Navigation

Inhaltsbereich

Dumonda Rutishauser concernent l'incarica da prestaziun a la Chasa da dunnas dal Grischun

Sessiun: 20.10.2021

La protecziun cunter violenza a chasa è displaschaivlamain in tema actual e permanent er en noss chantun. Il chantun è responsa­bel che las persunas pertutgadas da violenza survegnian protecziun nunbirocratica sco er l'ulteriur sustegn necessari.

Las basas giuridicas da questa obligaziun èn cuntegnidas en la Lescha federala davart l'agid a victimas ed en la Convenziun d'Istanbul, ch'èn entradas en vigur l'onn 2007 resp. 2018.

En il Grischun chattan dunnas che tschertgan protecziun, e lur uffants, l'agid necessari en emprima lingia tar l'Agid a victimas ed en la Chasa da dunnas chantunala.

Quest onn scada l'incarica da prestaziun tranter la Chasa da dunnas dal Grischun ed il chantun.

Quella sto pia vegnir suttamessa a novas contractivas. Medemamain quest onn èn vegnidas publitgadas las recumandaziuns actualas da la Conferenza da las directuras e dals directurs chantunals dals affars socials (CDAS) per la finanziaziun da chasas da dunnas.

En quest connex dumondan las sutsegnadras ed ils sutsegnaders la Regenza, co ch'ella prevesa da realisar las recumandaziuns menziunadas tar l'elavuraziun da la nova incarica da prestaziun. Sco tut las instituziuns dovra er la Chasa da dunnas dal Grischun numnadamain segirezza da planisaziun. Questa segirezza n'ha ella betg, sche la finanziaziun sa basa principalmain sin dona­ziuns. En l'entira Svizra dependa dentant nossa Chasa da dunnas il pli fitg da donaziuns.

L'autezza da las donaziuns n'è betg constanta. Quai vala er per l'occupaziun da la Chasa da dunnas. Ils tschains da locaziun, ils salaris ed autras obligaziuns ston però vegnir finanziads regularmain, per ch'il sustegn professiunal saja avant maun en cas da basegn.

La cunvegna da prestaziun actuala na correspunda insumma betg a las recumandaziuns da la CDAS. Ultra d'ina finanziaziun dal subject mancan er ina finanziaziun da l'object, soluziuns da cuntinuaziun, l'eventuala finanziaziun necessaria d'ina superaziun da traumas sco er in accumpagnament professiunal cunvegnent dals uffants.

Resguardond las recumandaziuns da la CDAS vegn la Regenza supplitgada da respunder las suandantas dumondas:

  1. Co procura il chantun che la segirezza da finanziaziun e da planisaziun saja garantida er en cas da variaziuns tipicas per la purschida?
  2. È ina finanziaziun da basa ina part integrala da la cunvegna da prestaziun?
  3. Sche gea: Èn ils custs da preparaziun resguardads tar la finanziaziun orientada a l'object?
  4. Co procura il chantun che la Chasa da dunnas disponia d'avunda persunal qualifitgà, er per l'accumpagnament d'uffants traumatisads?
  5. Correspundan las tariffas per in di per ils uffants a las tariffas per persunas creschidas?
  6. Procura il chantun en l'avegnir per ina purschida suffizienta da soluziuns da cuntinuaziun?
  7. Exista ina basa che pussibilitescha al chantun d'obligar las vischnancas da gidar a finanziar la Chasa da dunnas?

Cuira, ils 20 d'october 2021

Rutishauser, Decurtins-Jermann, Natter, Atanes, Baselgia-Brunner, Cahenzli-Philipp, Cantieni, Casutt-Derungs, Caviezel (Cuira), Clalüna, Degiacomi, Gartmann-Albin, Gugelmann, Hardegger, Hofmann, Horrer, Kohler, Maissen, Märchy-Caduff, Müller (Favugn), Noi-Togni, Perl, Preisig, Rettich, Ruckstuhl, Schwärzel, Stiffler, von Ballmoos, Widmer-Spreiter (Cuira), Wilhelm, Bürgi-Büchel, Costa, Pajic, Sigron, Stieger, Tomaschett (Cuira)

