Navigation

Inhaltsbereich

Dumonda Pajic concernent ina statistica en il sectur d'agressiuns cunter LGBTQ

Sessiun: 13.06.2019

Malgrà blers progress en il cumbat per ils dretgs da persunas LGBTQ (LGBTQ stat per «lesbian, gay, bisexual, trans, queer» e designescha tut ils umans che localiseschan lur orientaziun sexuala e/u lur identitad da schlattaina lunsch davent da la normativitad eterosexuala) sto anc vegnir fatga ina lunga via per propi cuntanscher l'egualitad. En spezial vegnan persunas LGBTQ anc oz confruntadas en il chantun Grischun regularmain cun violenza psichica, verbala, corporala u sexuala. Questa violenza è quotidiana: Las federaziuns da tetg da LGBTQ registreschan a maun d'ina helpline en media dus crims per odi per emna cunter persunas LGBTQ en Svizra. E la dimensiun da la violenza corporala cun bunamain in terz dals cas è fitg schoccanta. Il dumber zuppà da cas betg annunziads è plinavant fitg aut.

Statisticas uffizialas en chaussa mancan deplorablamain: Malgrà numerusas cunvegnas internaziunalas, suttascrittas da la Svizra, na registreschan las autoritads polizialas betg il caracter omofob, bifob, interfob e transfob d'acts da violenza psichica e verbala. Perquai ha il cussegl da l'Europa recumandà en ses 5. rapport davart la Svizra 2014 a las autoritads da finalmain registrar «datas statisticas davart motivs rassistics, omofobs u transfobs d'acts chastiabels». L'extensiun da la norma penala d'antidiscriminaziun ch'il parlament naziunal ha concludì l'atun passà per il criteri da la «orientaziun sexuala» vegn bain – sco nov causal penal – a chaschunar la registraziun da tscherts tips da delicts per odi cunter persunas omosexualas e bisexualas. Quai na vala dentant insumma betg per tut ils acts chastiabels che sa basan sin in motiv LGBTQ-fob.

Ch'ina gronda part da las agressiuns cunter LGBTQ na vegnan betg chastiadas, ha per consequenza che las victimas taschan, han tema, s'isoleschan e fan mintgatant suicid – en spezial giuvenils. I vegn stimà che mo 10 – 20 % dals cas da violenza cunter LGBTQ vegnan denunziads. Tenor indicaturs svizzers è il dumber da suicids tar giuvenils che n'èn betg eterosexuals, 5 giadas pli aut che tar giuvenils eterosexuals. Per persunas transsexualas ed intersexualas è il privel schizunt 10 giadas pli grond.

En vista a l'augment actual d'attatgas fisicas e verbalas cunter persunas LGBTQ che vegnan annunziadas a las organisaziuns chantunalas e naziunalas, èsi anc pli urgent da midar la pratica actuala da la polizia e da registrar cleramain las agressiuns cunter LGBTQ en ils chantuns. Per quest intent èsi medemamain impurtant d'instruir las autoritads giudizialas e polizialas en ina scolaziun da basa e d'elavurar recumandaziuns d'agir. Las statisticas vegnan a dar in maletg cler da la situaziun da segirezza en il chantun Grischun. Igl è indispensabel ch'il stadi enconuschia la dimensiun da questas agressiuns per pudair reagir en moda effizienta cunter ils crims per odi.

Las sutsegnadras ed ils sutsegnaders da questa intervenziun parlamentara vulan dar in ferm signal a las autoritads dal chantun Grischun per ch'il chantun s'engaschia cunter mintga gener da violenza cunter persunas LGBTQ e ch'el fetschia tut per che quellas vegnian protegidas en lur integritad e dignitad. Da quai resultan pia las suandantas dumondas:

1.     Fiss la regenza pronta da midar la pratica vertenta da la polizia uschia che agressiuns cun in caracter LGBTQ-fob en il chantun vegnian registradas, analisadas e publitgadas en ina statistica?

2.     Fiss la regenza pronta d'extender la scolaziun da las polizias chantunalas e communalas cun ina scolaziun per dar dumogn ad agressiuns cunter LGBTQ?

3.     Tge stentas ha il chantun Grischun fatg fin ussa per proteger persunas LGBTQ cunter crims per odi?

4.     Tge mesiras futuras ha la regenza planisà per pudair proteger persunas LGBTQ en moda pli efficazia cunter discriminaziun e cunter crims per odi?

5.     Tge mesiras ha la regenza planisà per reducir il dumber da suicids ch'è 5 fin 10 giadas pli aut tar giuvenils LGBTQ?

