Il chantun Grischun posseda bleras organisaziuns che furneschan prestaziuns excellentas en la lavur cun persunas pli veglias. En il sectur da l'integraziun per exempel exista gia in post spezialisà correspundent en il chantun. Quest post è il post da consultaziun per dumondas en connex cun l'integraziun en il sectur da migraziun. El dirigia e coordinescha l'integraziun sin plaun chantunal e communal. Ultra da quai sustegna el las autoritads chantunalas e las vischnancas a realisar lur incumbensas d'integraziun. Tar sias incumbensas tutgi plinavant da colliar las autoritads, las instituziuns e las organisaziuns ch'èn activas en il sectur da l'integraziun. Las persunas pli veglias, lur confamigliars, ils servetschs ambulants da tgira, las instituziuns da tgira, las uniuns ch'èn activas en quest sectur sco er l'administraziun chantunala sa vesan confruntads cun las sfidas da la midada demografica. Il chantun Grischun posseda gia in post spezialisà per la vegliadetgna. Quest post surpiglia bleras incumbensas administrativas impurtantas. Ma quai che manca è la funcziun da coordinaziun per surdar projects. En il passà ha quai gia chaschunà duplicitads che avessan pudì vegnir evitadas, sch'i avess dà ina incarica correspundenta. Ina incarica correspundenta avess reducì la birocrazia nunnecessaria ed avess stgaffì clerezza per ils partenaris colliads e per ils confamigliars. Il post spezialisà pudess er metter a disposiziun prestaziuns a favur da la populaziun. Uschia pudess il post spezialisà reglar la coordinaziun dals letgs libers en las chasas da persunas attempadas e da tgira, e gidar la populaziun a tschertgar ina plazza adattada en ina chasa.
Las sutsegnadras ed ils sutsegnaders vulessan perquai savair il suandant da la regenza:
1. Vesa la regenza medemamain in basegn d'agir en quest sectur da l'administraziun chantunala?
2. Gidassan las incumbensas da coordinaziun descrittas qua survart – ord vista da la regenza – ad optimar las surdadas da projects, e purschessan ellas clerezza a las persunas pertutgadas?
3. Tge ulteriurs potenzials e champs d'acziun per la populaziun e per ils posts spezialisads vesa la regenza en in tal post da coordinaziun?
Cuira, ils 22 d'october 2019
Rettich, Deplazes (Rabius), Rüegg, Atanes, Baselgia-Brunner, Cahenzli-Philipp, Cantieni, Caviezel (Cuira), Degiacomi, Derungs, Epp, Gartmann-Albin, Gasser (Cuira), Hofmann, Horrer, Kienz, Kunfermann, Locher Benguerel, Loepfe, Müller (Favugn), Natter, Perl, Preisig, Rutishauser, Schwärzel, Thomann-Frank, Thöny, Thür-Suter, Widmer-Spreiter (Cuira), Wilhelm, Fasani-Horath, Pajic, Spadarotto