Navigation

Inhaltsbereich

Sessiun: 09.12.2020

L'administraziun chantunala ha 35 posts da servetsch. 32 da quels vegnan manads dad umens, 3 da dunnas. 94 pertschient dals uschenumnads scheffuncziunaris èn masculins. Vitiers vegnan ils stabs dals 5 departaments sco er da la Chanzlia chantunala: er là èn las posiziuns da cader per gronda part en mauns dad umens.

En las direcziuns dals posts da servetsch ed en las posiziuns da cader ch'èn vegnidas occupadas dacurt da nov, ha la Regenza elegì – cun excepziun da la manadra da l'Uffizi per la scola populara ed il sport sco er da la vicechanceliera da la Chanzlia chantunala – mo umens, en spezial en la direcziun da l'Uffizi da persunal, da l'Administraziun da taglia, da l'Uffizi per industria, mastergn e lavur e da l'Uffizi per la furmaziun media-superiura.

I para che la Regenza – sco gremi electoral responsabel – n'haja betg anc chapì ils segns dal temp. Perquai incumbensain nus la Regenza d'agir en il senn da sias atgnas finamiras guvernamentalas (administraziun chantunala sco patruna attractiva) e da promover la realisaziun da l'egualitad da las schanzas tranter dunna ed um en l'administraziun chantunala – ina finamira ch'ella ha formulà sezza.

Las sutsegnadras ed ils sutsegnaders drizzan perquai la suandanta incumbensa a la Regenza:

  1. Analogamain a l'administraziun federala duain vegnir prendidas fin l'onn 2023 mesiras, per che posiziuns da cader ch'èn suttamessas a l'elecziun da la Regenza, vegnian occupadas evidentamain e visiblamain cun tegnair quint da las schlattainas.
  2. La Regenza procura ch'ella sezza, las persunas che proponan l'occupaziun da las plazzas sco er las persunas che fan la recrutaziun sajan scoladas correspundentamain: per exempel areguard la dumonda, co che las publicaziuns da plazzas vegnan formuladas e co ch'il process da recrutaziun vegn concepì cun tegnair quint da las schlattainas.
  3. Il Post da stab per l'egualitad da las schanzas ch'è responsabel per il «Plan d'acziun per l'egualitad en l'administraziun chantunala» duai sustegnair la Regenza cun sias enconuschientschas spezialisadas.

Tavau, ils 9 da december 2020

Hofmann, Widmer (Favugn), Atanes, Baselgia-Brunner, Bettinaglio, Cahenzli-Philipp, Cantieni, Caviezel (Cuira), Danuser, Degiacomi, Florin-Caluori, Gasser, Holzinger-Loretz, Maissen, Müller (Favugn), Perl, Preisig, Schwärzel, Stiffler, Tomaschett-Berther (Trun), von Ballmoos, Widmer-Spreiter (Cuira), Wilhelm, Bürgi-Büchel, Giudicetti, Hirsbrunner, Pajic, Stieger, Toma­schett (Cuira)

Resposta da la regenza

A la Regenza èsi enconuschent che la maioritad dals posts da servetsch ed er la Chanzlia chantunala vegnan manads dad umens. Medemamain èn ils stabs e las posiziuns da cader dals tschintg departaments occupads per gronda part cun umens. I na po er betg vegnir snegà che mo mintgamai ina dunna è vegnida elegida l'ultim temp sco manadra da l'Uffizi per la scola populara ed il sport resp. sco vice­chance­liera.

La renfatscha da las sutsegnadras e dals sutsegnaders, che la Regenza n'haja betg anc chapì ils segns dal temp, vegn dentant refusada. D'in cuntin vegnan realisadas mesiras per cundiziuns da lavur modernas per stgaffir ina meglra cumpatibilitad da la professiun cun la famiglia. Uschia spera la Regenza che dapli dunnas s'annunzian er per posiziuns da cader e da direcziun.

