L'emprim vali da fixar che cumpensar n'è betg il medem sco reducir u evitar. Per cun­tanscher la finamira primara, pia da reducir u d'evitar las emissiuns da CO₂ è la re­gen­za sa declerada pronta d'acceptar l'incumbensa Wilhelm (Green Deal per il Gri­schun: nizzegiar la protecziun dal clima sco schanza) ch'è vegnida acceptada dal cussegl grond cun gronda maioritad en ina furma revedida en la sessiun da zercladur 2019. En quest senn han mesiras per proteger il clima ina gronda prioritad per la regenza.

Dapi l'onn 2013 è francada en la lescha naziunala davart il CO₂ in'obligaziun da cum­pensaziun per ils importaders da carburants fossils. Quels vegnan obligads da redu­cir ina part da las emissiuns chaschunadas dal traffic en Svizra cun mesiras (usche­num­nads "projects da cumpensaziun") en la dimensiun da lur obligaziun da cumpen­saziun. Quests projects da cumpensaziun resp. las reducziuns da las emissiuns che resultan dad els ston ademplir dus criteris centrals: Senza il retgav da la vendita da las attestaziuns sto il project da cumpensaziun esser nunrentabel (criteri da l'addiziu­na­litad concernent las investiziuns) ed el sto effectuar cumprovadamain ina reduc­ziun supplementara da las emissiuns che po vegnir mesirada fisicalmain (criteri da l'addiziunalitad concernent la reducziun da las emissiuns). L'observaziun sco er la controlla da quests criteris chaschunan fitg blera lavur tant per ils sviluppaders da projects sco er per las autoritads executivas. Quai sa mussa en la media dal pretsch per ina tonna CO₂ cumpensada (var 100 francs) ed en la lavur d'execuziun da vart da la confederaziun. L'installaziun d'ina execuziun correspundenta ha durà plirs onns tar la confederaziun ed ils custs da persunal èn considerabels cun var 10 persunas en l'administraziun federala, cun l'accreditaziun da var 10 posts da controlla e cun la gestiun da la banca da datas per administrar ils projects da cumpensaziun naziunals e las reducziuns da las emissiuns.

Ultra da l'obligaziun da cumpensaziun reglada per lescha exista la cumpensaziun facultativa d'emissiuns da CO₂, enconuschenta en spezial en connex cun viadis per aviun. Quella po vegnir liquidada gia oz en moda favuraivla areguard il pretsch e cun pauca lavur sur plattafurmas d'internet existentas. Questas cumpensaziuns èn favu­raivlas, perquai ch'i sa tracta d'ina vart da la cumpra da certificats per reducir emis­siuns da projects da reducziun da l'exteriur e perquai che la controlla dals projects da reducziun esters inclusiv la redacziun e l'administraziun dals certificats da clima vegn garantida da l'autra vart tras la ONU. Questas cumpensaziuns facultativas prenda l'in­cumbensa Kappeler en mira essend ch'ella na vuless betg far las reducziuns da las emissiuns a l'exteriur, mabain entaifer il chantun ed a favur da l'economia grischuna.

Er en il sectur da las cumpensaziuns facultativas èn l'installaziun e la gestiun d'ina plattafurma da cumpensaziun colliadas cun ina lavur considerabla. Ina plattafurma da cumpensaziun correspundenta na duess pervia da quai betg vegnir realisada dal chantun Grischun en atgna reschia, mabain en collavuraziun cun auters chantuns. En il chantun Friburg exista dapi l'onn 2018 ina plattafurma da la fundaziun "Carbon Fri" che vegn purtada da la banca chantunala friburgaisa, da la chombra da commer­zi e d'industria sco er da l'interpresa per climate services. La fundaziun certifitgescha process, products e servetschs d'interpresas en il chantun Friburg sut la premissa, che las emissiuns da CO₂ vegnian reducidas e che per las emissiuns da CO₂ restan­tas vegnia pajada a la fundaziun ina contribuziun tranter 10 e 20 francs per tonna CO₂. Ils daners che vegnan rimnads uschia returnan alura, dirigids da la fundaziun, en l'economia intrachantunala a favur da projects per proteger il clima. L'avrigl da quest onn ha la regenza dal chantun Friburg surpiglià in postulat che extenda ils servetschs che vegnan purschids da la fundaziun er sin las burgaisas ed ils burgais dal chantun Friburg.

L'installaziun e la gestiun d'ina plattafurma da cumpensaziun en atgna reschia e tras l'administraziun chantunala n'è betg da beneventar. Percunter para in proceder ense­men cun auters chantuns, che sa basa sin las lavurs preparatoricas dal chantun Fri­burg, d'esser degn da vegnir examinà.

Sa basond sin questas consideraziuns propona la regenza al cussegl grond da midar questa incumbensa sco suonda:

La regenza examinescha, sche u sut tge circumstanzas ch'ina plattafurma chantuna­la da cumpensaziun da CO₂ pudess vegnir realisada en collavuraziun cun auters chan­tuns.

21 d'avust 2019