Navigation

Inhaltsbereich

Incumbensa Florin-Caluori concernent il scleriment da la cumpetenza per pajar ils custs da la gestiun da mandats resp. las indemnisaziuns a favur da las curatellas professiunalas en il chantun Grischun

Sessiun: 12.02.2019

I n'è betg cler, tge vischnanca ch'è responsabla per pajar ils custs d'indemnisaziun dals procuraturs professiunals. Oz vegnan quints che las curatellas professiunalas tschentan per lur lavur, tramess vi e nà d'ina vischnanca a l'autra. Quai sto vegnir scle­rì. La finamira è quella ch'i vegnia designada la vischnanca ch'è responsabla per surpigliar ils custs.

Plinavant vegni pretendì ch'ils custs vegnian repartids tranter las vischnancas tenor la durada da l'obligaziun da sustegn (scleri­ment dals puncts da contact).

La procuratura u il procuratur ha il dretg d'ina indemnisaziun commensurada e d'ina cumpensaziun da las spesas. L'autoritad per la protecziun da creschids fixescha l'autezza da l'indemnisaziun en ina disposiziun.

Sche quests custs da la gestiun da mandats na pon betg vegnir pajads ord la facultad da la persuna pertutgada u betg vegnir adossads a terzas persunas, ston els – tenor l'art. 63a al. 2 LItCCS – vegnir surpigliads da quella communitad ch'è cumpetenta per il sustegn tenor il dretg public. Tenor l'art. 5 da la lescha chantunala da sustegn (DG 546.250) è quai quella vischnanca politica, en la quala la persuna basegnusa ha ses domicil.

Sch'ina persuna basegnusa sut curatella mida dentant ses domicil entaifer il chantun Grischun, sa tschenta en la pratica la du­monda betg sclerida, sche la nova vischnanca da domicil sto surpigliar er quels custs da la gestiun da mandats ch'èn resultads avant la midada da domicil. Plinavant n'èsi er betg cler, tge mument ch'è decisiv per fixar la basegnusadad e sch'ils custs da la gestiun da mandats pon vegnir adossads a la persuna sut curatella er, sche quai tanghescha l'import da facultad liber da taglia tenor il dretg d'agid social.

Tras la cumplettaziun da l'art. 29 da l'ordinaziun davart la protecziun d'uffants e da creschids (OPUC; DG 215.010) èsi pussai­vel da schliar las dumondas dispitaivlas ed uschia da stgaffir la segirezza giuridica urgentamain necessaria.

Las sutsegnadras ed ils sutsegnaders incumbenseschan la regenza da cumplettar l'art. 29 OPUC:

L'art. 29 OPUC duai vegnir cumplettà cun in alinea 4 che ha la suandanta formulaziun:

4 Ils custs che ston vegnir surpigliads da la communitad tenor l'artitgel 63a LItCCS, vegnan repartids sin las vischnancas politicas tenor la durada da lur obligaziun da sustegn. Obligada da pajar prestaziuns preliminaras è la communitad che ha in'obligaziun da sustegn il mument che l'autoritad per la protecziun d'uffants e da creschids prenda la decisiun.

L'art. 29 OPUC duai vegnir cumplettà cun in alinea 5 che ha la suandanta formulaziun:

5 Tut ils custs ston vegnir surpigliads da la communitad responsabla, sche la facultad da la persuna pertutgada è pli bassa che l'import da facultad liber da taglia tenor il dretg d'agid social, resguardond la grevezza da l'indemnisaziun e las spesas a la fin da la perioda da rapport ch'è vegnida controllada da l'autoritad per la protecziun d'uffants e da creschids.

