Navigation

Inhaltsbereich

Dumonda Müller (Favugn) concernent la realisaziun da la Convenziun d'Istanbul per prevegnir a e per cumbatter cunter violenza envers dunnas e cunter violenza a chasa en il chantun Grischun

Sessiun: 01.09.2018

Ils ultims acts violents massivs envers dunnas en Svizra, las autas cifras da victimas en il rapport da l'agid a victimas dal chantun Grischun sco er las manifestaziuns en divers forums da discussiun da las medias socialas han puspè procurà per irritaziun. Els fan endament che la violenza envers dunnas è bler pli derasada, che supponì en general.

Violenza envers dunnas pertutga tut la societad. Violenza envers dunnas pertutga nus tuts. Ils collegas en il team, cur che lur collega vegn pluntada a chasa. La tatta, da la quala la biadia vegn mulestada en sortida. Il frar, dal qual la sora sto supportar mulestas sexualas a la plazza da lavur. Ils uffants, dals quals ils geniturs han confruntaziuns violentas.

Violenza envers dunnas na fa betg mo mal a las dunnas pertutgadas, ella engrevgescha er las relaziuns famigliaras e privatas. Ella impedescha ina vita autodeterminada. Ella fa tema a las dunnas, saja ch'ellas èn directamain pertutgadas, daventan perditgas u na pon betg sa mover libramain pervia da la tema da violenza.

Violenza envers dunnas resp. violenza a chasa è chastiabla, discriminanta ed ina violaziun dals dretgs umans. Perquai èsi en l'interess da tut la societad e dal stadi da cumbatter, da chastiar e da prevegnir a la violenza envers dunnas. Cun questa enconuschientscha ha la Svizra acceptà e ratifitgà la Convenziun d'Istanbul dal cussegl da l'Europa. Realisada na vegn la convenziun betg mo sin plaun naziunal, mabain er en mintga chantun. Ella è entrada en vigur il 1. d'avrigl 2018.

En sia resposta dals 23 d'avust 2017 a la dumonda Locher Benguerel constatescha la regenza – repetind il text da la missiva dal cussegl federal – tranter auter che: La confederaziun ed ils chantuns adempleschian las pretensiuns da la Convenziun d'Istanbul per la pli gronda part. E plinavant veglia ella spetgar ed examinar, tge mesiras supplementaras che la confederaziun vegnia a recumandar als chantuns.

L'onn 2009 è vegnì terminà il project d'intervenziun grischun cunter violenza a chasa. I ha durà 5 onns fin che la regenza ha realisà ina da las pretensiuns dal project cun endrizzar in post da coordinaziun tar l'uffizi dal servetsch social. Dapi quella giada èn puspè passads 4 onns ed ins n'ha betg chapì, co ch'il post da coordinaziun realisescha mesiras effizientas che correspundan a las pretensiuns da la Convenziun d'Istanbul. Schebain ch'in nov contract da prestaziuns cun la chasa per dunnas dal Grischun è en vigur, lavuran la chasa per dunnas ed autras organisaziuns e persunas spezialisadas anc adina per gronda part cun donaziuns da vart privata. Prevenziun e sensibilisaziun sco pretensiuns impurtantas da la Convenziun d'Istanbul n'èn strusch da percepir en la publicitad.

Nus ans drizzain perquai a la regenza cun las suandantas dumondas:

1. Vegn la regenza ad occupar ina rolla activa per realisar la Convenziun d'Istanbul, e vegn ella a gidar a dotar las mesiras cun ils meds finanzials necessaris ed a realisar las mesiras?

2. Prevesa la regenza ch'il post da coordinaziun tar l'uffizi dal servetsch social na coordineschia betg mo, mabain haja er a disposiziun meds finanzials per prestar lavur concepziunala e per realisar projects interdisciplinars?

3. Co pensa la regenza d'infurmar e da sensibilisar la populaziun per la violenza envers dunnas e per la violenza a chasa?

4. Vegnan quels posts che han da far cun las victimas da violenza a chasa u cun las dunnas pertutgadas da violenza (post da stab per l'egualitad da las schanzas, polizia, giustia, servetschs socials e.u.v.) scolads per realisar la Convenziun d'Istanbul? Sche na, cura ési previs da far quai?

