La naschientscha d'in uffant è per ils geniturs in eveniment impurtant che mida la vi­ta. Per promover la cumpatibilitad da la famiglia cun la professiun e per proteger la mam­­­ma e l'uffant han geniturs cun activitad da gudogn – tenor il dretg federal vertent – il dretg d'in congedi da maternitad e da paternitad suenter la naschientscha da l'uf­fant. Il congedi da maternitad pajà è entra en vigur il 1. da fanadur 2005, il congedi da paternitad il 1. da schaner 2021. La finamira d'in congedi per geniturs è en discus­siun sin plaun federal.

La promoziun da la famiglia, la promoziun tempriva, l'egualitad da dunna ed um sco er il cumbat da la mancanza da persunas spezialisadas e l'attractivitad da l'economia locala èn giavischs impurtants da questa incumbensa che la Regenza sustegna. Correspundentamain èn quests temas vegnids integrads en il program da la Regen­za 2021–2024. La Regenza lavura vi da projects concrets che han la finamira d'aug­mentar l'attractivitad dal lieu d'abitar e da lavur per famiglias.

Il relasch d'ina regulaziun legala chantunala concernent in congedi per geniturs per las lavurantas ed ils lavurants en in chantun è mo pussaivel cun restricziuns. La le­gis­­laziun en il sectur dal dretg civil è chaussa da la Confederaziun, entant che la Con­federaziun ha fatg diever da sia cumpetenza en il sectur da la protecziun da las lavurantas ed ils lavurants. Correspundentamain na resta als chantuns, en vista a las relaziuns da lavur dal dretg privat, nagina cumpetenza da legiferir ulteriuramain, ora­vant tut betg da francar giuridicamain auters congedis ultra dals congedis existents tenor il dretg federal – independentamain dal gener. Quai vala confurm al senn er are­guard la finanziaziun sur l'urden da cumpensaziun dal gudogn. Sche la pussaivla­dad da stgaffir in congedi da geniturs u da paternitad duess vegnir concedida als chan­­tuns, stuess il legislatur federal crear in'autorisaziun explicita per las regulaziuns chantunalas. Il legislatur chantunal – u er communal – è dentant autorisà d'introducir per lavurantas e lavurants cun in contract da lavur da dretg public in congedi chantu­nal u communal che surpassa las disposiziuns dal dretg federal (cf. latiers Curia Vi­sta 20.320 sco er las publicaziuns da la Cumissiun federala per dumondas da fami­glia CUFF, cunzunt «Elternzeit – Elterngeld, ein Modellvorschlag der EKFF für die Schweiz», onn 2010).

En quest connex stoi vegnir menziunà ch'il Parlament federal n'ha betg acceptà l'iniziativa dals chantuns dal chantun Giura «Disposiziuns davart il dretg sin congedi da geniturs u da paternitad e sia durada – eventual relasch tras ils chantuns (Curia Vista 20.320)». Questa iniziativa pretendeva da l'Assamblea federala da conceder als chantuns ina cumpetenza regulativa per il congedi da geniturs e da paternitad.

Concernent il giudicament dals custs e dal niz d'in congedi per geniturs exista gronda malsegirezza. La Cumissiun per segirezza sociala e sanadad dal Cussegl naziunal (CSS-N) ha inoltrà il zercladur 2021 in postulat, nua ch'il Cussegl federal vegn suppli­tgà «da preschentar in'analisa economica cumpletta dals custs e dal niz che simule­scha e stima tge consequenzas che differents models da congedi per geniturs han a lunga vista per l'economia publica […]. […] Anc adina n'exista nagin studi da l'econo­mia publica che cumpareglia en Svizra il status quo cun auters models e che simule­scha, tge che fiss il pli raschunaivel ord vista da l'economia publica. […] Per ch'il par­lament e las cumissiuns responsablas possian far ina politica sin fundament da l'evi­den­za e sin basa da las consequenzas d'ina mesira per l'economia generala a lunga vista, dovri in'analisa che fa – ultra da la stimaziun dals custs discutads vastamain – er ina stimaziun dal niz (p.ex. en furma da la midada da quotas da gudogn e da pen­sums da dunnas e d'umens che po vegnir spetgada, las consequenzas sin las entra­das fiscalas, sin las assicuranzas socialas, en spezial il provediment per la veglia­detg­na e las prestaziuns supplementaras, l'agid social e l'amortisaziun da custs da scolaziun [CSS-N, postulat 21.3961]).» Il Cussegl federal ha proponì d'acceptar il po­stulat. Il Cussegl naziunal è suandà questa dumonda il settember 2021. Basas da decisiun davart las consequenzas d'in congedi per geniturs èn da spetgar a media vista pervia da quest postulat.

La creaziun d'ina basa giuridica per in congedi chantunal per geniturs per tut las la­vu­rantas ed ils lavurants na vegn betg ad esser giuridicamain pussaivla en vista a l'urden da cumpetenzas dal dretg constituziunal. L'introducziun d'in congedi per geni­turs mo per las relaziuns d'engaschament dal dretg public chantunal resguarda la Re­genza sco inadequata. Il tema dal congedi per geniturs è dentant preschent, e sin plaun federal vegnan actualmain fatgs intgins svilups en chaussa.

Sa basond sin questas explicaziuns propona la Regenza al Cussegl grond da refusar questa incumbensa.

23 da december 2021