Navigation

Inhaltsbereich

Incumbensa Horrer concernent il temp da carenza per anteriurs commembers da la regenza da surpigliar mandats en cussegls d'administraziun

Sessiun: 24.10.2018

Ils ultims onns hai dà blers cas, nua che commembers da la regenza han surpiglià mandats en cussegls d'administraziun suenter avair terminà lur activitad guvernativa. Per la populaziun è in tal cumportament nunchapibel. Quai vala cunzunt, sche l'interpresa ha survegnì incaricas dal chantun durant la perioda guvernamentala da l'anteriur commember da la regenza, ubain sche l'interpresa ha in'autra ferma dependenza dal chantun. Quai fa donn a la reputaziun da las instituziuns grischunas e sveglia senza dubi il suspect da filz u da nepotissem. Quai fa er donn (nungiustifitgadamain) a la reputaziun da la regenza en uffizi.

Ils commembers da la regenza èn suttamess al princip da secretezza. Sche anteriurs commembers da la regenza portan lur enconuschientschas en interpresas privatas sco commembers da cussegls d'administraziun, resultan inevitablamain conflicts d'interess. Tranter auter per evitar quests conflicts d'interess survegnan ils commembers da la regenza ina renta da vegliadetgna. La finamira da questa renta da vegliadetgna èsi pia da garantir l'independenza dals commembers da la regenza. En il passà èsi sa mussà che la voluntariadad na gida nagut en quest punct.

Las sutsegnadras ed ils sutsegnaders incumbenseschan perquai la regenza:

Da stgaffir la basa legala per introducir in temp da carenza da surpigliar mandats dal cussegl d'administraziun en interpresas che survegnan incaricas dal chantun u che han in'autra ferma dependenza dal chantun. Interpresas ch'eran en agen possess d'in commember da la regenza avant si'activitad guvernamentala ston vegnir exclusas dal temp da carenza. La basa legala po prevair ulteriuras regulaziuns excepziunalas raschunaivlas.

Cuira, ils 24 d'october 2018

Horrer, Stocker, Schneider, Atanes, Baselgia-Brunner, Brandenburger, Cahenzli-Philipp, Degiacomi, Della Cà, Deplazes (Cuira), Dürler, Favre Accola, Gasser, Gort, Hofmann, Hohl, Kappeler, Locher Benguerel, Mittner, Müller (Favugn), Noi-Togni, Perl, Preisig, Rettich, Rutishauser, Schwärzel, Tanner, Thöny, von Ballmoos, Widmer (Favugn), Wilhelm, Zanetti (Sent), Spadarotto

Resposta da la regenza

En il passà han ils anteriurs commembers da la regenza regularmain cuntinuà cun in'activitad da gudogn e mintgatant er surpiglià in mandat en in cussegl d'admini­stra­ziun. Tras in temp da carenza legal vegniss impedida facticamain la pussaivladad per ils commembers da la regenza partents da surpigliar ina nova activitad adequata. L'intervenziun respectiva en il dretg fundamental da la libertad economica fiss con­si­derabla. En spezial vegniss restrenschì il dretg constituziunal da la libra tscherna da la professiun e da l'access liber ad ina activitad da gudogn en l'economia privata.

Tenor la regenza tutgi tar la tradiziun (er tar la confederaziun ed ils auters chantuns) ch'ils commembers da la regenza s'engaschan suenter lur demissiun a favur da la societad e da l'economia, particularmain, sch'els èn giuvens cur ch'els sortan da lur uffizi. Quai n'è betg sco ultim er in'expressiun da noss sistem da milissa, tenor il qual uffizis cumplains, sco quel d'ina cussegliera guvernativa u d'in cusseglier guvernativ, pon vegnir exequids giustifitgadamain mo per in temp limità. Sin basa da lur expe­rientscha e da lur relaziuns adempleschan els las premissas necessarias per l'econo­mia privata, dentant er per la collavuraziun en organisaziuns d'utilitad publica. Las organisaziuns menziunadas sco ultimas pon esser concepidas giuridicamain er sco societads anonimas e disponan pia d'in cussegl d'administraziun.

Ils commembers da la regenza èn obligads a la discreziun en fatschentas uffizialas, uschenavant ch'igl exista in interess public u privat predominant da tegnair secret las fatschentas tenor la lescha da transparenza u sch'ina disposiziun legala speziala pre­vesa quai. Il secret d'uffizi sto vegnir mantegnì er suenter l'extrada or da l'uffizi (art. 5 al. 1 da la lescha davart l'organisaziun da la regenza e da l'administraziun, DG 170.300). Uschia pon vegnir impedids conflicts d'interess.

In temp da carenza avess ultra da quai consequenzas negativas per las finanzas dal chantun. En la lescha davart ils salaris e davart la prevenziun professiunala da las commembras e dals commembers da la regenza (DG 170.380) vegn fixada l'autezza da la pensiun. Entradas da gudogn èn previsas explicitamain e chaschunan a partir d'ina tscherta summa ina reducziun da la pensiun. In temp da carenza difficultass, gea impediss schizunt la pussaivladad dals commembers da la regenza partents da realisar entradas da gudogn, cunzunt er perquai che las dumondas da surpigliar uf­fizis u mandats entran tenor l'experientscha oravant tut il mument da la demissiun. Tras quai stuessan vegnir pajadas las pensiuns cumplainas.
La finamira duess esser vinavant ch'ils commembers da la regenza partents pli giu­vens restan persunas cun activitad da gudogn e na dovran perquai betg la pensiun cumplaina. Tras quai po er vegnir cuntanschida ina distgargia finanziala giavischada dal chantun.

Sa basond sin questas consideraziuns propona la regenza al cussegl grond da refusar questa incumbensa.

13 da december 2018