Per la taxaziun da persunas privatas sa basa il sistem fiscal actual tranter auter sin il stadi civil. Quest proceder stat pli e pli en cuntradicziun cun la realitad sociala. Sche la lètg era pli baud il cas normal, n'è ella oz betg pli quai en mintga cas. Per exempel vegnan lètgs divorziadas pli savens ubain ch'i dat pli e pli "famiglias da patchwork". Societads avertas e liberalas che surlaschan a mintga persuna da tscherner sia furma da viver, na duessan betg preferir ina da las furmas da viver.
Sco alternativa al sistem actual sa preschenta la taxaziun individuala ch'è independenta dal stadi civil. La taxaziun individuala tegna quint da las realitads socialas ch'èn sa midadas e dat impuls per ina participaziun pli intensiva da las dunnas a l'activitad da gudogn. Plinavant permetta la taxaziun individuala da schliar divers problems existents, p.ex. il tractament fiscal inegual da conjugals e da pèrs da concubinat ubain la classificaziun fiscala da persunas ch'educheschan sulettas.
Sin plaun federal è la situaziun pertutgant quest tema averta. Ma ils chantuns èn directamain pertutgads da sias consequenzas. Perquai fai senn ch'ils chantuns prendian influenza (ultra da la Conferenza da las directuras e dals directurs chantunals da finanzas).
Las sutsegnadras ed ils sutsegnaders supplitgeschan perquai il Cussegl grond da prender in conclus direct e da deliberar – sin fundament da l'artitgel 59 da la Constituziun chantunala – la suandanta iniziativa dal chantun per mauns da l'Assamblea federala:
Sa basond sin l'artitgel 160 alinea 1 da la Constituziun federala inoltrescha il chantun Grischun tras il Cussegl grond la suandanta iniziativa dal chantun:
Il chantun Grischun pretenda da midar las basas legalas per passar da la taxaziun da conjugals e da famiglias a la taxaziun individuala ch'è independenta dal stadi civil.
Cuira, ils 12 da favrer 2020
Horrer, Hohl, Stiffler, Aebli, Alig, Atanes, Baselgia-Brunner, Bettinaglio, Bigliel, Brandenburger, Cahenzli-Philipp, Casty, Caviezel (Cuira), Caviezel (Tavau Clavadel), Censi, Degiacomi, Della Cà, Deplazes (Cuira), Dürler, Ellemunter, Engler, Felix, Flütsch (Spleia), Gartmann-Albin, Gasser, Giacomelli, Gort, Gugelmann, Hartmann-Conrad, Hofmann, Jenny, Kappeler, Kienz, Koch, Loi, Marti, Müller (Favugn), Natter, Niggli-Mathis (Grüsch), Noi-Togni, Perl, Preisig, Rettich, Rüegg, Rutishauser, Schutz, Tanner, Thomann-Frank, Thür-Suter, Valär, von Ballmoos, Waidacher, Widmer (Favugn), Widmer-Spreiter (Cuira), Wilhelm, Costa, Spadarotto, Stieger