Navigation

Inhaltsbereich

Incumbensa Gasser concernent dapli electricitad per il Grischun producida l'enviern cun fotovoltaica

Sessiun: 14.06.2019

La regenza vegn incumbensada da pajar – en il process legislativ current tar la nova lescha chantunala d'energia – in supplement per implants fotovoltaics che han ina producziun surproporziunala durant l'enviern (relaziun tranter la producziun durant l'enviern e la producziun durant la stad sto esser surproporziunala). Quai è pussaivel en las regiuns muntagnardas dal Grischun, p.ex. cun construir implants fotovoltaics verticals tar mirs da lais d'accumulaziun, tar gallarias da via, tar telefericas e.u.v. La finanziaziun succeda en moda neutrala concernent la quota statala.

Motivaziun
La strategia d'energia 2050 è vegnida acceptada cleramain dal pievel. Ella cuntegna er la renunzia a la forza electrica atomara e la promoziun d'energias localas regenerablas. La Svizra dispona per quai da premissas idealas: En las Alps cuntanschain nus per l'energia solara cun fin a 1600 kWh/m2 relaziuns spagnolas. L'electricitad solara en las Alps n'è betg mo raschunaivla pervia da las grondas valurs d'irradiaziun, mabain en spezial er pervia dals gronds retgavs durant l'enviern. Implants fotovoltaics da la Svizra bassa èn suttamess a grondas divergenzas stagiunalas. La stad produceschan els per regla dapli electricitad che quai ch'il martgà dovra, entant ch'els produceschan durant l'enviern mo pli la mesadad da l'electricitad producida la stad. Ils motivs per quai èn las uras cun glisch dal di pli raras, tschajera, sco er nivels da stratus bassas che impedeschan cunzunt en regiuns pli bassas l'irradiaziun dal sulegl. Per gulivar la differenza tranter offerta e dumonda sto la surcapacitad da la stad vegnir accumulada temporarmain fin a l'utilisaziun durant l'enviern. En grondas dimensiuns è qua actualmain pussaivel oravant tut cun ovras d'accumulaziun a pumpa, ma i manca anc in'ulteriura capacitad.

Per quest motiv èsi pli raschunaivel da producir dapli electricitad cun energia solara durant l'enviern, perquai che en las Alps po vegnir producida la medema quantitad electricitad durant l'enviern sco durant la stad pervia dals blers dis senza tschajera. Per producir electricitad po ultra da quai er anc vegnir duvrada l'irradiaziun dal sulegl che vegn reflectada da la naiv. Dapli electricitad d'enviern spezialmain custaivla furneschan implants che guardan vers ost u vers vest sco er moduls installads en moda verticala, p.ex. en vischinanza da telefericas, nua che la colliaziun electrica è gia avant maun u vi da mirs da lais d'accumulaziun. In studi d'Interreg mussa ultra da quai il potenzial grond e duraivel da la producziun solara en il Grischun. En quest connex èn vegnids resguardads mo ils edifizis entaifer las zonas da construcziun, ils centers da lieus cun edifizis istorics èn vegnids exclus. Ordaifer las zonas da construcziun datti bleras pussaivladads per producir electricitad sco mussà qua survart.

Puntraschigna, ils 14 da zercladur 2019

Gasser, Schneider, Atanes, Baselgia-Brunner, Berther, Bigliel, Cahenzli-Philipp, Cantieni, Caviezel (Cuira), Danuser, Deplazes (Cuira), Deplazes (Rabius), Epp, Hofmann, Jochum, Kappeler, Kunfermann, Lamprecht, Locher Benguerel, Loepfe, Märchy-Caduff, Michael (Castasegna), Müller (Susch), Müller (Favugn), Noi-Togni, Paterlini, Perl, Preisig, Rettich, Ruckstuhl, Rutishauser, Schwärzel, Stiffler, Thöny, Tomaschett (Breil), von Ballmoos, Wilhelm, Zanetti (Sent), Pajic

Resposta da la regenza

Da princip beneventa la regenza las finamiras formuladas en l'incumbensa Gasser d'aug­mentar la producziun d'electricitad durant la stagiun d'enviern. La regenza ha gia demussà pliras giadas ch'ella sustegna la strategia d'energia 2050 da la confederaziun. Ina part es­senziala da quella è da sortir da l'energia nucleara existenta e d'augmentar la producziun d'energia indigena regenerabla.

