L'economia e la politica daventan pli e pli conscientas da la mancanza smanatschanta da persunas spezialisadas, adina dapli branschas vegnan dumandadas da chattar soluziuns. Ina proposta empermettenta per il Grischun dastgassi esser da procurar per cundiziuns generalas che motiveschan forzas da lavur qualifitgadas indigenas da sa participar al process da lavur. Bleras dunnas e blers umens bain scolads cun uffants na chattan betg talas cundiziuns. Bain è la situaziun da provediment en il sectur da la tgira cumplementara a la famiglia ed a la scola sa meglierada ils ultims onns. Tuttina restan largias sensiblas, e la purschida para da cuvrir mo per part ils basegns dals geniturs. Uschia datti cunzunt en il sectur da scola anc adina largias considerablas da provediment, perquai ch'i mancan en differentas scolas purschidas (tgira da mezdi e/u da suentermezdi) ubain perquai che quellas stattan a disposiziun mo durant il manaschi da scola.
La cumpatibilitad da la professiun cun la famiglia è garantida, uschè ditg ch'ils uffants han la vegliadetgna da prescolina u prescolara. Ils geniturs pon profitar da las purschidas existentas dals centers dal di. Apaina ch'ils uffants entran dentant en il sistem da scola, n'è questa cumpatibilitad betg pli garantida. Bleras vischnancas na porschan betg structuras correspundentas. Tenor la lescha da scola èn ellas obligadas da far quai, sche almain otg scolaras e scolars basegnan las structuras. E quest basegn minimal sto esser avant maun per mintga ura durant in di. Pia manca la flexibilitad e per part la voluntad politica da porscher dapli che la lescha prevesa. Effectivamain vegnan quellas famiglias dischavantagiadas, las qualas vivan en vischnancas pli pitschnas u mesaunas dal chantun Grischun. Quai chaschuna in tractament inegual entaifer il chantun, damai che las purschidas da structuras dal di dependan dal lieu da domicil.
Plinavant vegni sclerì e spezialmain decidì bler memia tard, sche la tgira cumplementara a la scola ha lieu u betg (per part in pèr dis avant che la scola cumenza). Per ils geniturs che han in'activitad da gudogn èsi nunpussaivel d'insumma far diever d'ina structura dal di da la vischnanca. Ils geniturs organiseschan a temp autramain la tgira d'uffants e la vischnanca na vesa nagin basegn, perquai ch'i na dat naginas u memia paucas annunzias per ina structura dal di.
Las sutsegnadras ed ils sutsegnaders tschentan en quest connex las suandantas dumondas:
1. Renconuscha la regenza il basegn da meglieraziun en la tgira d'uffants, nua che la cumpatibilitad cun la lavur da las purschidas da tgira è restrenschida? Quai pertutga spezialmain la tgira che manca durant las vacanzas da scola ed il fatg che la purschida da structuras dal di dependa dal basegn tenor la lescha da scola.
2. È la regenza pronta d'adattar l'obligaziun da purschida dals purtaders da scola e da reducir il dumber da scolaras e scolars dad otg sin main?
3. Tge pussaivladads vesa la regenza d'augmentar il stimul per vischnancas da stgaffir ina purschida ch'è cumpatibla cun la lavur?
Cuira, ils 4 da december 2019
Spadarotto, Casutt-Derungs, Stiffler, Atanes, Baselgia-Brunner, Bettinaglio, Bigliel, Brunold, Cahenzli-Philipp, Cavegn, Caviezel (Cuira), Clalüna, Degiacomi, Deplazes (Cuira), Derungs, Epp, Gartmann-Albin, Gasser, Hofmann, Hohl, Horrer, Kappeler, Maissen, Märchy-Caduff, Müller (Favugn), Noi-Togni, Perl, Preisig, Rettich, Ruckstuhl, Rutishauser, Schneider, Schutz, Schwärzel, Thomann-Frank, Thöny, von Ballmoos, Widmer (Favugn), Widmer-Spreiter (Cuira), Wilhelm, Zanetti (Sent), Zanetti (Landquart), Padrun-Valentin, Pajic