Navigaziun principala

Cuntegn da la pagina

Dumonda da la fracziun da la PBD concernent il dossier da pressa: decisiun da la CUMCO «Engiadina I»

sessiun: 24.10.2018

Cun la data dals 26 d'avrigl 2018 ha la cumissiun federala da concurrenza (CUMCO) tramess a la pressa sia decisiun «En­gia­dina I» che cumpiglia 5 paginas. En quella ha ella publitgà ils resultats da las retschertgas davart las cunvegnas da concur­ren­za tranter differentas interpresas da construcziun en la regiun Engiadina / Val Müstair.

Ordavant menziuneschan las sutsegnadras ed ils sutsegnaders ch'els sentenzieschan en tutta furma las cunvegnas da concur­renza e beneventan explicitamain che quests fatgs illegals vegnan sclerids cumplettamain e chastiads.

L'october 2018 ha la CUMCO publitgà danovamain in palpiri cun la data dals 26 d'avrigl 2018 e cun il medem titel. Il text cuntegna dentant differenzas cumpareglià cun l'ediziun da l'avrigl. Uschia vegni menziunà en l'emprima ediziun che las cun­vegnas hajan gì per consequenza ch'ils pretschs sajan stads en media per passa 45 % pli auts. En la segunda ediziun vegni ditg ch'ils pretschs sajan per var 25 – 45 % pli auts. En l'alinea suandant vegni explitgà che la CUMCO n'haja betg examinà, sch'igl haja insumma dà effects sin ils pretschs en consequenza da cunvegnas da submissiun. Citat: «En il cas avant maun n'ha ella betg stuì e betg pudì calcular l'eventual donn per las patrunas da construcziun.» Igl è nunchapibel che la CUMCO publitgescha presumziuns ch'ella n'ha betg examinà e na po betg cumprovar. La publicaziun da la decisiun da la CUMCO «Engiadina I» ha gì l'effect d'ina bumba en il Grischun. Il donn ch'è vegnì chaschunà per la politica e per il mastergn è grond. Il rest da la Svizra ha survegnì l'impressiun che cugliunarias tutgian tar il mintgadi en il Grischun.

Nus dumandain la regenza il suandant:

1.     Co stima la regenza il donn da reputaziun per il chantun Grischun, ch'è resultà tras il rapport da la CUMCO «Engiadina I»?

2.     Co giuditgescha la regenza la midada da la publicaziun da la CUMCO, explitgada qua survart?

3.     Ha la CUMCO e/u il chantun gia pronunzià sancziuns cunter ils manaschis fallibels? Sche gea, tge sancziuns èn quai?

4.     Co giuditgescha la regenza las sancziuns eventualmain pronunziadas per las lavurantas ed ils lavurants dals manaschis fallibels?

5.     Co ha la regenza l'intenziun d'intervegnir tar la CUMCO areguard las publicaziuns succedidas ed areguard las decleraziuns respectivas?

Cuira, ils 24 d'october 2018

Hardegger, Aebli, Bettinaglio, Buchli-Mannhart, Casty, Clalüna, Danuser, Ellemunter, Erhard, Gugelmann, Hefti, Hohl, Lamprecht, Loi, Michael (Donat), Müller (Susch), Niggli-Mathis (Grüsch), Papa, Tanner, Widmer (Favugn), Widmer-Spreiter (Cuira), Zanetti (Sent)

