Navigation

Inhaltsbereich

Sessiun: 19.04.2021

La strategia da test dal Grischun è singulara en l'entira Svizra ed è ina fortuna per noss chantun. Sut quest aspect èsi adina puspè vegnì pretendì durant las emnas passadas da schluccar las mesiras actualas. Sin plaun federal è quai succedì per part l'emna passada.

Che nossa Regenza lascha ussa dentant a medem temp anc en vigur regulaziuns chantunalas pli severas, na tegna betg quint las stentas da tut las persunas participadas. Ina populaziun che suonda cun gronda disciplina la strategia da test menziunada, observa pia consequentamain las prescripziuns naziunalas. Ella na stuess dentant betg anc far quint cun restricziuns chantunalas sup­ple­mentaras.

Sche la situaziun epidemiologica en noss chantun daventass – cunter tuttas aspectativas – massivamain mendra cumpareglià cun la media svizra, è la Regenza libra da midar la situaziun sin plaun chantunal (tenor l'art. 4 da la Lescha davart la protecziun da la populaziun [LPPC]). Uschia survegn ella enavos la libertad d'agir cumplaina, che fiss er necessaria en ina situaziun d'ur­genza extraordinaria. Quai duess dentant esser l'excepziun e betg daventar la regla.

En vista a quests fatgs supplitgescha il Cussegl grond la Regenza grischuna:

  1. Tut las regulaziuns chantunalas ch'èn pli severas che las prescripziuns federalas ston vegnir abolidas entaifer 10 dis da lavur.
  2. Entaifer la situaziun speziala na duain en l'avegnir betg pli vegnir introducidas regulaziuns chantunalas pli severas per l'entir chantun (tenor l'art. 4 da la Lescha davart la protecziun da la populaziun [LPPC]).
  3. Exceptadas da quai èn tut las stentas che na restrenschan betg la libertad persunala da las singulas persunas (p.ex. per intensivar la strategia da test e da vaccinaziun) sco er mesiras che vegnan ordinadas durant in temp limità per minimar donns locals (p.ex. erupziun en ina singula scola analogamain ad Arosa).

Tavau, ils 19 d'avrigl 2021

Hug, Hohl, Koch, Alig, Brandenburger, Caviezel (Tavau Clavadel), Danuser, Della Cà, Dürler, Engler, Favre Accola, Felix, Flütsch (Spleia), Giacomelli, Gort, Grass, Hefti, Kuoni, Kunz (Cuira), Loi, Mittner, Salis, Thür-Suter, Valär, Waidacher, Weber, Adank-Arioli, Renkel