Navigation

Inhaltsbereich

Dumonda Gartmann-Albin concernent la pedofilia en l'internet

Sessiun: 20.10.2021

Tenor in studi è il traffic d'internet sin l'entir mund s'augmentà en media per 15 fin 30 pertschient durant l'emprim lockdown il mars 2020.

Er giuvenils navigheschan e communitgeschan gugent en l'internet. Quai san er persunas pedofilas e spetgan ils uffants en la rait. I na fa betg propi surstar, che uffants daventan levamain victimas. Lur abilitad da giuditgar sa sviluppescha numnadamain pir en la vegliadetgna dad 11 fin 14 onns.

Tenor rapports medials ston ins partir dal fatg, ch'er la pedofilia en l'internet è s'augmentada durant il lockdown e durant il homeoffice.

Tenor la plattafurma naziunala «Giuventetgna e medias» da l'Uffizi federal d'assicuranzas socialas èn gia 13 pertschient dals giuvenils da 12 fin 13 onns, 23 pertschient dals giuvenils da 14 fin 15 onns e 33 pertschient dals giuvenils da 16 fin 17 onns almain ina giada vegnids contactads via internet da persunas cun intenziuns sexualas.

Ils chantuns èn responsabels per la persecuziun penala da la pedocriminalitad. Bleras annunzias da suspect vegnan fatgas davent da l'exteriur. L'Uffizi federal da polizia (fedpol) assegna lura quels als chantuns per l'ulteriura elavuraziun. Il fedpol agescha sco post central, coordinescha e garantescha il barat d'infurmaziuns tranter ils chantuns e tranter partenaris da l'exteriur ubain er tranter organisaziuns spezialisadas. Plinavant garantescha l'uffizi er la coordinaziun operativa da cas cumplexs sin nivel naziunal ed interchantunal. Quai succeda entaifer la Rait da las autoritads da polizia per cumbatter la criminalitad digitala (NEDIK). La rait exista dapi il 1. da schaner 2021.

En quest connex vegn la Regenza supplitgada da respunder las suandantas dumondas:

  1. Co giuditgescha il chantun la collavuraziun cun fedpol en quest sectur e datti eventualmain propostas per meglierar quella? Sche gea, tge aspect han quellas?
  2. È la Regenza da l'avis, ch'i vegnia garantì in cumbat sistematic cunter la pedocriminalitad tras la divisiun da las rollas tranter la Confederaziun ed ils chantuns e co arrivan ins eventualmain a questa enconuschientscha?
  3. Quants cas da pedofilia en l'internet èn vegnids elavurads e sancziunads en noss chantun durant ils ultims 5 onns?
  4. È il dumber dals cas er s'augmentà en noss chantun e sche gea, co guardan ora las cifras respectivas?

Cuira, ils 20 d'october 2021

Gartmann-Albin, Favre Accola, Pajic, Atanes, Baselgia-Brunner, Berther, Brandenburger, Cahenzli-Philipp, Cantieni, Caviezel (Cuira), Degiacomi, Della Cà, Deplazes (Rabius), Gugelmann, Hartmann-Conrad, Hofmann, Horrer, Märchy-Caduff, Müller (Favugn), Perl, Preisig, Rettich, Rutishauser, Schwärzel, von Ballmoos, Widmer (Favugn), Widmer-Spreiter (Cuira), Wieland, Wilhelm, Bürgi-Büchel, Stieger, Stocker, Tomaschett (Cuira)

Resposta da la regenza

Tar la dumonda 1: La Conferenza dals cumandants da las polizias chantunalas da la Svizra (CCPCS) ha fundà l'onn 2018 la Rait da las autoritads da polizia per cumbatter la criminalitad digitala (NEDIK). Entaifer la NEDIK surpiglia l'Uffizi federal da polizia (fedpol) la rolla da coordinaziun, en spezial la coordinaziun dals cas internaziunals cun las autoritads partenarias a l'exteriur, sco Europol u Interpol. Il fedpol elavura e fa per la NEDIK la triascha da las annunzias da suspect d'autoritads partenarias da l'exteriur, per che la procura publica chantunala cumpetenta possia instradar ina procedura, uschespert ch'in suspect sa conferma. La collavuraziun cun il fedpol funcziuna bain. Il mument n'èn betg da constatar propostas per meglierar la collavuraziun.