Resposta da la regenza

A partir dal 2012 ha la cumissiun federala da concurrenza (CUMCO) instradà retscher­tgas cunter totalmain 45 interpresas e cunter la societad grischuna dals impressaris constructurs. En il fratemp èn vegnidas terminadas otg da diesch retschertgas e sin basa da las cuntravenziuns constatadas cunter il dretg da cartels èn vegnidas pro­nunziadas sancziuns envers las interpresas da construcziun involvidas ("Val Mü­stair", "Engiadina I", "Engiadina III – VIII"). En l'ultim cas "Engiadina I" ha la CUMCO sanc­ziunà – cun la disposiziun dals 26 da mars 2018 – differentas interpresas da con­strucziun localas cun passa 7,5 milliuns francs. Cunter questa sancziun han singulas interpresas da construcziun fatg recurs tar il tribunal administrativ federal. En la di­sposiziun da sancziun "Engiadina I", ch'è publitgada sin la pagina d'internet da la CUMCO e che cumpiglia 301 paginas, pon ins leger ch'i èn vegnidas fatgas durant onns cunvegnas da concurrenza en differentas constellaziuns, cun l'intent da fixar ils pretschs e da reparter las lavurs tranter ils partenaris da fatschenta. La CUMCO designescha las cuntravenziuns constatadas cunter il dretg da cartels quasi senza excepziuns sco gravantas e las sancziunescha correspundentamain. Pertutgads da las cunvegnas da concurrenza èn – tenor la disposiziun da la CUMCO – er projects da construcziun dal chantun. Ils projects concrets dal chantun èn dentant cuvrids cun colur naira en la disposiziun u tutgan tar ils fatgs da la cunvegna globala, uschia ch'i n'è betg pussaivel d'identifitgar ils projects senza prender invista da las actas.

Cur che las decisiuns èn vegnidas communitgadas, ha il chantun mintgamai inoltrà immediatamain a la CUMCO ina dumonda da prender invista da las actas per pudair examinar, quant enavant ch'el è pertutgà. Las proceduras èn anc pendentas.

Tar la dumonda 1: Suenter retschertgas da blers onns ha la CUMCO constatà en il chantun Grischun en pliras proceduras cuntravenziuns cunter il dretg da cartels ed ha sancziunà quellas. Singulas proceduras han survegnì forza legala, autras èn anc pendentas davant il tribunal administrativ federal. Questas cunvegnas da pretschs e da territoris ch'èn vegnidas manadas a la glisch tras l'autoritad da concurrenza, han perturbà la confidenza da la regenza en la branscha da construcziun. Vitiers vegn che la CUMCO ha annunzià per l'onn 2019 in'ulteriura decisiun che pertutga l'entir territori chantunal. En vista a quests fatgs n'è il donn da reputaziun a disfavur dal chantun betg anc previsibel.

Tar la dumonda 2: Cuntrari al dossier da pressa da 5 paginas ch'è vegnì publitgà sin la pagina d'internet da la CUMCO sco infurmaziun supplementara tar la communica­ziun da pressa, n'ha la CUMCO betg adattà sia disposiziun "Engiadina I" dals 26 da mars 2018. Cunter la disposiziun da la CUMCO èsi vegnì fatg recurs tar il tribunal administrativ federal. Per il chantun è giuridicamain decisiva unicamain la sentenzia dal tribunal administrativ federal.

Tar la dumonda 3: La CUMCO ha per part adossà multas considerablas a las inter­presas da construcziun involvidas. En il cas "Val Müstair" ha la CUMCO desistì d'ina sancziun, perquai che las interpresas pertutgadas han denunzià sasezzas. Suenter ch'il cas "Val Müstair" ha survegnì forza legala ed en consequenza dal fatg ch'ina interpresa che aveva suttamess offertas al chantun era pertutgada, ha la regenza exclus questa interpresa – cun il conclus dals 6 da mars 2018 – per ina durada limi­tada da las acquisiziuns dal chantun. Questa exclusiun tenor il dretg da submissiun è vegnida contestada da l'offerenta pertutgada tar la dretgira administrativa dal chan­tun Grischun, nua che la procedura è anc pendenta.

Tar la dumonda 4: L'autezza da la multa vegn fixada da la CUMCO tenor il princip da commensurabladad. La CUMCO fixescha la sancziun resguardond la situaziun finan­ziala da las interpresas.

Tar la dumonda 5: La regenza agescha unicamain sin basa da las decisiuns da la CUMCO resp. dal tribunal administrativ federal. Las infurmaziuns da la CUMCO a las medias pertutgan percunter partidas da procedura resp. adressatas ed adressats da la disposiziun da la CUMCO.

8 da schaner 2019