Cuntegn da la pagina

Dumonda Kappeler concernent BIM (building information modeling)

sessiun: 13.06.2019

A chaschun da la sessiun d'avust 2018 ha il cussegl grond discutà il tema stausch a la digitalisaziun ed ha incumbensà la regenza da stgaffir las basas per in credit d'impegn correspundent da 40 milliuns francs.

Il building information modeling BIM (definiziun guarda sutvart) è in element da la digitalisaziun en la branscha da construcziun. En la planisaziun d'ina ovra architectonica èn involvidas las pli differentas organisaziuns, uschia sco incumbensader d'ina dimensiun pli gronda er il maun public. Las VFF prescrivan obligatoricamain BIM per lur immobiglias a partir da l'onn 2021; per ils projects d'infrastructura a partir da l'onn 2025.

Las sutsegnadras ed ils sutsegnaders dumondan la regenza en quest connex:

1.     Tge è il stadi actual areguard BIM tar il chantun (construcziun auta e bassa)?

2.     A partir da cura duain projects chantunals vegnir planisads obligatoricamain cun agid da BIM (construcziun auta e bassa)?

3.     Co garantescha il chantun che – en vista a las pretensiuns tenor BIM – er furniturs da servetschs ed interprendiders pli pitschens pon participar ad incumbensas chantunalas (construcziun auta e bassa)?

4.     Tge mesiras cumplementaras prevesa il chantun areguard BIM (p.ex. scolaziun e furmaziun supplementara a la SATE)?

Definiziun: Il building information modeling (BIM, modellar las datas d'ovras architectonicas) è ina metoda per optimar la planisaziun, la realisaziun e la gestiun d'edifizis e d'autras ovras architectonicas cun agid da software. Per quest intent vegnan modelladas, cumbinadas e registradas digitalmain tut las datas relevantas d'ovras architectonicas. L'ovra architectonica è alura visualisada er geometricamain sco model virtual.

Puntraschigna, ils 13 da zercladur 2019

Kappeler, Loepfe, Hug, Alig, Atanes, Berther, Bigliel, Brunold, Buchli-Mannhart, Cahenzli-Philipp, Cavegn, Censi, Della Cà, Deplazes (Cuira), Derungs, Dürler, Engler, Felix, Flütsch, Gasser, Geisseler, Giacomelli, Hitz-Rusch, Hofmann, Holzinger-Loretz, Horrer, Jochum, Kohler, Kuoni, Müller (Favugn), Niggli-Mathis (Grüsch), Papa, Paterlini, Perl, Rettich, Rutishauser, Schmid, Schutz, Schwärzel, Thöny, Ulber, von Ballmoos, Waidacher, Zanetti (Landquart), Pajic

Resposta da la regenza

La noziun "building information modeling" (curtamain: BIM; rumantsch: modellaziun da las datas da l'ovra da construcziun) è ina metoda per preschentar ovras da construcziun a maun d'in model digital traidimensiunal cun tut lur infurmaziuns relevantas (p.ex. classificaziun da las parts da l'edifizi e da las installaziuns tecnicas, surfatschas exactas dal funs e da las fanestras e.u.v.). Cuntrari a la planisaziun classica da construcziun lavura – en projects BIM – tut il team da planisaziun sin ina interfatscha averta vi d'in unic "schumellin" virtual da l'ovra da construcziun. Per las planisadras ed ils planisaders consista la plivalur da questa metoda da process da coordinaziun pli simpels sur differents secturs spezials e d'ina moda da lavurar pli sistematica. Per las patrunas ed ils patruns da construcziun sco er per las administràturas ed ils administraturs d'immobiglias daventa il process da planisaziun pli transparent e pli chapaivel. Cun las datas structuradas tenor BIM stattan ultra da quai a disposiziun basas preziusas per planisar e per optimar l'administraziun da construcziun gia baud en il project. Studis da lunga durada da l'exteriur mussan ch'il diever da BIM lascha cuntanscher augments d'effizienza en las finamiras dal project, en ils termins ed en ils custs d'ina dimensiun da 5-10 pertschient.

En differents pajais europeics è BIM in standard da planisaziun etablì e per part prescrit tras lescha (p.ex. Engalterra, Norvegia, Danemarc). La Germania vul introducir BIM per ses projects d'infrastructura publics a partir da l'onn 2020, la Frantscha a partir da l'onn 2022. Tenor il plan d'acziun digital dal cussegl federal duain la confederàziun e tut las interpresas federalas applitgar obligatoricamain la metoda BIM per immobiglias a partir da l'onn 2021 e per stabiliments d'infrastructura a partir da l'onn 2025. Per sviluppar vinavant BIM prevesa il plan d'acziun ultra da quai da promover finanzialmain l'uniun "Construir digital Svizra" che vala sco plattafurma principala per la transfurmaziun digitala da l'economia da construcziun ed immobigliara svizra. Il chantun Grischun è commember da questa uniun ed è represchentà activamain en gruppas d'experts. L'edifizi administrativ "sinergia" a Cuira cun sia disposiziun  integrala che integrescha l'administraziun da l'edifizi (uschenumnà "BIM2FM") tutga tenor "Construir digital Svizra" actualmain tar la "meglra pratica" en Svizra.

Tar la dumonda 1: L'uffizi da construcziun auta (UCA) elavura actualmain quatter projects d'immobiglias sin basa da BIM (basa per il mantegniment da las vias Bernina, edifizi administrativ "sinergia", center da dietas Plantahof, basa da la polizia da traffic San Bernardin). L'uffizi chantunal da construcziun bassa (UCB) ha projectà – en il rom d'in project da pilot – la renovaziun dal tunnel "Frauentobel" sin la via dal Scanvetg tenor BIM.

Tar la dumonda 2: Il UCA ha decidì da planisar tut ils projects da construcziun futurs pli gronds e/u pli cumplexs sco projects da BIM. Il focus sa chatta sin BIM2FM, pia sin la surpigliada da tut las datas relevantas en il sistem d'administraziun da l'edifizi. L'onn passà ha il UCB nominà ina gruppa da lavur per evaluar las experientschas da pilot cun BIM e per elavurar ina strategia concernent BIM per il sectur da construcziun bassa. Il termin per introducir eventualmain in standard BIM en il sectur da construcziun bassa dal chantun n'è pia anc betg fixà.

Tar la dumonda 3: Infurmaziuns a radunanzas da delegads e referats en federaziuns plenaras han rendì attent las planisadras ed ils planisaders che BIM valia en il futur – almain en il sectur da construcziun auta – sco standard per planisar edifizis chantunals. La lavur iniziala ch'ina planisadra u in planisader sto prender sin sai po vegnir dumagnada a custs raschunaivels. Quai è sa mussà a chaschun dals projects actuals da BIM. La gronda part dals biros ha dumagnà quest pass cun "learning by doing".

Tar la dumonda 4: Durant ils ultims 3 onns ha il chantun pudì far emprimas experientschas cun BIM particularmain en il rom da projects da pilot en il sectur d'immobiglias, ed ha pudì stgaffir basas ch'èn sa cumprovadas en la pratica. Questas basas pon vegnir dadas vinavant – er ordaifer projects – a la vasta branscha da planisaziun e promovan uschia il diever da BIM en il chantun. Ultra da quai pon las purschidras ed ils purschiders indigens da furmaziun sustegnair quest process da transfurmaziun en il sectur da construcziun e da planisaziun cun agid da purschidas da perfecziunament respectivas.

29 d'avust 2019