Navigation

Inhaltsbereich

Dumonda Grass concernent novaziuns per metter grascha sin champs

Sessiun: 19.06.2020

Cun la brev dals 13 da matg 2020 ha l'Uffizi d'agricultura e da geoinfurmaziun infurmà tut las puras ed ils purs en il chantun Grischun che l'Ordinaziun chantunala davart la protecziun da las auas en l'agricultura (OCPAAgr; DG 910.150) saja entrada en vigur il 1. da schaner 2020.

La OCPAAgr prescriva ch'igl è admess – per motivs manaschials – da depositar temporarmain grascha sin champs durant maximalmain 8 emnas, sche tschertas premissas vegnan observadas. Durant la perioda senza vegetaziun è quai scumandà dal tuttafatg. Quests criteris valan a partir dal 1. d'avust 2020.

Questas prescripziuns ed il curt termin fin a l'entrada en vigur da l'ordinaziun chaschunan problems per bleras puras e blers purs. Perquai che questa ordinaziun è vegnida concludida senza preannunzia, n'èsi per tscherts manaschis agriculs betg pussaivel da la realisar entaifer quest temp. Blers manaschis ston numnadamain realisar mesiras architectonicas per observar l'ordinaziun. Talas mesiras pretendan ina planisaziun pli gronda en reguard manaschial e finanzial e na pon betg vegnir realisadas entaifer paucs mais. Vitiers vegn ch'ils projects da construcziun necessaris sa chattan en la pli gronda part dals cas ordaifer las zonas da construcziun. L'experientscha mussa ch'i passan plirs mais da l'inoltraziun da la dumonda da construcziun fin a la permissiun.

Las sutsegnadras ed ils sutsegnaders tschentan en quest connex las suandantas dumondas:

  1. È la Regenza pronta da spustar l'entrada en vigur da questa ordinaziun sin in termin posteriur?
  2. Èn previsas permissiuns excepziunalas, sche la realisaziun per il termin fixà n'è betg pussaivla pervia da mesiras architectonicas?
  3. Ston puras e purs quintar cun ina denunzia penala u cun sancziuns tar ils pajaments directs, sch'els n'observan betg l'ordinaziun?

Cuira, ils 19 da zercladur 2020

Grass, Crameri, Valär, Brandenburger, Buchli-Mannhart, Caluori, Cantieni, Clalüna, Danuser, Deplazes (Cuira), Ellemunter, Engler, Flütsch, Föhn, Gasser, Gugelmann, Hardegger, Hartmann-Conrad, Hefti, Hitz-Rusch, Hohl, Kasper, Kohler, Kunfermann, Lamprecht, Loi, Michael (Donat), Müller (Susch), Natter, Niggli (Samedan), Niggli-Mathis (Grüsch), Papa, Rettich, Ruckstuhl, Rutishauser, Sax, Schmid, Tanner, Tomaschett (Breil), Ulber, Widmer-Spreiter (Cuira), Zanetti (Sent), Renkel

Resposta da la regenza

Tenor l'art. 6 da la Lescha federala davart la protecziun da las auas (LPAuas; CS 814.20) èsi scumandà d'inducir en in'aua u da laschar sfundrar substanzas che pon contaminar l'aua. Plinavant èsi er scumandà da deponer u da sterner talas substan­zas ordaifer in'aua, sche quai chaschuna in privel concret che l'aua pudess vegnir contaminada. Fin ussa eran las incumbensas fixadas en duas directivas da l'Uffizi d'agricultura e da geoinfurmaziun (UAG) e da l'Uffizi per la natira e l'ambient. L'onn 2012 han l'Uffizi federal d'ambient (UFAM) e l'Uffizi federal d'agricultura (UFAG) relaschà ils agids d'execuziun "Construc­ziuns ruralas e protecziun da l'ambient" e "Substanzas nutritivas ed utilisaziun da ladim en l'agricultura". Da vart dal chantun è vegnida relaschada per il 1. da schaner 2020 in'Ordi­naziun davart la protecziun da las auas en l'agricultura (OCPAAgr; DG 910.150) ed ela­vurà in agid d'execuziun "Protecziun da las auas en l'agricultura dal Grischun". Quests documents cuntegnan ils puncts or dals dus agids d'execuziun da la Confederaziun ch'èn essenzials per il Grischun e ch'èn vegnids adattads uschenavant sco pussaivel a las relaziuns chan­tunalas spezialas, e concretiseschan lur applicaziun en moda illustrativa. Els repro­duceschan da princip la pratica vertenta. Tenor la Confederaziun n'è il deposit tem­porar da grascha sin il champ da princip betg permess. Per motivs da l'andament dal manaschi po la grascha vegnir depositada intermediarmain sin las surfatschas che duain vegnir ladadas per maximalmain 6 emnas, fin ch'ella vegn fatga ora, premess che ses deposit na chaschunia betg in privel concret per ina contaminaziun da l'aua. Ils deposits da grascha na fan betg part da la bilantscha da deposit dal manaschi e na dastgavan er fin ussa betg vegnir mess a quint al volumen da deposit necessari. En la OCPAAgr è il deposit temporar da curta durada vegnì augmentà – cun il con­sentiment dal UFAM – a maximalmain 8 emnas per tegnair quint meglier da las cundiziuns climaticas spezialas dal territori da muntogna.