Puntraschigna, ils 13 da zercladur 2019

Pajic, Hofmann, Widmer (Favugn), Atanes, Baselgia-Brunner, Cahenzli-Philipp, Cantieni, Caviezel (Cuira), Deplazes (Cuira), Epp, Gasser, Gugelmann, Hardegger, Hitz-Rusch, Holzinger-Loretz, Horrer, Kohler, Locher Benguerel, Maissen, Märchy-Caduff, Müller (Favugn), Niggli-Mathis (Grüsch), Noi-Togni, Perl, Preisig, Rettich, Rutishauser, Schwärzel, Thomann-Frank, Thöny, Tomaschett-Berther (Trun), Wilhelm

Resposta da la regenza

Tenor la regenza èsi impurtant da proteger minoritads e da promover l'eliminaziun da mintga furma da discriminaziun, en spezial pervia da l'orientaziun sexuala u da l'identitad da schlattaina. 

Tar la dumonda 1: L'uffizi federal da statistica (UFS) ha dumandà la primavaira ils chantuns, sch'ils acts chastiabels cunter persunas LGBTQ (lesbas, omosexuals, bisexuals, transgender, queer) duain vegnir registrads separadamain en la statistica criminala. La maioritad dals chantuns è s'exprimida cunter la registraziun dal motiv supplementar per in act chastiabel. Ils acts chastiabels cunter persunas LGBTQ na vegnan – tenor l'UST cumpetent – pia er en l'avegnir betg registrads separadamain en la statistica criminala. La registraziun en la statistica criminala po mo vegnir deci­dida da l'UST. Uscheditg che crims per odi envers persunas LGBTQ na represchen­tan betg in agen causal penal u che l'indicaziun differenziada d'in motiv n'è betg obli­gatorica en tut ils chantuns, n'èsi betg pussaivel da publitgar datas respectivas d'auta qualitad en la statistica naziunala. Retschertgas statisticas expressivas èn mo pus­saivlas, sche las cifras vegnan registradas en moda unitara en tut la Svizra e sch'i stat a disposiziun ina quantitad da datas expressiva. Ultra da quai permetta la re­gistraziun ordaifer la statistica criminala da trair conclusiuns davart l'orientaziun sexuala d'ina persuna. Per motivs da la protecziun da datas è quai problematic. La regenza sustegna però en il futur la registraziun en la statistica criminala.

Tar la dumonda 2: Da princip ston vegnir chattadas soluziuns en il rom da tut la societad. Ina scolaziun ed ina sensibilisaziun da las autoritads da persecuziun pena­la, en spezial da la polizia, per las sfidas las pli differentas che resultan en il mintgadi da la polizia, ha gia lieu en il rom d'examen "Dretg uman ed etica". 

Tar la dumonda 3: Il pli efficazi èn las denunzias da las persunas pertutgadas tar la polizia, schebain ch'i dat probablamain per differents motivs tschertas retegnien­tschas. Mintga polizista e mintga polizist vegn a prender encunter ina tala denunzia. La finala ha la persecuziun penala in grond effect preventiv.

Tar la dumonda 4: Tgi che instighescha en il futur cunter persunas LGBTQ sto far quint cun consequenzas. Il december 2018 ha il parlament federal decidì da chastiar la discriminaziun pervia da l'orientaziun sexuala, e quai cun extender l'artitgel d'anti­rassissem. Fin ussa era scumandada l'incitaziun a l'odi ed a chaussas sumegliantas envers rassas, etnias u religiuns. Ina persecuziun penala ed ina giurisdicziun conse­quenta èn ina protecziun efficazia cunter discriminaziun e cunter crims per odi. 

Tar la dumonda 5: A chaschun da la sessiun dals giuvenils dals 11 da november 2018 è vegnì pretendì il sustegn statal per ina rait cun l'intent da reducir il fitg aut dumber da suicids tar giuvenils LGBTQ. Ad ina soluziun federala sa participass er la regenza. Ultra da quai sustegna il chantun mintga onn la cussegliaziun e l'agid 147 da la Pro juventute Svizra e pia er la campagna "Prevenziun dal suicid da giuvenils". Avant 2 onns han ils servetschs psichiatrics dal Grischun (SPGR) cumenzà cun l'installaziun d'ina ura da consultaziun per la diversitad da las schlattainas. A medem temp organiseschan ils SPGR differentas occurrenzas sco referats e discussiuns al podium per sensibilisar ed infurmar.

23 d'avust 2019