Navigation

Inhaltsbereich

Dumonda Jochum concernent digitalisaziun, homeoffice, decentralisaziun

Sessiun: 19.06.2020

L'administraziun da la situaziun d'urgenza en connex cun la pandemia da COVID-19 ha pretendì adattaziuns impurtantas e spezialas sin tut ils plauns, betg sco ultim er en il sectur da l'administraziun publica. La vischnanca da Puschlav ha introducì homeoffice ed ha pia permess a las emploiadas ed als emploiads da l'administraziun da lavurar davent da chasa. Grazia ad ina buna infrastructura d'informatica èsi stà pussaivel d'organisar e d'implementar quai entaifer paucs dis.

La Regenza ha surdà dacurt al parlament la missiva concernent la Lescha davart la promoziun da la transfurmaziun digitala en il Grischun. Ultra da quai è la Regenza s'exprimida pliras giadas a favur da rinforzar las vischnancas e las regiuns e da cuntanscher finamiras surordinadas sco regiuns cumpetitivas, ina structura economica decentrala ed in svilup duraivel.

En la situaziun actuala ch'è resultada pervia dal coronavirus èn vegnidas chattadas soluziuns innovativas che han pussibilità da lavurar davent da chasa u schizunt da far homeschooling. Ussa fissi il dretg mument per trair las conclusiuns per l'avegnir e per accelerar la derasaziun da la lavur decentrala nua che quai è raschunaivel, sco er per rinforzar las linguas minoritaras en l'administraziun chantunala.

En quest connex èn vegnidas drizzadas ils ultims onns gia pliras giadas dumondas a la Regenza, che han dentant gì in success modest. Oz poi vegnir sa basà da nov er sin l'experientscha pratica e concreta ch'è vegnida fatga durant la fasa dal lockdown.

Dumondas a la Regenza:

  1. Ha la Regenza – en connex cun l'epidemia da COVID-19 – introducì mesiras da homeoffice per las collavuraturas ed ils collavuraturs da l'administraziun chantunala?
  2. Po vegnir tratga in'emprima bilantscha da la lavur a chasa da l'administraziun chantunala (p.ex. introducziun da mesiras spezialas, dumber da collavuraturas e collavuraturs che han lavurà davent da chasa)?
  3. Po homeoffice vegnir considerà sco in instrument per promover la represchentanza da las minoritads linguisticas en l'administraziun (p.ex. cun stgaffir plazzas da lavur decentralas en las regiuns u cun introducir in servetsch da translaziuns sin distanza)?
  4. Fissi pussaivel da decentralisar – grazia a homeoffice – ulteriuras plazzas da lavur en las regiuns perifericas da noss chantun?

Cuira, ils 19 da zercladur 2020

Jochum, Papa, Fasani, Alig, Berweger, Brandenburger, Buchli-Mannhart, Cahenzli-Philipp, Censi, Della Cà, Deplazes (Cuira), Ellemunter, Felix, Flütsch, Hartmann-Conrad, Hohl, Kienz, Lamprecht, Maissen, Michael (Castasegna), Müller (Susch), Pfäffli, Preisig, Rettich, Rüegg, Rutishauser, Schwärzel, Thomann-Frank, Thür-Suter, Ulber, Weidmann, Wellig, Zanetti (Sent), Zanetti (Landquart)

Resposta da la regenza

Tar la dumonda 1:  Durant la crisa da corona è la lavur da chasa anora vegnida resguardada cun in focus spezial en il rom dal management da la cuntinuitad da las fatschentas (business continuity management, BCM). Sco mesira per cumbatter cun­ter il coronavirus (COVID-19) aveva la Regenza ordinà cun ils conclus dals 13 da mars e dals 22 d'avrigl 2020 (prot. nr. 179 e 340) da far homeoffice tar l'admini­stra­ziun chantunala, nua che quai è pussaivel e raschunaivel. Entaifer fitg curt temp ha pudì vegnir messa a disposiziun l'infrastructura tecnica necessaria.

Tras la mesira da lavurar da chasa anora, ordinada da la Regenza, hai pudì vegnir garantì ch'ils process d'impurtanza centrala per las burgaisas ed ils burgais han pudì vegnir liquidads da tut temp senza restricziuns durant la crisa da corona.

Tar la dumonda 2:  Numerus posts da servetsch han fatg oravant tut u per part homeoffice per dumagnar la crisa da corona. Tar l'administraziun chantunala eran en funcziun passa 1000 apparats mobils, e dapi la crisa da corona èn vegnids endriz­zads circa 1100 access remote supplementars cun computers privats. 2520 collavu­raturas e collavuraturs han gì la pussaivladad tecnica da lavurar da chasa anora, a medem temp han mintgamai bundant 1000 collavuraturas e collavuraturs fatg mintga di homeoffice. L'infrastructura ch'è vegnida messa a disposiziun da l'Uffizi d'informa­tica ha funcziunà senza problems durant l'entira perioda. Er sesidas han ultra da quai gì lieu ad interim mo pli en moda virtuala. Bleras unitads administrativas han pudì "digitalisar" svelt ils process decisivs, uschia ch'igl è stà pussaivel da far homeoffice quasi senza palpiri. Suenter ils emprims pass da schluccada dal Cussegl federal mez matg han anc ca. 500 collavuraturas e collavuraturs fatg diever da l'access da chasa anora.

Las sfidas las pli grondas èn stadas quellas da metter a disposiziun entaifer fitg curt temp l'infrastructura tecnica (hardware, licenzas, dimensiuns, capacitads), da digitali­sar a curta vista ils process che vegnivan liquidads fin lura sin palpiri (p.ex. scannar la posta) e da qualifitgar las collavuraturas ed ils collavuraturs d'utilisar la tecnica en moda effizienta (conferenzas da telefon e da video; metter a disposiziun infurma­ziuns detagliadas en l'intranet e realisar scolaziuns online). Plinavant èn vegnids priorisads ils process e là, nua che quai è stà pussaivel, èsi vegnì desistì da contact direct cun la clientella resp. èsi vegnì midà ad interim a contact per telefon. 

Tar la dumonda 3:  En il program da la Regenza 2021 – 2024 (guardar er missiva dals 29 d'october 2019, carnet nr. 8 / 2019 – 2020, p. 432) ha la Regenza fixà che la lingua rumantscha e taliana sco er la cultura grischuna duain vegnir mantegnidas cun sustegnair differentas mesiras en il sectur da la furmaziun, da l'administraziun, da las mesiras e da la transfurmaziun digitala. Er per la diversitad dal Grischun è l'urbanisaziun decentrala fitg impurtanta. Las cundiziuns generalas necessarias duain vegnir meglieradas, per che quella possia vegnir garantida er a lunga vista. Far homeoffice porscha er l'avantatg che las collavuraturas ed ils collavuraturs pon abitar en lieus periferics e na ston betg pendular mintga di.

Tar la dumonda 4:  La Regenza ha l'intenziun da reglar e d'implementar bainbaud homeoffice e lavur mobila sco furmas da lavur tar l'administraziun chantunala. Ella è persvadida da prestar uschia ina contribuziun a favur da l'urbanisaziun decentrala e da mantegnair qua tras plazzas da lavur en lieus periferics.

27 d'avust 2020