Or da l'incumbensa Schwärzel concernent plazzas parzialas sin tut ils stgalims dal cader (sessiun da zercladur 2019, PVAU 7/2019) ha la Regenza deducì il punct cen­tral da svilup "Patrun attractiv" ed integrà tal en il program da la Regenza 2021–2024. Sin basa da questa incumbensa èsi ultra da quai vegnì introducì che las plazzas a temp cumplain da tut ils stgalims ierarchics vegnan mintgamai publitgadas cun in grad d'occupaziun dad 80–100 %, uschenavant che quai è pussaivel resguardond las relaziuns ed ils basegns manaschials ed organisatorics.

Plinavant è l'incumbensa da la fracziun da la PS concernent in plan d'acziun per l'egualitad tranter dunna ed um en il Grischun (sessiun da zercladur 2019, PVAU 5/2019) vegnida respundida en moda affirmativa. Perquai che la Regenza è da l'avis ch'in plan d'acziun cun strategias e cun mesiras concretas saja in instrument adattà per meglierar tranter auter la cumpatibilitad da la professiun cun la famiglia, per far frunt a la mancanza da persunas spezialisadas e per posiziunar il chantun sco patrun modern ed attractiv, ha ella concludì il december 2020 d'elavurar in tal plan d'acziun. Il project equal21 è dividì en quatter fasas. En l'emprima fasa vegn eruì il stadi actual da l'egualitad. En la segunda fasa vegn nominada ina gruppa da lavur inter­departa­mentala e vegnan elavuradas finamiras e mesiras per ils departaments resp. per lur posts da servetsch e per la Chanzlia chantunala. En la terza fasa vegnan realisadas las mesiras. Ed en la quarta fasa vegnan quellas alura evaluadas. Las lavurs per il plan d'acziun duain cumenzar quest onn ed esser terminadas previsiblamain la fin da l'onn 2024. Ina da las finamiras dal project è gist quella da cuntanscher ina tscherta egualitad tranter dunnas ed umens en il cader. La Regenza vuless realisar il project equal21 ch'è gia vegnì instradà e giuditgar ses effects areguard l'egualitad, avant ch'i vegnan prendidas ulteriuras mesiras en cas da basegn. Tuttina duain las mesiras da la Confederaziun vegnir examinadas en il rom dal project e vegnir surpigliadas, sch'ellas èn adattadas.

Las sutsegnadras ed ils sutsegnaders pretendan plinavant che la Regenza procuria ch'ella sezza, las persunas che proponan l'occupaziun da las plazzas sco er las per­sunas che fan la recrutaziun, vegnian scoladas correspundentamain. Tut las publica­ziuns da plazzas libras da l'administraziun chantunala vegnan liquidadas sur l'Uffizi da persunal. La recrutaziun sco tala, en spezial ils discurs da preschentaziun, sutta­stattan a la responsabladad dals posts da servetsch. Damai ch'il manader da l'Uffizi da persunal è dentant commember da la cumissiun directiva dal project equal21 e cunquai che l'Uffizi da persunal salva mintga onn ina dieta cun las persunas dals posts da servetsch ch'èn responsablas per il persunal, pon novas enconuschien­tschas vegnir integrads directamain en ils process da recrutaziun da l'administraziun chantunala.

L'ultima pretensiun da questa incumbensa è quella ch'il Post da stab per l'egualitad da las schanzas duaja sustegnair la Regenza cun sias enconuschientschas speziali­sadas. Da quest sustegn fan la Regenza e l'administraziun chantunala gugent diever. Actualmain è il Post da stab per l'egualitad da las schanzas responsabel per elavurar il project equal21. El è er involvì en l'elavuraziun da la revisiun da la Lescha dal per­sunal.

La Regenza è pronta d'examinar en il rom da l'elavuraziun dal project equal21 ils puncts tematisads en l'incumbensa e da fixar mesiras correspundentas tut tenor ils resultats.

Sin basa da questas explicaziuns propona la Regenza al Cussegl grond d'acceptar las cifras 2 e 3 da l'incumbensa qua avant maun e da midar la cifra 1 sco suonda:

En il rom dal project equal21 vegnan examinadas las mesiras da la Confederaziun ed ellas vegnan surpigliadas, sch'ellas èn adattadas.

10 da favrer 2021