L'art. 69 da la Lescha davart las scolas popularas dal chantun Grischun (Lescha da scola; DG 421.000) regla il princip da la finanziaziun da las scolas. Quel prevesa ch'ils purtaders da scola portian ils custs per las scolas popularas publicas (p.ex. ils custs da salari da las persuna d'instrucziun da classa, ils custs indirects, ils custs da las localitads e.u.v.), nun che la legislaziun prevesia in auter purtader dals custs. Il chantun sa participescha als custs dals purtaders da scola cun differentas contribu­ziuns, en spezial cun la pauschala per la scola regulara sco er cun autras contribu­ziuns en ils secturs da la direcziun da la scola, da las scolas pitschnas, dal transport, da las mesiras dal sectur simpel u tar ulteriuras structuras dal di. En cas da la pur­schida da la pedagogia speziala surpiglia il chantun – tenor l'art. 78 da la Lescha da scola – ils custs dal sectur pretensius (scolaziun speziala separativa ed integrativa), ils purtaders da scola sa participeschan vidlonder cun contribuziuns pauschalas. En quest connex surpiglia il chantun però mo quels custs che resultan da las mesiras pretensiusas da la pedagogia speziala. En cas d'ina scolaziun speziala separativa è quai, abstrahà da las contribuziuns modestas dals purtaders da scola e da las per­sunas responsablas per l'educaziun, la gronda part dals custs. En cas da la scola­ziun speziala integrativa percunter restan las scolaras ed ils scolars (SeS) en la classa regulara e vegnan sustegnids – supplementarmain a l'instrucziun regulara – da persunas d'instrucziun, da persunas spezialisadas e da persunas d'assistenza – cun en media otg lecziuns. En quests cas surpiglia il chantun ils custs per la promo­ziun supplementara durant questas lecziuns. Las ulteriuras lecziuns, ch'ils SeS frequentan, vegnan dadas exclusivamain da la persuna d'instrucziun da classa da la scola regulara. Quests custs na sto betg surpigliar, sco menziunà qua survart, il chantun, mabain il purtader da la scola regulara. Mintga onn midan SeS per diffe­rents motivs ad in'auter purtader da scola che quel ch'è responsabel per ellas ed els. Quai tranter auter, perquai ch'il purtader da scola responsabel na po betg cuvrir lur basegns pedagogics spezials, p.ex. en cas da SeS talentads u cun duns spezials, sch'igl è memia char per il purtader da scola da metter a disposiziun la purschida u sch'i n'è betg pli pussaivel d'instruir ils SeS (p.ex. pervia da mobing u pervia da problems disciplinars). Il cas il pli frequent è però ch'in purtader da scola na porscha betg pli singuls stgalims (savens il stgalim secundar I) u na maina tut tenor pli nagina scola perquai ch'ils SeS mancan. Ils SeS pertutgads frequentan alura savens la scola dal purtader da scola vischin. Tenor l'art. 6 al. 2 da l'Ordinaziun tar la Lescha da scola (Ordinaziun da scola; DG 421.010) sto il purtader cedent pajar per regla ils daners da scola ed ils eventuals custs da transport en cas d'ina midada da scola (frequentaziun da la scola en in auter purtader da scola) per ils motivs numnads. Questas regulaziuns valan per tut ils SeS da la scola populara, quai vul dir per las scolaras ed ils scolars da la scola regulara sco er da talas e tals da la scolaziun speziala integrativa.  Ils daners da scola ch'il purtader da scola cedent sto pajar, correspundan als custs che resultan da princip tar il purtader da scola acceptant per il sectur da la scola regulara e che quel sto surpigliar tenor l'art. 69 da la Lescha da scola. En tscherts cas da midadas da scola pretendan ils purtaders da scola acceptants però mo in import reducì fermamain u renunzian dal tuttafatg d'incassar daners da scola, perquai che la midada na chaschuna tar el per regla nagins custs supplementars u mo custs supplementars minimals. Ils custs supplementaras per mesiras da la pedagogia speziala en cas d'ina scolaziun speziala integrativa vegnan surpigliads dal chantun. Ord vista da la Regenza è la regulaziun concernent ils portacusts en il sectur da la scola populara clera, consequenta ed eguala per tut ils purtaders da scola pertutgads sco er per ils SeS. La pretensiun formulada en l'incumbensa Ulber ch'il chantun duai da nov surpigliar supplementarmain ils daners da scola en cas che SeS, che dovran ina scolaziun speziala, midan la scola, signifitgass in distatgament da questa regulaziun en in singul sectur e pervia d'in cas singul. La visita da scola dad SeS da la scola regulara en in auter purtader da scola vegniss uschia reglada autramain che quella dad SeS da la scolaziun speziala integrativa. Quai chaschuna in tractament inegual dals purtaders da scola cedents correspundents. Ultra da quai chaschuna la midada en il sectur da la pedagogia speziala in ulteriur augment dals custs a media vista, perquai ch'ina midada da las regulaziuns da finanziaziun chaschuna tenor l'experientscha adina in augment dals cas. Pervia da quai parta la Regenza da custs supplementars stimads da var 100 000 francs per onn.

Sa basond sin questas explicaziuns propona la Regenza al Cussegl grond da refusar questa incumbensa.

30 d'avust 2021