Navigation

Inhaltsbereich

Sessiun: 09.12.2020

Dapi quasi 111 onns vegn producida energia cun agid da la forza idraulica en noss chantun; e questa energia è segiramain in da noss exports ils pli attractivs. En las vals perifericas procuran la producziun d'energia ed ils lieus da producziun decentrals – ultra da plazzas da lavur e da plazzas da scolaziun – er per entradas fiscalas, e betg d'emblidar per entradas dals tschains d'aua, ch'èn schizunt d'ina impurtanza existenziala per bain inquala vischnanca.

Las mesiras da promoziun europeicas enormas gist en implants eroelectrics e fotovoltaics han però deplorablamain per con­sequenza ch'i na pon betg vegnir realisadas cun gudogn investiziuns pli grondas en la forza idraulica cun ils pretschs d'energia dad oz.

Cun la Strategia d'energia 2050 da la Confederaziun, che prevesa tranter auter da desister d'ovras nuclearas, daventan accu­mu­laturs d'energia da lunga durada adina pli impurtants. Tenor signur Walter Sattinger da Swissgrid vegnan tals prest a mancar en l'entira Europa.

Tant pli surprendent è il fatg che – tenor la Repower – na vegn betg pli persequità vinavant il project Lagobianco, che fiss in tal accumulatur d'energia da lunga durada. Quai cun la motivaziun che la rentabilitad na saja betg dada e che ozendi na chattian tals projects nagin sustegn pli.

Deplorablamain è restà fitgà en la procedura d'approvaziun da la concessiun er il project Chlus, per la realisaziun dal qual i dovra enconuschentamain in grond sustegn finanzial da vart da la Confederaziun e da vart da la politica. Ils meds finanzials che stattan actualmain a disposiziun na tanschan deplorablamain lunschor betg. Tant pli surprendent è quai, perquai che quest project vegn acceptà er da las federaziuns per l'ambient, e perquai ch'el pudess eliminar la tematica da las midadas da la deflussiun en la Landquart.

En sia communicaziun a las medias ed en ses fegls d'infurmaziun dals 03-04-2020 conferma il Cussegl federal almain che las valurs directivas ch'existan gia per engrondir la forza idraulica per l'onn 2035 duajan vegnir decleradas sco finamiras im­pe­gna­tivas. Ultra da quai duai ina finamira per l'onn 2050 vegnir integrada en la lescha.

Las sutsegnadras ed ils sutsegnaders tschentan en quest connex las suandantas dumondas:

  1. È er la Regenza da l'avis che la forza idraulica tiria plitost la curta en la nova Lescha d'energia, tant pli che tut las inter­venziuns da l'ultim temp èn idas a favur da la fotovoltaica?
  2. En vista al fatg che la forza idraulica cun ses tschains d'aua è ina funtauna d'entradas considerabla per inquala vischnanca: Tge fa la Regenza per rinforzar la forza idraulica en noss chantun?
  3. È il chantun Grischun pront da sustegnair las ovras idraulicas pitschnas indigenas en il senn da la Strategia d'energia 2050 medemamain en ina dimensiun cumparegliabla a quella da la fotovoltaica (adattaziun dals meds da promoziun per il
    01-01-2021) per che la rentabilitad da quest gener d'ovras electricas saja dada e per ch'i possian vegnir fatgas investiziuns?
  4. Tras la Strategia d'energia 2050 e tras la legislaziun d'energia vegnan promovidas fermamain las novas energias regenera­blas a favur d'ina applicaziun decentrala. L'utilisaziun da questas novas energias regenerablas ha la preferenza envers la forza idraulica indigena che vegn producida oz (merit order). Quai ha per consequenza ch'er las taxas da concessiun ed ils tschains d'aua a favur da las vischnancas vegnan a sa reducir. Tge fa il chantun cunter quai?
  5. Tge tenuta ha la Regenza envers il fatg che quellas vischnancas ch'èn pertutgadas d'implants eroelectrics e fotovoltaics professiunals, vegnan indemnisadas per questa producziun d'energia (p.ex. concessiun eroelectrica, concessiun solara)?
  6. Tge fa la Regenza per promover projects d'engrondiment sco p.ex. Chlus u er Lagobianco? Surpiglia la Regenza qua ina rolla activa tar la Confederaziun?