La protecziun da las auas en l'agricultura è dapli plirs onns in tema ed è vegnida commu­nitgada repetidamain tant dal Servetsch da cussegliaziun agricula sco er dal post execu­tiv. Dapi l'onn 2015 vegnan fatgas sistematicamain controllas da l'ermeticitad sin ils mana­schis e calculada la bilantscha da deposit. Davart quest project che cumpiglia tut il chan­tun èsi vegnì rapportà pliras giadas. Fin ussa èn gia vegnids controllads 1700 manaschis, pia circa trais quarts da tut ils manaschis da l'entir onn e da tut ils manaschis d'alpegiada che ston vegnir controllads durant l'emprima fasa. Sch'il volumen da deposit mancava, èn vegnidas ordinadas mesiras architectonicas u manaschialas, e quai independentamain da l'entrada en vigur da la OCPAAgr. La Regenza è conscienta dal fatg che manaschis che n'adempleschan betg las pretensiuns fatgas pon arrivar a las stretgas e dovran correspun­dentamain temp per realisar las mesiras architectonicas. Il Servetsch da cussegliaziun agricula sco er il UAG stattan a disposiziun als manaschis cun vusch consultativa. I vegn però premess che las prescripziuns fundamentalas per cultivar en moda ordinaria ils deposits temporars sajan enconuschentas e ch'ellas vegnian realisadas en atgna respon­sabladad dals manaschis. Cun la communicaziun ch'ils criteris per cultivar en moda ordinada ils deposits temporars valian explicitamain a partir dal 1. d'avust 2020, èn ils manaschis anc ina giada vegnids rendids attents a las prescripziuns, per ch'els possian realisar ina midada individuala entaifer in termin adequat. Las experientschas ch'èn vegnidas fatgas dapi l'entrada en vigur han mussà ch'i han pudì vegnir chattadas svelt soluziuns. Numerus resuns da puras e purs mussan ultra da quai che las regulaziuns chattan in consentiment gist er tar la protecziun da las auas.

Tar la dumonda 1: La OCPAAgr sa basa tranter auter sin ils agids d'execuziun da la Confederaziun ch'i dat dapi l'onn 2012. Cun la OCPAAgr vegnan mo concretisads ils princips enconuschents e las directivas surordinadas per proteger las auas. Ultra da quai datti differentas pussaivladads per ademplir las prescripziuns (guardar dumonda 2). Pervia da quai n'èsi betg adequat da spustar l'entrada en vigur.

Tar la dumonda 2: La legislaziun federala na prevesa naginas permissiuns excepziunalas. Pervia da quai na po er il chantun betg conceder talas. I ston vegnir chattadas soluziuns alternativas per depositar grascha sur 8 emnas, fin che avunda volumen da deposit po vegnir mess a disposiziun sin il manaschi. Per quai stattan a disposiziun differentas pus­saivladads sco contracts da surpigliada e da deposit temporar u er ina cumpostaziun a l'ur dal champ che permetta da depositar grascha fin ad 1 onn. I dat anc adina er la pussai­vladad da far deposits temporars per ulteriuras 8 emnas durant il temp da vegetaziun.

Tar la dumonda 3: La OCPAAgr concretisescha disposiziuns ch'èn fixadas en la legisla­ziun federala. Sch'ellas na vegnan betg observadas, po quai vegnir sancziunà – tut tenor la grevezza dal surpassament – cun stritgar pajaments directs fin ad ina denunzia. Uschia è per exempel l'observaziun da la durada maximala da deposits temporars mo ina da numerusas prescripziuns che vegnan controlladas. Sch'i vegn constatà che la grascha vegn depositada en moda incorrecta sin il champ, vegnan ils pajaments directs sanc­ziunads sco fin ussa en dependenza da la violaziun da l'obligaziun d'avair quità. En cas grevs smanatscha ina denunzia penala.

31 d'avust 2020