Cuira, il 1. da settember 2018

Müller (Favugn), Widmer (Favugn), Atanes, Baselgia-Brunner, Bigliel, Brandenburger, Cahenzli-Philipp, Cantieni, Caviezel (Cuira), Clalüna, Degiacomi, Deplazes (Cuira), Erhard, Gasser, Gugelmann, Hartmann-Conrad, Hefti, Hitz-Rusch, Hofmann, Holzinger-Loretz, Horrer, Locher Benguerel, Maissen, Märchy-Caduff, Müller (Susch), Niggli-Mathis (Grüsch), Noi-Togni, Perl, Preisig, Rettich, Ruckstuhl, Rutishauser, Schwärzel, Stiffler, Tanner, Thomann-Frank, Thöny, Ulber, von Ballmoos, Widmer-Spreiter (Cuira), Wieland, Wilhelm, Zanetti (Sent)

Resposta da la regenza

Per la Svizra è entrada en vigur il 1. d'avrigl 2018 la Convenziun dal cussegl da l'Europa davart la prevenziun ed il cumbat cunter violenza envers dunnas (STE nr. 210; Convenziun d'Istanbul). Ella è la convenziun internaziunala la pli cumplessiva cun la finamira da cumbatter cunter quest gener da violaziuns dals dretgs umans. Las pitgas da la Convenziun èn ils secturs da la prevenziun da violenza, da la protecziun da victimas, da la persecuziun penala sco er d'ina politica integrativa.

La Convenziun d'Istanbul ha la finamira da prevegnir a, da cumbatter cunter e da persequitar la violenza fisica, psichica e sexuala envers dunnas sin in standard cumparegliabel en tut l'Europa. Quai vala er per il stalking, la maridaglia sfurzada, la mutilaziun da genitalias femininas sco er per l'abort sfurzà e per la sterilisaziun sfurzada. En cas da violenza a chasa registrescha la Convenziun tut las victimas da violenza, independentamain da la schlattaina.

Tar la dumonda 1: Per realisar la Convenziun èn cumpetents tant la confederaziun sco er ils chantuns en il rom da lur incumbensas e da lur cumpetenzas. L'uffizi federal per l'egualitad tranter dunna ed um (UFEG) coordinescha la realisaziun da la Convenziun sin plaun naziunal. El rapporta regularmain en chaussa al cussegl da l'Europa.

Sin plaun chantunal surpiglia la coordinaziun la conferenza svizra cunter violenza a chasa (SKHG) per incumbensa da la conferenza da las directuras e dals directurs chantunals da giustia e polizia (CDCGP) e da la conferenza da las directuras e dals directurs chantunals dals affars socials (CDAS). Il post da coordinaziun cunter violenza a chasa dal Grischun è commember da la SKHG. Cumpetenzas essenzialas per realisar las pretensiuns han ils chantuns, particularmain la persecuziun penala, l'agid a victimas sco er la protecziun d'uffants e da creschids.

Ils 13 da november 2018 ha lieu a Berna ina conferenza naziunala, organisada dal UFEG, davart la Convenziun d'Istanbul. La conferenza mussa ils princips da la Convenziun d'Istanbul, infurmescha davart la responsabladad da dretg internaziunal e davart il process da monitoring dal cussegl da l'Europa. Dilucidada vegn la rolla da la confederaziun, dals chantuns e da las organisaziuns nunguvernamentalas en il process da realisaziun e sclerì vegn il fatg, co ch'els concepeschan lur collavuraziun en vista ad ina politica integrala e coordinada.

Tar las dumondas 2, 3 e 4: Dapi sia creaziun l'onn 2015 ha il post da coordinaziun cunter violenza a chasa prendì mesiras per sensibilisar las persunas, garantì il contact cun las conferenzas naziunalas ed inizià la cooperaziun da las instituziuns e dals uffizis participads en il chantun. En il rom da la proposta integrala han gì lieu scleriments cun la polizia chantunala, cun la procura publica, cun l'agid a victimas, cun l'uffizi da migraziun e da dretg civil, cun l'autoritad per la protecziun d'uffants e da creschids, cun la fundaziun "chasa per dunnas", cun l'uffizi per l'execuziun giudiziala, cun il post da cussegliaziun per persunas violentas, cun il medi chantunal, cun il departament d'educaziun e cun il post da stab per l'egualitad da las schanzas.

Suenter la conferenza naziunala davart la Convenziun d'Istanbul a Berna vegn il chantun Grischun ad examinar ils resultats e las mesiras recumandadas da la gruppa da lavur ed a decider davart l'ulteriur proceder sin fundament da ses scleriments entaifer il chantun. El ha l'intenziun da coordinar la realisaziun sche pussaivel sin plaun interchantunal.

27 da settember 2018