Navigation

Inhaltsbereich

Incumbensa Caviezel (Tavau Clavadel) concernent la renconuschientscha d'entradas pli pitschnas/ da custs supplementars COVID-19 a partir dal mars 2021

Sessiun: 21.04.2021

Cun il conclus nr. 289/2020 ha la Regenza concludì da sustegnair ils furniturs principals da prestaziuns en ils fatgs da sanadad durant la pandemia da COVID-19, indemnisond d'ina vart las entradas pli pitschnas e surpigliond da l'autra vart ils custs supplementars. Quest conclus da la Regenza sa basa sin dretg d'urgenza ed è pervia da quai ì a fin suenter 1 onn per la fin da favrer 2021. La Regenza vegn incumbensada da prender mesiras adattadas per ina soluziun successura a partir dal mars 2021 che vala fin a la fin da la pandemia da COVID-19.

In'enquista da la Federaziun grischuna "Chasas ed ospitals" FCO tar ils ospitals acuts en il chantun Grischun mussa ch'ils furniturs principals da prestaziuns pateschan anc adina d'entradas pli pitschnas e da custs supplementars en connex cun la pandemia da COVID-19.

Quasi tut ils ospitals acuts en il chantun Grischun han realisà in EBIT (earnings before interest and taxes) negativ per l'onn da gestiun 2020, l'emprima giada er l'Ospital chantunal dal Grischun. Grazia a las contribuziuns chantunalas èn ils deficits restads tut en tut anc moderads. Senza contribuziuns chantunalas fiss la situaziun però catastrofala per la cuntrada d'ospitals en il Grischun e l'existenza dals ospitals fiss periclitada.

In'ulteriura enquista tar ils medems ospitals acuts davart l'andament da las fatschentas en l'emprim quartal da l'onn 2021 mussa che en spezial l'occupaziun staziunara era cleramain sut quella da l'onn 2020 e fitg cleramain sut quella da l'onn 2019. En media 12 %, tut en tut ca. 8,9 milliuns francs. Vitiers vegnan custs supplementars da ca. 1 milliun francs, pia in total da ca. 10 milliuns francs mo en in quartal. Las perditas d'entradas dals tractaments ambulants n'èn betg resguardadas en quest connex per motivs dal tractament egual da las medias e dals medis da chasa. Sch'er anc il conclus da la Regenza concernent la renconuschientscha d'entradas pli pitschnas/da custs supplementars COVID-19 scada ussa per la fin da favrer 2021, periclitescha quai definitivamain l'existenza dals ospitals acuts.

Pegiurada vegn la situaziun da la mancanza da persunas spezialisadas, da pretensiuns d'adattar il salari dal persunal da tgira, d'ina sutcuvrida evidenta tar la furniziun da differentas prestaziuns d'utilitad publica, d'ina bloccada da las decisiuns per fixar las tariffas sco er grondamain da custs betg cuvrids per la scolaziun e per la furmaziun supplementara.

Per ils motivs menziunads dumondan las sutsegnadras ed ils sutsegnaders:

  1. d'elavurar a curta vista ina basa legala sco soluziun successura per renconuscher entradas pli pitschnas/custs supplementars che resultan da la pandemia da COVID-19 a partir dal mars 2021.
  2.  da far a media vista ina consideraziun cumplessiva da la finanziaziun dals ospitals en il chantun Grischun.

Tavau, ils 21 d'avrigl 2021

Caviezel (Tavau Clavadel), Cahenzli-Philipp,Loepfe, Alig, Berther, Berweger, Brandenburger, Brunold, Buchli-Mannhart, Caluori, Cantieni, Casutt-Derungs, Caviezel (Cuira), Censi, Crameri, Della Vedova, Deplazes (Rabius), Derungs, Ellemunter, Engler, Epp, Favre Accola, Felix, Flütsch (Spleia), Föhn, Giacomelli, Gort, Grass, Gugelmann, Hardegger, Hartmann-Conrad, Hofmann, Holzinger-Loretz, Hug, Jenny, Jochum, Kienz, Koch, Kunfermann, Kunz (Fläsch), Maissen, Märchy-Caduff, Marti, Michael (Donat), Mittner, Müller (Susch), Natter, Niggli-Mathis (Grüsch), Perl, Pfäffli, Preisig, Rettich, Rüegg, Rutishauser, Salis, Sax, Schutz, Schwärzel, Stiffler, Thomann-Frank, Thür-Suter, Tomaschett (Cuira), Ulber, Valär, von Ballmoos, Waidacher, Weidmann, Wellig, Widmer-Spreiter (Cuira), Wilhelm, Zanetti (Landquart), Adank-Arioli, Costa, Decurtins-Jermann, Heini, Pajic, Spadarotto, van Kleef