Tavau, ils 9 da december 2020

Gort, Favre Accola, Koch, Brandenburger, Salis

Resposta da la regenza

La producziun d'electricitad cun ovras idraulicas importa en Svizra en la media da blers onns 36,5 uras da terawatt (TWh). Cun quai contribuescha ella actualmain var 56 pertschient da la producziun d'electricitad totala da la Svizra. Passa in tschintga­vel da la producziun d'electricitad svizra cun ovras idraulicas deriva dal chantun Grischun. Er la Regenza è da la medema opiniun sco quella represchentada en la dumonda, che la forza idraulica haja ina gronda impurtanza energetica e per l'eco­nomia publica da noss chantun. Grazia a l'utilisaziun da la forza idraulica indigena restan mantegnidas plazzas da lavur en las valladas ed en las regiuns perifericas, ed i vegnan generadas incumbensas per l'industria e per la master­gnan­za locala. Il niz per l'economia publica va lunsch sur la pura producziun d'electricitad ora. Plinavant è la Regenza conscienta da la gronda impurtanza finanziala da la producziun d'electri­citad per las vischnancas e per il chantun.

Tar las dumondas 1, 2 e 4: Sin plaun federal prevesa la Lescha d'energia (LEn; CS 730.0) – ultra da la promoziun da las novas energias regenerablas – er contri­buziuns d'investiziun per la forza idraulica. Ensemen cun ils chantuns da muntogna e cun ulteriurs intschess da l'aua s'engascha la Regenza fermamain che las cundiziuns generalas per l'utilisaziun da la forza idraulica vegnian meglieradas cun la concep­ziun futura dal martgà d'electricitad. La valur da la forza idraulica sco pitga principala dal provediment d'electricitad svizzer en il rom da la Strategia d'energia 2050 sto vegnir renconuschida e valurisada da la politica. Mai na dastga la forza idraulica trair la curta envers la fotovoltaica. Sche la forza idraulica è posiziunada bain (concepziun dal martgà d'electricitad), pon ils producents d'electricitad er pajar tschains d'aua adequats. Perquai che la finamira dal tschains d'aua è e resta la medema: el sto esser er a lunga vista ina indemnisaziun attractiva e gista per metter a disposiziun l'aua sco resursa. Per che la forza idraulica vegnia rinforzada en il chantun, elavura la Regenza actualmain ina strategia chantunala concernent la forza idraulica che cumpiglia tranter auter il return dals implants a la concedanta. Ultra da quai stat ella en in barat permanent cun la Confederaziun e cun la branscha, uschia ch'i pon vegnir realisads er en l'avegnir ulteriurs projects ch'èn impurtants per la Strategia d'energia 2050 (cf. dumonda 6).

Tar la dumonda 3: La promoziun finanziala da las differentas tecnologias da produc­ziun è reglada sin plaun federal en la LEn. L'emprima prioritad ston avair las ovras idraulicas (d'accumulaziun) grondas, perquai che cun ellas po en emprima lingia vegnir serrada persistentamain la largia d'energia (durant l'enviern). Er impurtant èsi da mantegnair e d'optimar ovras idraulicas pitschnas existentas. Il potenzial da novas ovras idraulicas (ad aua currenta) fitg pitschnas, che na vegnan betg sustegnidas da la Confederaziun, è percunter modest, ed ina promoziun finanziala na resguarda la Regenza perquai betg sco prioritara.

Tar la dumonda 5: Las vischnancas pon survegnir ina indemnisaziun per metter a disposiziun lur funs e lur terren per implants per la producziun d'electricitad (utilisa­ziun speziala dal terren). En divergenza da l'utilisaziun da la forza idraulica n'è la producziun d'electricitad u da chalur cun agid dal vent e dal sulegl per se però betg in'utilisaziun speziala, per la quala sto vegnir pajada ina concessiun, e monopols per quests bains communabels n'èn motivads nagins. Las vischnancas èn libras da fixar ina participaziun vi dals implants da producziun (analogamain a las ovras partenarias tar la forza idraulica). Cun ina participaziun sistematica da las vischnancas pon vegnir avertas funtaunas d'entradas per las vischnancas da staziunament.

Tar la dumonda 6: Cun represchentanzas da la branscha, da las federaziuns da l'ambient e dals chantuns ha il Departament federal per ambient, traffic, energia e communicaziun (DATEC) convocà ina maisa radunda la stad 2020 per che las finamiras d'extensiun da la forza idraulica fixadas en la Lescha d'energia possian er vegnir cuntanschidas fin l'onn 2050. Da vart da la Confederaziun vegnan examina­das tranter auter ulteriuras promoziuns finanzialas per cuntanscher questas fina­miras. Sco in dals chantuns ils pli impurtants da la forza idraulica s'engascha il Grischun activamain tant sin plaun politic sco er professiunal, e quai en spezial per ch'ils projects "Chlus" e "Lagobianco" possian vegnir realisads bainprest.

1. da mars 2021