Tar la dumonda 2: Ils chantuns e la Confederaziun han stgaffì ina nova furma da collavuraziun cun NEDIK. Quella garantescha in meglier entretschament da tut las instanzas involvidas e collia las resursas da spezialistas e spezialists, per ch'il cumbat cunter la criminalitad digitala possia succeder en moda coordinada ed effizienta. In dals puncts centrals en quest connex è il cumbat cunter la pedocriminalitad. Per augmentar l'effizienza en la persecuziun penala da la pedocriminalitad ha la CCPCS tranter auter decidì, ch'ils chantuns Turitg e Berna ed il concordat Svizra franzosa-Berna-Tessin surpiglian a partir dal schaner 2021 las activitads ch'il fedpol aveva prestà fin là per cumbatter la pedocriminalitad. Uschia procura per exempel il chantun Berna dapi il 1. da schaner 2021 per il monitoring da peer-to-peer (incl. l'armonisaziun da las valurs da hash) per l'entira Svizra (P2P; peer-to-peer network: Quai èn raits da computer. En questas raits èn plirs computers colliads in cun l'auter. Els collavuran e barattan datas in cun l'auter). Il monitoring P2P permetta d'intercurir las raits da P2P e d'identifitgar persunas, che chargian giu da l'internet e derasan pornografia scumandada en il senn da l'art. 197 dal Cudesch penal svizzer (CP; CS 311.0). Uschespert ch'in cas P2P po vegnir attribuì ad in chantun, fa la Polizia chantunala da Berna ina communicaziun cun il rapport dal cas a la polizia chantunala cumpetenta. Quest rapport dal cas furma la basa per la procedura d'investigaziun en il chantun respectiv. I vegn considerà sco raschunaivel, ch'ils chantuns han la cumpetenza per il sectur da la pedocriminalitad Gist en cas da pornografia exista fitg savens in stretg connex cun delicts reals. Pervia da las pussaivladads digitalas vegnan maletgs e videos bain derasads internaziunalmain. L'abus sexual d'uffants ed ils maletgs registrads latiers vegnan fatgs da delinquents en in ambient real ch'è limità stretgamain. Ord vista dals chantuns èn las autoritads da la Confederaziun memia lunsch davent dal schabetg effectiv. Ellas n'èn ultra da quai materialmain betg cumpetentas per ils ulteriurs delicts sexuals e n'han perquai betg l'experientscha da cumbatter questa categoria da delicts fitg specifics.

Tar la dumonda 3: Concernent la pornografia scumandada (art. 197 CP) èn vegnids elavurads 56 cas l'onn 2021, 36 cas il 2020, 20 cas il 2019, 29 cas il 2018 e 18 cas il 2017. Sin basa d'annunzias da suspect da las autoritads dals Stadis Unids èn vegnids elavurads 39 cas l'onn 2021, 19 cas il 2020, 26 cas il 2019, 20 cas il 2018 e 13 cas il 2017. Cas da cybergrooming, nua che persunas creschidas entran intenziunadamain en contact cun minorens cun la finamira da far abus (ed obtegnan la confidenza pass per pass), èn vegnids elavurads mintgamai dus ils onns 2021 e 2020.

Tar la dumonda 4: Resguardond las cifras che la Polizia chantunala ha avant maun (cf. er la dumonda 3) pon ins constatar in augment dal consum da maletgs pornografics en l'internet ils onns 2020/2021. Perquai ch'il dumber da cas da pedofilia zuppads en l'internet è aut, ston ins dentant partir dal fatg, ch'igl ha dà in augment er en il chantun Grischun.

12 da schaner 2022