Igl è incontestà ch'i èn avant maun relaziuns climaticas bunas fin fitg bunas en il Grischun che laschan spetgar retgavs surproporziunals d'implants fotovoltaics. Quai è spezialmain il cas durant la stagiun d'enviern, perquai che la gronda part dals territoris grischuns sa chatta sur ils cunfins da tschajera usitads. Ultra da quai è il potenzial pussaivel sin infrastructuras existentas – sco menziunà en l'incumbensa – avant maun en il Grischun. La regenza vesa ultra da quai in potenzial considerabel vi da las fatschadas d'edifizis existents.

Gia oz vegnan implants fotovoltaics promovids cun indemnisaziuns unicas tras la Pronovo SA ch'è responsabla per realisar ils programs da promoziun per energias regenerablas da la confederaziun. In program da promoziun chantunal, sco ch'el è vegnì formulà en l'incumben­sa, muntass pia ina cumplettaziun dal program da promoziun da la confederaziun ch'exista gia. En quest connex duai l'alimentaziun d'in program da promoziun esser concepida – tenor l'incumbensa – en moda neutrala concernent la quota statala.

Tenor il giudicament da l'uffizi d'energia e da traffic e sin basa da l'augment annual actual d'implants fotovoltaics vegnissan construids uschia implants supplementars cun ina presta­ziun totala da var 2 MW resp. 2000 kWp per onn. Quai pertutga implants che han in angul d'inclinaziun pli grond che 60 grads e che vegnissan promovids supplementarmain cun ina contribuziun chantunala da promoziun en l'autezza da 200 fin 300 francs/kWp. Tenor l'expe­rientscha vegnissan construids dapli implants durant ils emprims 3 onns, approximati­vamain var 3 MW. Per quai vegniss duvrada in'alimentaziun annuala da daners da promoziun en l'autezza da stgars 1 milliun francs.

Per in program da promoziun neutral concernent la quota statala stuess vegnir incassada ina taxa da tut las consumentas e tut ils consuments d'electricitad en il Grischun. Cun quella pu­dess vegnir alimentà il program da promoziun. Ils meds che na vegnissan betg duvrads stuessan vegnir restituids a la populaziun. Per pudair realisar quai giuridicamain, stuessan differents relaschs vegnir midads. La lavur per l'incassament ed eventualmain per la restitu­ziun dals meds finanzials na sa giustifitgescha betg en cas d'ina summa da circa 1 milliun francs. Perquai propona la regenza da manar in agen conto da promoziun che vegn alimentà annualmain dal cussegl grond. Cuntraproductiv fiss in transfer da meds finanzials davent dals meds da promoziun existents ch'èn destinads ad augmentar l'effizienza energetica. Tras quai perdess il chantun meds finanzials federals en la relaziun 1:2.

La regenza vegn a la conclusiun ch'ils elements ils pli impurtants da l'incumbensa correspun­dan a la strategia d'energia da la confederaziun e dal chantun. Per ella correspunda la pro­mo­ziun d'implants fotovoltaics per producir electricitad durant l'enviern a las finamiras. Ma ella resguarda in'alimentaziun neutrala concernent la quota statala d'in program da promo­ziun – mesirà vi dals meds necessaris – sco sproporziunada. Ultra da quai è la regenza da l'avis che questa promoziun duai vegnir suttamessa a la suveranitad dal cussegl grond con­cernent il preventiv, sco ils programs da promoziun cumprovads en il sectur da l'effizienza energetica, e che la realisaziun da l'incumbensa è ina part da l'adempliment da l'incumbensa Wilhelm concernent in "Green Deal" per il Grischun ch'il cussegl grond ha approvà.

Sa basond sin questas consideraziuns propona la regenza al cussegl grond da midar questa incumbensa sco suonda:

En il rom da la revisiun parziala currenta da la lescha d'energia dal chantun Grischun (LEG; DG 820.200) creescha la regenza la basa legala per promover implants fotovoltaics, ch'èn montads vi d'edifizis e vi da stabiliments d'infrastructura, per producir electricitad durant l'enviern.

29 d'avust 2019