dal Grischun en ils programs da RSI?

Cuira, ils 17 d'avrigl 2018

Tenchio, Papa, Atanes, Bondolfi, Crameri, Della Vedova, Fasani, Heiz, Monigatti, Noi-Togni, Pedrini, Pult, Maurizio, Wellig

Resposta da la regenza

A la diversitad da las medias en general ed al resguard adequat dals basegns respectivs da las trais linguas chantunalas ha la regenza adina attribuì ina gronda impurtanza. Quai è sa mussà l'ultim temp en la resposta a la dumonda Atanes dals 14 da zercladur 2017 concernent il futur da las medias en il Grischun talian sco er en la recumandaziun da refusar l'iniziativa "No Billag" (en la resposta a la dumonda Peyer dals 17 d'october 2017 concernent las consequenzas da las midadas en l'artitgel 93 da la constituziun federala). En quest reguard – e confermada tras la clera refusa da l'iniziativa "No Billag" gist er en il Grischun – sustegna la regenza la direcziun fundamentala da la dumonda Tenchio. Correspundentamain furma ina preschientscha suffizienta da Radiotelevisione svizzera RSI al lieu da redacziun Cuira ina premissa fundamentala per pudair resguardar ed ademplir adequatamain ils basegns dal Grischun talian.

Las trais dumondas concretas tschentadas en la dumonda Tenchio concernan la planisaziun strategica sco er la lavur operativa da la RSI. Perquai è la direcziun da la RSI vegnida envidada da prender posiziun en chaussa ord lur vista. Las respostas correspundentas èn las suandantas:

Tar la dumonda 1: Nus avain rapportà zunt attentamain e conscienziusamain davart il cumbat electoral che ha gì lieu en vista a las elecziuns chantunalas dals 10 da zercladur. Quai avain nus fatg cun trametter collegas da Comano en il Grischun, che han sustegnì professiunalmain noss correspundents. Il medem avain nus fatg il di d'elecziun. Al radio, a la televisiun ed en l'internet avain nus deditgà la dumengia, ils 10 da zercladur, tant spazi sco anc mai a las elecziuns grischunas. Tant spazi ed ina rapportaziun d'auta qualitad han augmentà la valur da la rolla da service public da la RSI. Areguard la rapportaziun davart il cumbat electoral e davart las elecziuns è vegnida cuntinuada la lavur dals ultims onns. A chaschun da la scuntrada tranter la RSI e la delegaziun italofona, che ha gì lieu ils 4 da matg 2018 a Cuira, han ils deputads renconuschì cleramain la qualitad da la lavur d'infurmaziun che la RSI presta en il Grischun al radio ed a la televisiun.

Tar la dumonda 2: La correspundenta ch'è vegnida engaschada dacurt (principalmain per la televisiun) vegn a cumenzar sia plazza il 1. da settember 2018. Davart il remplazzament dal collega da radio, che vegn a turnar il december 2018 a la sedia principala, vegni decidì durant las proximas emnas. Tras ils dus collavuraturs vegn la RSI ad avair a Cuira ina redacziun fitg represchentativa. Ed els vegnan sustegnids da differents collavuraturs che rapportan gia principalmain dal Grischun.

Tar la dumonda 3: La RSI n'ha naginas intenziuns da reducir sia preschientscha schurnalistica e tecnica en il Grischun. Il Grischun porscha adina chavazzins schurnalistics zunt interessants ed igl è nossa intenziun d'infurmar il public svizzer italofon er vinavant en chaussa.

27 da zercladur 2018