Resposta da la regenza

La Chasa da dunnas dal Grischun porscha protecziun, in alloschi d'urgenza, agid ed ina purschida staziunara per intervenziuns en cas da crisa, e quai a dunnas, ad uffants ed a giuvenilas ch'èn pertutgads da violenza fisica, psichica e sexualisada. La Con­venziun dal Cussegl da l'Europa davart la prevenziun ed il cumbat cunter la violenza envers dunnas e la violenza a chasa (Convenziun d'Istanbul; CS 0.311.35) obli­ghe­scha tranter auter il stadi da prender las mesiras legislativas u ulteriuras mesiras ne­cessarias per pussibilitar d'endrizzar avunda alloschis da protecziun adequats e facil­main accessibels, cun l'intent da metter a disposiziun in alloschi segir a victimas, en spezial a dunnas ed a lur uffants, e per gidar ellas ed els en moda proactiva (art. 23 da la Convenziun d'Istanbul). Cun metter a disposiziun servetschs da protecziun e d'agid ston ils dretgs ed ils basegns dals uffants vegnir resguardads commensura­damain. Quai cumpiglia en spezial er ina cussegliaziun psicosociala adattada a la vegliadetgna dals uffants pertutgads (art. 26 da la Convenziun d'Istanbul).

Sin basa da la Lescha federala davart l'agid a victimas da delicts (Lescha davart l'agid a victimas, LAVi; CS 312.5) èn ils chantuns responsabels per metter a dispo­siziun avunda plazzas en alloschis d'urgenza (art. 14 al. 1 LAVi). La Conferenza da las directuras e dals directurs chantunals dals affars socials (CDAS) ha deliberà ils 27 da matg 2021 recumandaziuns per la finanziaziun da chasas da dunnas. Quellas duain meglierar la segirezza da finanziaziun e da planisaziun e garantir il tractament egual da las dunnas e dals uffants pertutgads.

Igl è l'incumbensa dal chantun da garantir, tenor il basegn, avunda plazzas per victi­mas en alloschis da protecziun e da procurar per ina finanziaziun economicamain adequata da questas plazzas. Il chantun ademplescha questa incumbensa e finan­ziescha ils alloschis da protecziun cun agid d'ina incarica da prestaziun cun la funda­ziun Chasa da dunnas dal Grischun. L'incarica da prestaziun vegn actualmain reno­vada per ils onns 2022–2025, uschia che la finanziaziun è garantida a vista pli lunga. Il chantun maina ultra da quai regularmain discussiuns cun la Chasa da dunnas dal Grischun per pudair garantir da tut temp avunda alloschis da protecziun d'auta qua­litad sco er ina buna collavuraziun. Persunas spezialisadas dal chantun porschan sustegn a la Chasa da dunnas en cas da basegn. Ultra da l'incarica da prestaziun conceda il chantun regularmain contribuziuns a la Chasa da dunnas dal Grischun per projects e per la lavur da publicitad.

Tar las dumondas 1–3: La Chasa da dunnas dal Grischun è situada en ina regiun periferica ed ha ina purschida relativamain pitschna (trais chombras). L'occupaziun dals ultims 4 onns variescha tranter 37 e 52 pertschient. Per ina purschida econo­mi­ca e d'auta qualitad duvrassi in'occupaziun d'almain 60 pertschient. Ultra da l'indem­nisaziun dependenta da la prestaziun che vegn pajada tras l'Agid a victimas dal Gri­schun, sa participescha il chantun Grischun perquai cun ina garanzia annuala da ma­ximalmain 100 000.– francs a la finanziaziun da la Chasa da dunnas dal Gri­schun. Per augmentar l'occupaziun a vista pli lunga èsi previs da promover la collavuraziun tranter las differentas chasas da dunnas da la Svizra Orientala resp. cun ils chantuns cunfinants.

Tar la dumonda 4: Per sia lavur s'orientescha la Chasa da dunnas dal Grischun tenor las directivas da qualitad fixadas cuminaivlamain l'onn 2021. Per sia lavur sto la Cha­sa da dunnas plinavant sa basar sin enconuschientschas e sin metodas specificas renconuschidas e realisar cuntinuadamain ils svilups relevants. Uschia vegni tranter auter garantì ch'i vegn engaschà persunal qualifitgà sco er professiunalmain e per­su­nalmain adattà e che la protecziun ed il bainstar dals uffants pertutgads stattan adina en il center.

Tar la dumonda 5: Las tariffas per in di èn las medemas per uffants sco per persunas creschidas. Ellas importan 330.– francs, e quai tant per persunas domiciliadas en il Grischun sco er per persunas che abitan ordaifer il chantun.

Tar la dumonda 6: In'extensiun da la purschida, en spezial per soluziuns da cunti­nuaziun, è vegnida tematisada pliras giadas da l'Uffizi dal servetsch social envers la Chasa da dunnas. In concept correspundent da la Chasa da dunnas n'è betg anc avant maun.

Tar la dumonda 7: Ina basa legala che oblighescha las vischnancas da gidar a finan­ziar la Chasa da dunnas dal Grischun n'exista betg.

17 da december 2021