Resposta da la regenza

Cun il conclus dals 14 d'avrigl 2020 (prot. nr. 289/2020) ha la Regenza relaschà l'Ordinaziun davart il pajament da prestaziuns d'utilitad publica ad ospitals publics e davart la surpigliada da perditas d'entradas d'ospitals sco mesira per dumagnar la pandemia da COVID-19. L'ordinaziun che valeva fin ils 28 da favrer 2021 ha gì l'intent da surpigliar las perditas d'entradas ch'èn vegnidas chaschunadas dal scumond ordinà dal Cussegl federal da desister a partir dals 21 da mars 2020 da far visitas medicinalas, tractaments medicinals e terapias medicinalas (operaziuns) betg urgentas (art. 10a al. 2 da l'Ordinaziun 2 davart las mesiras per cumbatter il coronavirus (COVID-19) [Ordinaziun 2 davart COVID-19; CS 818.101.24]). Quest scumond è puspè vegnì abolì dal Cussegl federal ils 27 d'avrigl 2020. A la gronda part dals manaschis èsi gartegià en il decurs da l'onn 2020, da prender suenter almain ina part da las operaziuns spustadas. Correspundentamain sto ina part dals 27,8 milliuns francs pajads ora puspè vegnir restituida. Tenor la decleraziun persunala dals manaschis per la fin da l'onn 2020 importa la summa che sto vegnir pajada enavos var 6,7 milliuns francs. L'autezza definitiva dals imports vegn fixada da la Regenza suenter avair verifitgà las indicaziuns dals manaschis. 
Cuntinuar cun la cuvrida da las perditas d'entradas dals ospitals er durant l'onn 2021 na fiss betg gist cumpareglià cun il rest da l'economia, perquai che las perditas d'entradas da l'onn 2021 na pon betg vegnir motivadas cun in scumond da far operaziuns, mabain primarmain cun il regress dal turissem resp. cun la situaziun economica en general. En il sectur da l'indemnisaziun per cas da direzza d'interpresas vegnan deliberads daners, sche la perdita da la svieuta è stada almain 40 pertschient u sch'ina interpresa è stada serrada durant almain 40 dis pervia d'ina ordinaziun uffiziala. En l'incumbensa vegn numnà il regress da l'occupaziun staziunara dad en media 12 pertschient. Resguardond la directiva per pajar ina indemnisaziun per cas da direzza na pari betg inditgà da cuntinuar cun la cuvrida da las perditas d'entradas e d'elavurar ina basa legala respectiva per quai.
Per cuvrir ils custs supplementars ch'èn resultads supplementarmain en connex cun la pandemia basta l'art. 24 al. 2 lit. i da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira (Lescha per promover la tgira da persunas malsaunas; DG 506.000). Tenor la retschertga tar ils manaschis importan ils custs supplementars en l'emprim quartal dal 2021 var 1,8 milliuns francs, extrapolà per tut l'onn 2021 pia stgars sur 7 milliuns francs. La Regenza ha l'intenziun da renconuscher quests custs supplementars sco prestaziuns d'utilitad publica dal provediment medicinal per cas d'urgenza e per catastrofas e d'als cuvrir cun contribuziuns supplementaras.

Tar il punct 1: Ils custs supplementars chaschunads da la pandemia pon vegnir surpigliads en il rom da las basas legalas existentas. La surpigliada da las perditas dal retgav para nuncunvegnenta – cumpareglià cun autras interpresas en il chantun. Pervia da quai vegni desistì d'elavurar ina nova basa legala.
 
Tar il punct 2: La Cumissiun per sanadad e fatgs socials (CSF) aveva inoltrà la sessiun da zercladur 2011 ina incumbensa d'examinar il detretschament da las incumbensas e da las finanzas en la tgira da persunas malsaunas. L'expert extern ch'è vegnì nominà silsuenter ha examinà en spezial, sut tge circumstanzas ch'ina midada da sistem ad ina finanziaziun dals ospitals sulettamain tras il chantun ed ad ina finanziaziun da la tgira unicamain tras las vischnancas fiss pussaivla, sche las instituziuns responsablas restassan las medemas e cun tge consequenzas ch'ina tala midada da sistem fiss colliada. En la sessiun da zercladur 2016 ha il Cussegl grond prendì enconuschientscha dal rapport ed è s'exprimì cun ina gronda maioritad per la cuntinuaziun da las regulaziuns vertentas da la finanziaziun dals ospitals. Pervia da questa situaziun da partenza resguarda la Regenza ina nova analisa generala da la finanziaziun dals ospitals sco inditgada il pli baud en 5 onns. Dal rest vegni actualmain examinà, en tge autezza ch'in credit posteriur duai vegnir dumandà per las prestaziuns d'utilitad publica da l'onn 2021 per pudair indemnisar ils custs supplementars che vegnan chaschunads supplementarmain en connex cun la pandemia.

Sa basond sin questas explicaziuns propona la Regenza al Cussegl grond da refusar questa incumbensa.

29 da zercladur 2021