Cuira, ils 12 da favrer 2019

Florin-Caluori, Natter, Degiacomi, Atanes, Baselgia-Brunner, Berther, Bondolfi, Brandenburger, Brunold, Cahenzli-Philipp, Caluori, Cantieni, Cavegn, Crameri, Della Cà, Deplazes (Cuira), Deplazes (Rabius), Derungs, Epp, Fasani, Flütsch, Gasser, Grass, Gugelmann, Hartmann-Conrad, Hitz-Rusch, Hofmann, Horrer, Kasper, Kohler, Kunfermann, Locher Benguerel, Loepfe, Maissen, Märchy-Caduff, Michael (Donat), Müller (Favugn), Noi-Togni, Paterlini, Preisig, Ruckstuhl, Rüegg, Rutishauser, Sax, Schmid, Thomann-Frank, Thöny, Tomaschett (Breil), von Ballmoos, Weidmann, Wieland, Wilhelm, Buchli (Tenna), Holliger

Resposta da la regenza

Dapi il 1. da schaner 2013 posseda il chantun Grischun tschintg autoritads per la pro­tecziun d'uffants e da creschids (APUC) independentas. Ils custs per mesiras da las APUC ston vegnir surpigliads da la persuna pertutgada u dals titulars da la tgira genitur­iala, nun che terzas persunas sajan obligadas da surpigliar quests custs. En moda subsidiara ston els vegnir surpigliads da la communitad ch'è cumpetenta per il sustegn tenor il dretg public (art. 63a da la lescha introductiva tar il cudesch civil sviz­zer, LItCCS; DG 210.100). L'obligaziun da sustegn è chaussa da la vischnanca politi­ca, en la quala la persuna basegnusa ha ses domicil (art. 5 al. 1 da la lescha davart il sustegn da persunas basegnusas, lescha chantunala da sustegn; DG 546.250). Dapi l'existenza da las APUC han questas regulaziuns adina puspè procurà per in­tschertez­zas e per malchapientschas. Quai ha mussà il basegn da revisiun.

Concernent l'obligaziun da prestaziun tras la communitad ch'è cumpetenta per il sustegn interpreteschan las APUC dal chantun Grischun l'art. 63a LItCCS en cum­binaziun cun l'art. 5 da la lescha chantunala da sustegn – en il senn d'ina applicaziun unitara dal dretg – actualmain tuttina, sco ch'igl è vegnì formulà en l'incumbensa. I vegn sa basà sin il mument da la vigur da la decisiun per fixar l'indemnisaziun dals mandataris, perquai ch'ils custs vegnan mess a quint a la persuna pertutgada pir cun la decisiun da la APUC. Ma las regiuns pratitgeschan oz differentamain la surpigliada dals custs. Dapi il december 2018 è questa tematica l'object d'ina procedura da la dretgira administrativa dal chantun Grischun.

La problematica concernent ina regulaziun per pajar ils custs da la gestiun da man­dats resp. las indemnisaziuns a favur da las curatellas professiunalas tras la com­munitad respectivamain tras las vischnancas politicas sto vegnir schliada sin plaun surcommunal. Actualmain lavura il departament da giustia, segirezza e sanadad (DGSS) vi d'ina revisiun da la LItCCS pertutgant il sectur da la protecziun d'uffants e da creschids. I na para betg cunvegnent d'adattar ordavant in singul artitgel en l'or­dina­ziun. La disposiziun per pajar ils custs da la gestiun da mandats resp. las in­demnisaziuns a favur da las curatellas professiunalas tras las vischnancas dovra ultra da quai ina regulaziun en ina lescha formala, pervia da l'intensitad da l'inter­venziun. Pia duai questa problematica vegnir examinada en il rom da la revisiun currenta da la lescha. Per quest intent ston vegnir resguardadas las enconuschien­tschas da la proxima decisiun da la dretgira administrativa e quellas da la lavur da las APUC dals ultims 6 onns. En in ulteriur pass ston vegnir examinadas eventualas adattaziuns sin il stgalim da l'ordinaziun e – sche necessari – realisadas da la regenza.

Sa basond sin questas consideraziuns propona la regenza al cussegl grond da midar l'incumbensa qua avant maun sco suonda:

La regenza examinescha la regulaziun legala concernent la cumpetenza per pajar ils custs da la gestiun da mandats resp. las indemnisaziuns a favur da las curatellas professiunalas en il chantun Grischun en il rom da la revisiun currenta da la lescha.

1. da matg 2019