Instituziuns per la tgira d'uffants cumplementara a la famiglia ed a la scola adempleschan d'ina vart ina funcziun fitg impurtanta per l'economia e per la societad. Ellas permettan numnadamain er als geniturs cun obligaziuns da famiglia da pratitgar in'activitad professiunala. Gist en temps che la mancanza da persunas spezialisadas daventa pli acuta èsi essenzial che persunas spezialisadas scoladas hajan uschè paucs obstachels sco pussaivel per entrar en il martgà da lavur en Svizra. Da l'autra vart èn questas instituziuns – ultra da las famiglias – lieus pli e pli impurtants per la furmaziun, per l'educaziun e per la promoziun dals uffants.
Ozendi chattan famiglias cun uffants cun basegns da sustegn spezials (p.ex. impediments) en blers chantuns ed en bleras citads models sco KITAplus che permettan er ad els quest access. En il chantun Grischun n'è quai displaschaivlamain insumma betg il cas. L'emprim sutsegnader da l'incumbensa è per exempel stà confruntà questa stad cun ina situaziun, nua che l'instituziun responsabla è stada sfurzada da disdir ina relaziun da tgira, perquai ch'il basegn supplementar da tgira na pudeva betg vegnir finanzià.
En cooperaziun cun visoparents svizra, cun Insieme, cun l'Associaziun Cerebral Svizra e cun la Federaziun professiunala per l'educaziun prescolara pedagogic-curativa han las associaziuns Kibesuisse, Fundaziun Uffant e famiglia KiFa Svizra sco er KITAplus elavurà la broschura «Kindertagesstätten öffnen für Kinder mit besonderen Unterstützungsbedürfnissen» che tematisescha la finamira d'avrir las canortas d'uffants per uffants cun basegns da sustegn spezials. En quella vegni mussà tge niz che quai ha per ils uffants, per ils geniturs e per la societad, tge ch'è necessari per realisar quai e co che la finamira duai vegnir cuntanschida en moda giuridica e finanziala.
La Regenza vegn incumbensada:
- D'adattar la Lescha davart la promoziun da la tgira d'uffants cumplementara a la famiglia per garantir a famiglias cun uffants cun basegns da sustegn spezials l'access a las instituziuns.
- Ils custs per ils basegns da sustegn spezials duain vegnir surpigliads dal maun public e las famiglias duain pajar las tariffas usitadas che dependan da las entradas.
- Ella garantescha ultra da quai ch'il Servetsch ortopedagogic haja l'incumbensa d'accumpagnar e da cussegliar il persunal da las canortas d'uffants per ch'i possia vegnir garantida ina tgira professiunala.
Cuira, ils 28 d'avust 2020
Degiacomi, Ruckstuhl, Thoman-Frank, Atanes, Baselgia-Brunner, Bettinaglio, Cahenzli-Philipp, Caluori, Cantieni, Caviezel (Cuira), Crameri, Deplazes (Rabius), Gartmann-Albin, Hardegger, Hartmann-Conrad, Hitz-Rusch, Hofmann, Holzinger-Loretz, Horrer, Jochum, Kohler, Kunfermann, Müller (Favugn), Perl, Preisig, Rettich, Rutishauser, Schmid, Schwärzel, Thür-Suter, Tomaschett-Berther (Trun), Ulber, Widmer-Spreiter (Cuira), Wilhelm, Bürgi-Büchel, Sigron, Spadarotto, Tomaschett (Cuira)